دڤێ ئێدی باش بھێتە دیتن و زانین کو ئیرۆ پرانیا پارتیێن مه یێن ل باکورێ کوردستانێ ل گۆر من چ ڕۆل و ئه‌رکا وان نه‌مایه. ژ به‌ر کو ئێدی نكارن موداخه‌له‌یی پێڤاژۆ و ڕۆژه‌ڤێ بکن. له‌ورا ژی کارێ وان مایه ژ بۆنا به‌رژه‌وه‌ندیا شه‌خسان…
ده‌رد و ئارمانجا پرانیا پارتیێن مه یێن ل باکورێ کوردستانێ ئیرۆ ژ کوردستانێ پتر، پاراستنا شه‌خسانە، ئانگۆ ڕێڤه‌برێن خوە دکن ڤێ ژی ل سه‌ر ناڤێ کوردستانێ دکن. ژ بلی ڤێ چ کارێن بکاربن ڕۆژه‌ڤا باکورێ کوردستانێ بگوهه‌رن ئان موداخه‌له بکن تنینە ئان نه‌ما یه.
چ ده‌ما پارتیه‌ک ب ئارمانجا ئازادی و سه‌رخوه‌بوونا وه‌لاتێ خوه ده‌رکه‌ت سه‌ر ڕێ و ب سه‌رنه‌که‌ت دڤێ یان خوه ھلوەشینە، ئانگۆ ژ قادا سیاسه‌تێ دوور بکه‌ڤە، یان ژی ڕێڤه‌بریا پارتیێ دەست ژ كار بەردە و سەرۆكاتیا پارتیێ بده جوان و خۆرتێن زیره‌ک و ژێهاتی.
هات دیتن و دھێتە زانین کو ئێدی سیاسه‌تا باکورێ کوردستانێ ب سالمه‌زنان نامه‌شا. ژ به‌ر ئه‌و ب خوه ژ هێز دا که‌تنه و نکارن ئێدی بێ گۆپال ب ڕێیه‌کێ دا هه‌رن. که‌سێن وه‌ها دێ چاوا پارتیه‌کا ژ بۆنا ئازادیا وه‌لاته‌کیدخەبتە بدن مه‌شاندن.
هوون دبینن، ئانكۆ تێ زانین، کو ئێدی هندەك پارتیێن ل باکورێ کوردستانێ بوونه وه‌که مالێ هندەك ژ وان سالمه‌زنان. ل سه‌ر ناڤێ پارتیێ په‌ران دخون و دكارن رێبازا ب سالان باوەری پێ ھەبوو ب ڕه‌حه‌تی ب پەران بفرۆشن. ئەو سالمەزن وێ پارتیێ وه‌که دکانا خوه ب کار تینن. لێ یا هه‌ری خه‌راب ژی ئێدی ئه‌ندام ژی فێری ڤێ یه‌کێ بوونه ئه‌و ژی ل هه‌مبه‌ر ڤێ بێده‌نگن.
چ ده‌ما ل وه‌لاته‌کی وه‌که کوردستانێ پارتی و رێكخستن بوونه ملێ شه‌خسان و ئەو كەسانە ژی ژ بۆنا به‌رژه‌وه‌ندیا خوه وێ ب کار بینه، ئاها وێ ده‌مێ ئێدی سیاسه‌تا نه‌ته‌وه‌یی مری یه. یان ژی ددن کوشتنێ.
ده‌ما سیاسه‌تا نه‌ته‌وه‌یی مر ئێدی هه‌می کار و خه‌باتێن پارتیان دبه ژ بۆنا به‌رژه‌وه‌ندیا هندەك که‌سان. پارتی ئێدی دکه‌ڤه بن کۆنترۆلا که‌سه‌کی کو ئه‌و ژی ل گۆر به‌رژه‌وه‌ندیا خوه وێ ب کار تینه.
مه گه‌له‌ک جاران گۆتیه و نڤیسییه کو ئێدی ل باکورێ کوردستانێ یه‌ک پارتی نکاره ب ته‌نا سه‌رێ خوه ڕۆژه‌ڤا کوردان ده‌ستنیشان بکه. له‌ورا دبن خزمه‌تکارێ یێن کو ڕۆژه‌ڤێ دیار دکن.
نابن یه‌ک ژ به‌ر کو ل باکورێ کوردستانێ ب پرانی که‌سێن مه ب نه‌خوه‌شیا سه‌رۆکاتیێ که‌تنه و نکارن ژ به‌ر به‌رژه‌وه‌ندیێن خوه یا شه‌خسی دەست ژ وێ به‌رده. له‌ورا ژی یەكگرتن و یەكرێزی نابه و هه‌تا ڕه‌وش ئه‌ڤ به دێ نه پێشکه‌تن ببه نه ژی وێ ئەڤ پارتیێن مه بکاربن تشته‌کی یان کاره‌کی باش بکن.
ئه‌ڤ ژی دده دیارکرن کو ڕوحیه‌تا نه‌ته‌وه‌یی ب وان سه‌رۆک و ڕێڤه‌برێن هندەك ژ وان پارتیان نه که‌ملی یه. ژ به‌ر ڤێ هه‌می کار و خزمه‌تا هندەك که‌سان ته‌نها دبه ژ بۆنا وان.
سه‌رۆک بارزانیێ نه‌مر چ گۆتبوو: ”ئه‌گه‌ر که‌س نه‌بووبن نه‌ته‌وی ئه‌و دکارن ڕۆژه‌کێ وه‌لاتێ خوه ژی بفرۆشن”.
ئیرۆ ل باکورێ کوردستانێ ئه‌م ڤێ دژین. ئه‌ڤ یه‌کا ژی بالا چ پارتیان ناکشینه. سه‌رۆک ژ بۆنا به‌رژه‌وه‌ندیا خوه پارتیێ دفرۆشه، ژ بۆنا خوه وێ ب کار تینه، لێ ئه‌ندام بێ ده‌نگن. هه‌تا کو سه‌رێ ده‌رزیێ نه‌گەهژه وان ده‌نگێن خوه ژ ڤێ ڕه‌وشێ ڕه ده‌رناخن
ئێدی دز و خوه‌دیێ مالێ ب هه‌ڤ حه‌سیانن ئه‌م و ئه‌و پارتی و رێخستن ژی دزاننن کو ئێدی چ مفایێ وان ژ بۆنا کوردستانه‌کا ئازاد و سه‌ربخوه نه‌مایه.
ب گۆتنه‌کا تال دڤێ ئەڤ پارتیێن مه یێن خوه‌دیێن سیاسه‌تمه‌دارێن ژ سالێن ۷۰ێ دا مانه، دڤێ دەست ژ كارێ خوە بەردن، ژ قادا سیاسه‌تێ ڤه‌کشن، دا کو پشتی ڤالاهیه‌کێ خۆرت و جوان ده‌ست پاڤێژن مه‌سه‌لێ.
جوان چقاسی بێ ته‌جروبه بن ژی وێ ژ سالمه‌زنان باشتر کار بکن. د ناڤا کارێن خوه دا وێ ببن خوه‌دی ته‌جروبه ژی.
لێ هه‌تا ئه‌ڤ سالمه‌زنێن مه کێمه‌ندامێن مه د سه‌رۆکاتیا پارتیان دا بن، نه دێ ئه‌و پارتی ب پێشڤه هه‌ره، نه ژی وێ بکاربن ڕۆژه‌ڤا گه‌لێ کورد ده‌ستنیشان بکن.
هه‌ر وه‌ها ئه‌ڤ دێ ژ وان ڕا ببه وه‌که گونه‌هکاریه‌کێ کو سبه‌رۆژێ هندەك دکارن ژ به‌ر ڤێ حه‌ساب ژ وان ب پرسین. هه‌ر که‌س به‌حسا نه‌بوونا جوانان د ناڤا پارتیان دا دکن. لێ که‌س ژی ناخوازە جهێ خوه ژ وان ڕا بهێلە…
ب ڕاستی ژی سیاسه‌تا باکورێ کوردستانێ ب ده‌ستێ ڤان سالمه‌زنێن مه ل باکورێ کوردستانێ قرێژ بوویه. ئێدی باوه‌ریا که‌سان ب که‌سان نایێ. پیڤان میڤان نه‌مایه. ده‌ستێ کێ د بەریکا کێ دایه ئێدی نه دیاره. به‌رژه‌وه‌ندیێن شه‌خسی ل پێش و یا نه‌ته‌وه‌یی ته‌نێ د گۆتنێ دا مایه.
ئه‌گه‌رئەڤ سالمه‌زنێن مه یێن د ڕێڤه‌بەریا پارتیان دا نه، دڤێ ڤی ئه‌رکێ خوه بدن جوانان و ئه‌و ژی وان ڕا ببن ئاقلمه‌ند، ببن شێورمه‌ند، لێ نه‌بن سه‌رۆک و ڕێڤه‌بر.
بووبێ ئه‌سه‌ر
2020.01.28
