ب دەڤنەرمی بەحسا شەرێ ل دژی پەدەكێ دكە
ئه‌ندامێ کۆمیته‌یا ڕێڤه‌به‌ر یا پارتیا كاركەرێن كوردستانێ (پەكەكە) مورات کارایلان د هه‌ڤپه‌یڤینه‌کا خوه دا دگه‌ل (ئا ئێن ئێف)، به‌حسا ڕه‌وشا پاتیا دەمۆكراتا كوردستانێ (پەدەكە) دكە. کارایلان د به‌شه‌ک ئاخاڤتنا خوه دا دبێژه: تێکلیێن پەدەکێ یێن ب ترکیه‌یێ ڕا، هه‌ڤکاریا ئیستیخباراتی و …ھتد، خزمه‌تێ ژ گه‌لێ کورد ڕه ناکن. یا ڕاست خزمه‌تێ ژ پەدەکێ ڕا ژی ناکن.
کارایلان ته‌ڤگه‌را پێشمه‌رگه‌یێن کوردستانێ ل حه‌فته‌نینێ، مه‌تینا، گار و بادینانێ وه‌که ته‌ڤگه‌را پەدەکێ دده نیشاندان و دبێژه ئه‌ڤ یه‌ک خه‌ته‌ره و دکارە ببه سه‌ده‌ما شه‌ر.
د به‌رده‌وامیا ئاخاڤتنا خوه دا کارایلان دبێژه:هێزێن پەدەكێ که‌تنه ناڤا لڤ و ته‌ڤگه‌رێ، که‌تنه پۆزیسیۆنا شه‌ر. یانی ئه‌گه‌ر چاڤدێریه‌که مه یا جدی و ئاگاهیێن مه یێن جدی نه‌بوونا، مه ب ڤی ڕه‌نگی نه‌دگۆت، ژ به‌ر کو ئه‌م هه‌ر تم خوه‌شبینن. لێ به‌لێ ئه‌م نها لێ دنه‌رن؛ ب ڕاستی ژی ئاماده‌کاریه‌ک هه‌یه. ب ڤێ ئاماده‌کاریێ ڕا چ دخوازن بکن. مه‌سه‌لا ل کو نوقته‌یه‌که مه هه‌به، دخوازن یه‌کسه‌ر هێزه‌کێ ل ور ب جھ بکن. د ناڤبه‌را دو هێزێن مه ده ڕێیه‌ک هه‌به، دخوازن ل ور قه‌ره‌قۆله‌کێ چێبکن.
د نووچه‌یا (ئا ئێن ئێف) ده دده خوویاکرن کو، کارایلان ل سه‌ر بوویه‌ران بانگ ل مه‌سعود بارزانی دكە و دبێژە؛ “ب تایبه‌تی ژ ڤر دخوازم بانگ ل که‌ک مه‌سعود بکم؛ هایا وی ژ ڤان کریاران هه‌یه یان نا؟ نزانم کو نێرینێن وی یێن د ڤێ مژارێ دا چ یه، ژ به‌ر کو هه‌تا نها نه‌ئاخڤیه. ئه‌م دخوازن نێرینێن که‌ک مه‌سعود ژی هین ببن. یانی ئه‌ڤ تشت هه‌موو ژ بۆ چ تێن کرن؟ چما دخوازن ب هێزه‌که ئه‌وقاسی مه‌زن دۆر و ڕێیا هه‌ڤالان بگرن؟ ئه‌ڤ تێ چ واته‌یێ؟ ئه‌م دخوازن کو ده‌ست ده‌ینه سه‌ر ڤێ مه‌سه‌له‌یێ. چ دبه بلا ببه ئه‌م ئاماده نه کو پرسگرێکێن خوه یێن ناڤخوه‌یی ب ڕێیا دیالۆگێ چاره‌سه‌ر بکن. لێ به‌لێ ئه‌گه‌ر تو دۆرا هێزه‌که له‌شکه‌ری، چه‌پ، ڕاستێ وێ بگری، هه‌ول بدی کو جھ لێ ته‌نگ بکی، نه‌یێ خوه‌ستن ژی وێ هینگی شه‌ر بقه‌ومه.
ده‌ما کارایلان دبێژه کو ؛ پەدەکێ ل حه‌فته‌نینێ، مه‌تینا، گارە و بادینانێ ته‌ڤدگه‌ره و نێزکی هێزێن مه نقته‌یێن له‌شکه‌ری ئاڤا دکه و ڤێ یه‌کێ وه‌ک سه‌ده‌ما شه‌ر ڕادگهینه، د ناڤا خه‌یالان دا دژی. پێشمه‌رگه‌یێن کوردستانێ ل حه‌فته‌نینێ، مه‌تینا، گارە و بادینانێ ته‌ڤدگه‌رن. ئه‌ڤ ده‌ر هه‌موو باشوورێ کوردستانێ یه و د بن ده‌ستهلاتداریا حوکومه‌تا کوردستانێ ده نه. هه‌ر ده‌را بخوازن نقته‌یێن له‌شکه‌ری داتینن. ئه‌و ده‌ڤه‌رێن کارایلان به‌حسێ دکه نه باکورێ کوردستانێ یه، نه ل جودی، هه‌ره‌کۆلێ یان ژی ل ئامه‌دێ یه. دڤێ ڤێجا کارایلان و پەكەكە ڕاستیا خوه ببینن.
ده‌ما مرۆڤ د ڤێ ده‌ما داوی ل هه‌لوه‌ستا مه‌دیا پەكەكێ دبینه و دژاتیا وان یا تایبه‌ت ل هەمبه‌ر پەدەكێ به‌رفره‌ھ دنرخینه و هه‌روه‌ها داخوویانیێن ڕێڤه‌به‌رێن پەكەكێ به‌رچاڤره ده‌رباس دکه، چ واته‌یا گۆتنێن کارایلان نامینه. پەكەك ژ ئالیه‌کی ڤه ب هه‌موو هێزا خوه شه‌رێ پەدەكێ دکه، ژ ئالیه‌ک دن ڤه حوکومه‌تا هه‌رێما کوردستانێ و ده‌زگه‌هێن کوردستانێ یێن یاسایی ناس ناکه و ته‌نێ به‌حسا پەدەكێ ب خرابی دکه. ژ هه‌موویێ وێده‌تر پەدەكێ ب خیانه‌تێ تاوانبار دکه. پێدڤیە کارایلان ژ به‌ری ڤان گۆتنێن خوه بێژه پیچەكێ ژی به‌رێ خوه بده داخوویانیێن هه‌ڤالێن خوه و ل گۆرا ڤێ گۆتنێن خوه بێژه.
تێ زانین کو، کارایلان د ناڤا پەكەكێ دا نه خوه‌دی ده‌ستهلاتداریه‌ک ب باندۆره و ب ئاوایه‌کی هاتیه پاسیف کرن. ژ ئالیه‌ک دن ڤه کارایلان گه‌له‌ک سیاسه‌ته‌ک گونده‌واری ڕێڤه دبه . ژ خوه پارتیا کارایلان ل دژێ پەدەكێ شه‌ر ڕاگەهاندیه. ژ ئالیه‌ک دن ڤه ئه‌ندامێ کۆمیته‌یا کو مورات کارایلان تێ دا جھ دگره داخوویانیێن بالکێش دده. موستافا کاراسو ڤه‌کری دا خوویاکرن کو، شه‌رێ ل دژێ پەدەكێ نه شه‌رێ براکوژیه. کارایلان پێدڤیە به‌ری هه‌ر تشته‌کی ڤێ داخوویانیێ بنرخینه. د بنگه‌هێ خوه دا د مه‌دیا پەكەكێ دا هه‌ر ده‌می پرس و به‌رسڤ ئاماده‌نه .
کارایلان گه‌ره‌ک خوه‌دی وێ که‌سایه‌تێ بە کو ل گۆتنێن خوه خوه‌دی ده‌رکه‌ڤه و بکاربه به‌ری بانگی سه‌رۆک بارزانی بکه، وێ جه‌ساره‌تێ ب خوە بدە و گۆتنێن هه‌ڤالێن خوه یێن تووژ و دژوار د ده‌ربارێ پەدەكێ دا بنرخینه.
سیاسه‌ت نه ل گۆرا که‌یفا پەكەكێ و کارایلان تێ ڕێڤه‌برن، کارایلان ب ته‌کتیکێن پککێ یێن کلاسیک و ب ئاوایه‌ک ژیربنا گوندتیێ سیاسه‌تێ دکه.
هه‌رێم و کوردستان د قۆناغه‌ک گه‌له‌ک حه‌ساس ڕا ده‌رباس دبه. کورد د سه‌رۆکاتیا پەدەكێ و بارزانی دا به‌ر ب ڕاگەهاندنا ده‌وله‌تا کوردستانێ ڤه دچن. د ڕێیا سەرخوەبوونا کوردستانێ دا پەكەكە ئاسته‌نگه. گه‌لۆ کارایلان د ڤێ ده‌ربارێ ده چ دبێژه ؟ یان ژی دکاره چ بێژه؟
نووچه/ئانالیز
2020.10.28
