ب رێیا بەرھەم صالح پەكەكە دچە شامێ
بریارا سەرۆكێ ئەمریكایێ یا ژ نشكاڤە كو ھێزێن خوە ژ رۆژئاڤایێ كوردستانێ و باكورێ سوریێ ڤەكشینە گەلەك مناقەشە، سیناریو و ئیحتیمال ب خوەرا ئانین و ھەموو ئالیێن پەیوەندیدار كەتن ناڤ لڤ و تەڤگەرا كا چاوا وێ ڤالاھیا ژ ئەنجاما ڤەكشینا لەشكەرێ ئەمریكی چێ دبە، تژی بكن.
سوریا خوە ل ھەمەبر ڤێ بریارێ بێ دەنگ كریە، روسیا ل بەندا وێ رۆژێ یە ھەتا ھەموو لەشكەرێ ئەمریكی دەردكەڤە، عەرەبێن ھەڤالبەندێن ئەمریكایێ ل رۆژھەلاتێ فراتێ كەتنە ناڤ ترسێ، كورد ھەست ب خیانەتێ دكن، تەھران پێ كێفخوەشە، پاریس، لەندەن و بەرلین ژ بەر بریارا ئەمریكایێ عەجێمایی مانە.
دپلۆماتكار و فەرماندارێن لەشكەری یێن ئەمریكا و تركیێ دێ رۆژا 8ێ چلەیا پاشین ل واشینگتۆنێ بجڤن و دێ د وێ جڤینێ دا بەحسا كا چەوا ئەو ڤالاھیا ژ ڤەكشینا لەشكەرێ ئەمریكی چێدبە تژی بكن و چەوا توخیبێ ناڤبەرا سوریێ و تركیێ بپارێزن.
د وێ جڤینێ دا دێ دوو سیناریو بھێن مناقەشە كرن:
- ب ناڤبەینیا سەرۆكێ عیراقێ، بەرھەم صالح، سەركردەیێن پارتیا كاركەرێن كوردستانێ (پەكەكە) ژ قەندیلێ بچن سلێمانیێ و ژ وێرێ بچن شامێ و دگەل بەرپرسێن حكومەتا سوریێ تێكەلیێن خوە ڤەگەرینن بۆ دەما بەرێ، دەما بەری دەرخستنا عەبدولا ئوجەلان ژ سوریێ، لەشەكرێ سوریێ ڤەگەرە سەر توخیبێ ناڤبەرا سوریێ- تركیێ و عیراقێ و كونترۆلا ھەموو خالێن سەر وان سنوران بكە و ئالایا سوریێ ل ھەموو دەڤەرێ دگەل رۆژھەلاتا فراتێ بلند بكن.
- یەك ژ وان سیناریویێن دن ئەوە كو 20 ھەتا 30 كیلومەترەیان باكورێ سوریێ دگەل توخیبێ تركیێ ل دەڤەرا جەرابلس و سێگوشەیا تركی-سوری-عیراقێ بێ تەئمین كرن.
ئەو خالێن كونترۆلێ یێن لەشەركێ ئەمریكی دگەل شەرڤانێن یەكینەیێن پاراستنا گەل (یەپەگە) ل گرێ سپی، كوبانێ و سەرێ كانیێ دانانە بھێن راكرن و شەرڤانێن یەپەگێ ژ وان دەڤەران بھێن دوورخستن و پێشەرگەیێ رۆژ ل وان خالان بھێت بجھ كرن.
چەكدارێن عەشیرێن عەرەبان ل باكورێ حەلەبێ و رۆژئاڤایێ فراتێ بەلاڤ ببن و ل وان دەڤەران شەرێ داعیشێ بكن و چەكدارێن عەرەب ل باژارێن رەقە و طەبقە زێدەتر رۆل و گرانیا خوە ھەبە.
ب ڤی ئاوایی تەرازوویا دەمۆگرافیا دەڤەرێ تێ گوھەرتن.
ل گۆر رۆژنامەیێ دێ سەرۆكێ تەڤگەرا سبەرۆژێ، ئەحمەد جەربا، رۆلەك مەزن بگێرە و دێ بەردەوام سەردانا ھەولێر و ئەنقەرەیێ بكە داكو ئەو ساریا ناڤەبرا وان دا ھەیە نەمینە و ل سەر مەسەلا سوریێ ب ھەڤ رە كار بكن.
وەكە تێ زانین رۆژا چارشەما بۆری، سەرۆكێ ئەمریكایێ، دونالد ترامپ، بریارا ڤەكشینا لەشكەرێ ئەمریكایێ ژ باكورێ سوریێ دا و ل گۆر وێ بریارێ د ناڤا 60 رۆژان دا دێ لەشكەرێ ئەمریكی، دوو ھەزار سەرباز، ب تمامی ژ سیوریێ ڤەكشن.
تركیی 822 كیلۆمەتر توخیب دگەل سوریێ ھەیە. پشتی بریارا سەرۆكێ ئەمریكایێ، تركیێ یەكسەر ھێزێن خوە ل سەر توخێبێ سوریێ كۆم كرن كو ئێریشێ بكە، لێ ل سەر داخوازا ئەمریكایێ ئەو ئێریش پاشخستیە.
ئامادەكرن: نصرت حاجی
23.12.2018 ژێدەر: رۆژنامەیا الشرق الاوسط یا رۆژا
