تاریپەرێس چ جارا نەشێن چرایێن رۆناهیێ بتەمرینن
مخابن رۆژا، ٢٠٢٣/٦/٢٢ێ، ل چەمچەمال دەستێ تاریپەریسیێ گەهەشتە ڤی گەنجێ خودان شیان و هونەرمەند، ل رۆژا پری رۆناهی دابەر شێلکەکا گولێن تاریپەریسیێ. ئەڤ گەنجێ هونەرمەند و خودان شیان یێ دلێ وی تژی ژ ڤیانێ و دوستینیێ بۆ تەڤ مرۆڤان، هەتا بۆ وی کەسێ تاریپەرێس و کولتۆرپەرێسێ داگیرکەرا ژی.
هونەرمەند و نڤیسەر و دەرهێنەرێ شانۆیێ. خواناس وریا گلی، ل دەما دگەل هندەک هەڤالێن خوە ل ناڤ بازارێ چەمچەمال دا مژوولی کارێ خوە یێ دەرهێنەریێ دکر بۆ خوە بەرهەڤیکرنا پشکداریکرنا د ڤیستەڤالا شانۆیا قەزایێن کوردستانێ ئەوا وەزارەتا رەوشەنبیریا هەرێما کوردستانێ هەر سال ل مەها ئیلۆنێ دکەت و ئەڤ سالە ل چەمچەمال دێ هێتە کرن.
خواناس وریا خوەدی دیدەکا مرۆڤدوستی و عاشقێ کولتۆرێ خۆمالیێ کوردەواریێ بوو، ژبلی ڤیانێ و رێزگرتنا مرۆڤی تشتەکێ دن نەدزانی، هەرچەندە تاریپەرێس ئەڤرۆ ل کوردستانێ فرتە فرتا وانە و هەر رۆژ گەفان ل خوەدی هزرێن خۆمالیێن کولتۆرێ کوردی دکەن، دا ئەو کولتۆرێ بۆ مە ژ بیابانێ هاتی و ژبلی کوشتن و سەبیکرنا خانم و زەریێن مە پێڤە تشتەکێ دن دگەل خوە نەئیانیە، هەر بمینت.
بەلێ هشیاریا مرۆڤێ کورد د زێدەبوونێدایە و ئەو چرایێ مامۆستا عەبدلخالق مەعروفی (مامۆستا د سالا ١٩٨٥ ل هەولێرێ ب دەستێ تەرۆرستێن ئیسلامی هاتە شەهیدکرن) هەلکری ئەڤرۆ یێ گەشە و دێ یێ بەردەوام بیت هەتا وێ رۆژا بەیداخێ کولتۆرێ خۆمالیێ کوردەواریێ ل دلێ هەر کوردەکی دهێتە چاندن، کولتۆرێ بیابانێ و ئەنفال و سەبیکرنا زەری و خانمێن چاڤ بەلەکێن مە ببتە پشکەک ژ دیرۆکا زنجیرا کارەساتێن ب سەر گەلێ مە داهاتین، هەروەکو ئسپانیان د سەدێ پازدێ (١٤٩٢) دا ب سەرێ وان ئینای و هەوارا فیکتۆریا ل چیایێن مەژی دەنگ ڤەدەت و لاپەرێ کولتۆرێ بیابانێ بۆ هەتا هەتایێ بهێتە گرتن!
تاری ب هەموو هێزا خوە نەشێت رۆناهیا چران بتەمرینت، هزرێن تاریپەرێس و دژ مرۆڤ ژی نکارن گەشاتیا هزرێن مرۆڤدوستان بتەمرینن.
گۆرا تە ب گول و چرایێ تە هلکری ل دژی کولتۆرێ بیابان و داگیرکەران دێ هەمان چرایێ فیکتۆریا ئیسپانی بیت، هەر دێ مینیت گەش
محەمەد چەلکی
