ب مه‌ژیێ چه‌پێن ترکێن که‌مالیست ئێریش دكە

وه‌ک گه‌له‌ک جارا پارتیا كاركەرێن كوردستانێ (پەكەكە) جاردن ڕۆژانه‌ ئێریش دكە سه‌ر پارتیا دەمۆكراتا كوردستانێ (پەدەکە) و ب دژواری د مه‌دیا خوه‌ دا‌ شه‌رێ پەدەکێ دکه‌. تێ زانین کو مستافا کاراسو د به‌رنامه‌یه‌ک ته‌له‌ڤزیۆنی دا‌ ل دژی پەدەکێ شه‌ر ڕاگەهاند بوو. نها ژی زوبه‌یر ئایدارێ کو که‌س نزانە کیه‌ و چ دکه‌ ب ناڤێ پەکەکێ به‌هسا تێكەلیێن پەدەکێ و ترکیێ دکه‌ و گه‌له‌ک ب توندی گۆتنێن نه‌ ل سه‌ر ڕێ ل دژی پەدەکێ دبێژه.

گه‌له‌ک خه‌رابه‌ کو، که‌سه‌ک زلامێ ترکیێ بە‌ و ڕێخستنا وی ب خوه‌ ژ ئالیێ ده‌وله‌تا ترک ڤه‌ هاتبە چێکرن و رابە به‌هسا تێكەلیێن پەدەکێ و ترکیێ‌ بکه‌. ژ ئالیه‌ک دن ڤه‌، د ده‌ربارێ چنەكرنا ته‌ڤگه‌را کورد دا‌ گۆتنێن ئۆجەلان و ماموستایێ وی یالچن کوچوک گه‌له‌ک ڤەكری و زەلالن‌. لێ سه‌ده‌ما کو پەکەکە د ڤێ قۆناغێ دا‌ جاردن ئێریشی سەر پەدەکێ دکه‌ ژ ئالیێ کوردان ڤه‌ و ژ ئالیێ پارتیێن سیاسی ڤه‌ گه‌له‌ک ناھێتە ڕۆژه‌ڤێ و ناھێتە منانقەشە كرن. پەدەکە ب خوه‌ ژی ده‌ما پێویست دبینه‌ به‌رسڤا ده‌ره‌وێن پەکەکێ دده‌. لێ ئه‌گه‌ر پەدەکە کارێ خوه‌ بکه‌ به‌رسڤدانا ده‌ره‌وێن پەکەکێ، دڤێ کاره‌ک دن نه‌که‌.

ده‌ما پەکەکە ئێریشی سەر پەدەکێ دکه‌، ته‌کتیکه‌ك گه‌له‌ک ڕووڤیتی ب کار تینه‌. چ جارا به‌هسا حوکومه‌تا هه‌رێما کوردستانێ و ده‌زگه‌هێن فه‌رمی یێن کوردستانێ ناکه‌. ئه‌گه‌ر که‌سه‌ک ژ ئالیێ حوکومه‌تێ ڤه‌ هاتبه‌ گرتن دبێژه‌ ئه‌و ژ ئالیێ پەدەکێ ڤه‌ هاتیه‌ گرتن. د بنگه‌هێ خوه‌ دا پەکەکە ئیعترافێ ب ده‌زگه‌هێن فه‌رمی یێن هه‌رێما کوردستانێ ناکه‌. سه‌رۆکاتیا هه‌رێمێ، حوکومه‌تا هه‌رێمێ و پارله‌مه‌نتۆیا کوردستانێ ناس ناکه‌. مخابن که‌سه‌ک ل سه‌ر ڤێ یه‌کێ گه‌له‌کی ناسه‌کنه‌. هه‌تا ده‌ما پەکەکە ب ده‌ره‌وان ئێریشی سەر پەدەکێ دکه‌ گه‌له‌ک که‌س کو خوه‌ نێزیکی پەدەکێ دبینن د بن سمبێلێن خوه‌ دا دکه‌نن. یانی ئه‌ڤ سیاسه‌تا دژی هه‌موو نرخێن کوردستانی و مرۆڤاتیێ یا پەکەکێ که‌یفا هنده‌ک که‌سێن کو خوه‌ وه‌ک خێرخازێ پەدەکێ ددن نیشاندن دئینە‌.

تایبه‌تی ئه‌و کوردێن کو دبێژن هه‌رێما کوردستانێ ل باشوورێ کوردستانێ ده‌ستکه‌فتیه‌ک مه‌زنه‌ و دڤێ ئه‌م ڤێ ده‌ستکه‌فتیێ ژ بۆ پاشه‌رۆژا کوردستانێ وه‌ک چاڤێن خوه‌ بپارێزن، ل هەمبه‌ر ئێریش، ته‌هدید و ده‌ره‌وێن پەکەکێ بێ ده‌نگن. پەکەکە د که‌سایه‌تیا پەدەکێ دا‌ ئێریشی سەر ده‌ستکه‌فتیێن کوردستانی دکه‌. پەکەکە ئێریشی سەر سیاسه‌تا کو دخوازه‌ کوردستانه‌ک سه‌ربخوه‌ بێ ئاڤاکرن دکه‌. هه‌ر کورده‌ک مه‌جبووره‌ پیڤانه‌کێ ژ بۆ  سیاسه‌تا خوه‌  ده‌ینە. ئه‌گه‌ر پیڤان ده‌ستکه‌فتیێن نه‌ته‌وەیی به‌، به‌رژه‌وه‌ندیێن نه‌ته‌وەیی به‌ و خوه‌شکرنا ڕێیا سه‌رخوه‌بوونێ به‌، پێدڤیە ل هەمبه‌ر پەکەکێ خوه‌دی هه‌لوه‌ستبن.

ل سه‌ر هه‌ر کورده‌ک نشتمانپه‌روه‌ر فه‌رزه‌ کو، پەکەکێ ته‌شهیر بکه‌ و ڕاستیا سیاسه‌تا پەکەکێ ژ خه‌لکێ ڕا‌ بێژه‌. لێ مخابن ئه‌ڤ یه‌ک ناھێتە کرن. گه‌له‌ک کێم که‌س و هنده‌ک مه‌دیا ڤێ یه‌کێ دکەن‌ و ده‌نگێ وان ژی کێم ده‌ردکه‌ڤه‌ و به‌لکی چ باندۆرا هه‌لوه‌ستا وان ژی د جڤاتێ دا خویا نابە. به‌رژه‌وه‌ندیێن که‌سایه‌تی هه‌ر تم ئینسانان به‌ر ب شه‌رمه‌زاریێ ڤه‌ دبه‌. هه‌رکه‌سێ ل هەمبه‌ر سیاسه‌تا پەکەکێ یا ل دژی به‌رژه‌وه‌ندیێن نه‌ته‌وەیی بێ ده‌نگ به‌، ئه‌و ب ئاوایه‌کی دبه‌ شریکێ سیاسه‌تا چه‌وت یا پەکەکێ.

پەکەکە بێبه‌ختیا ل گه‌له‌ک ئالیێن دن یێێن کوردا دکه‌. تشتا ڕاست نابێژه‌، ب مه‌ژیێ چه‌پێن ترکێن که‌مالیست ئێریشێ ته‌ڤگه‌را ئازادخوازا کوردستانێ دکه‌. هه‌تا کو کورد وه‌ک ئالیێن سیاسی، که‌سایه‌تی، ڕه‌وشه‌نبیر ، نڤیسکار و سیاسه‌تمه‌دار ڕاستیا پەکەکێ نه‌بینن و به‌هسێ نه‌کن، ئه‌وچ جارا نکارن ڕێیا ڕاست د سیاسه‌تێ دا‌ ب زه‌لالی ببینن.

نووچه‌/ئانالیز

ن. فرات