دارا بیله‌ک
گه‌له‌ک جارا ل سه‌ر جوره‌یێن پەیوه‌ندیان نرخاندنێن جودا چێدبن. هه‌تا هنده‌ک ئالی ژ نرخاندنان زێده‌تر هنده‌ک پەیوه‌ندیان ڕه‌خنه دکن. د ناڤا ته‌ڤگه‌را کورد دا پەیوه‌ندی ژی خوه‌دی جهه‌ک به‌رفره‌هه و ل سه‌ر سیاسه‌تێ ڕۆله‌ک مه‌زن دله‌یزه. چه‌وا مرۆڤ سیاسه‌تا ڕۆژانه یان ژی هه‌لوه‌ستا هنده‌ک ئالیێن سیاسی گۆتوبێژ دکه ،جوره‌یێ پەیوه‌ندیان ژی تێنه گۆتوبیژ کرن.
ئه‌گه‌ر مرۆڤ ل دیرۆکا ته‌ڤگه‌را ئازادخوازا کوردستانێ بنه‌ره، دبینە دو جوره‌یێن پەیوه‌ندیان ده‌ردکه‌ڤن هۆلێ. پەیوه‌ندیێن ئا‌شکه‌ره یانی یێن شه‌فاف و پەیوه‌ندیێن ڤه‌شارتی و یێن تاری.
پەیوەندیێن زه‌لال هه‌ر ده‌می ل گۆرا هنده‌ک پره‌نسبان تێنه دانین و گه‌له‌ک جارا ئه‌ڤ پەیوه‌ندی ژی ده‌ما تێنه نرخاندن هنده‌ک ئالی هنده‌کا ڕه‌خنه دکن. ژ به‌ر کو ئه‌ڤ پەیوه‌ندی د مه‌دیایێ دا جهه‌ک به‌رفره‌ھ دگرن و کەنالێن ته‌له‌ڤزیۆنا دا تێنه شرۆڤه کرن ژی. مخابن د ناڤا هنده‌ک ئالیێن کو ل سه‌ر ناڤێ کوردا سیاسه‌تێ دکن، د ڕه‌خنه‌یێن خوه دا چ سنۆره‌کی ناسناکن، ڕه‌خنه‌یێن وان هێدی دکه‌ڤه واره‌ک ده‌ره‌و و بێبه‌ختیان دا. ل کوردستانێ ئالیێ هه‌ری زێده ڤێ یه‌کێ دکه پەكەكە و ده‌ردۆرا ڤێ ڕێخستنێ یه.
نها د ڕاستیا خوه دا هه‌رێما کوردستانێ، ل گۆرا ده‌ستورا ئیراقێ هه‌رێمه‌ک فه‌ده‌راله و پارله‌مناتۆیا وێ، سه‌رۆکاتیا هه‌رێمێ و حکومه‌تا هه‌رێما کوردستانێ هه‌یه. ئه‌ڤ ده‌زگه‌ھ هه‌موو ژی ب هلبژارتن چێدبن و ل گۆرا قانوونێن ھەرێمێ تنه ڕێڤه‌برن. ھه‌لبه‌ت مرۆڤ دکاره ئاوایێ ڕێڤه‌برنا ڤان ده‌زگه‌هان ڕه‌خنه بکه و ڕێیه‌ک باشتر بده پێشییا وان. لێ ده‌ما مرۆڤ وێ وه‌ک سیاسه‌ته‌ک کوردی یان ژی ئالیه‌ک کوردستانی وان قه‌بوول نه‌که و وان وه‌کی هه‌رێمه‌ک فه‌ده‌رال کوردستانێ نه‌بینه، هینگێ جوره‌یێ شرۆڤه‌کرنێ تێ گوهه‌رتن و تشتا تێ کرن دبه دژمناتیا ده‌ستکه‌فتیێن به‌شه‌ک کوردستانێ کو، باندۆرا خوه ل هه‌موو کوردێن جیهانێ كریە و دکه.
ژ ئالیه‌ک دن ڤه ده‌ما پەیوەندیێن هه‌رێما کوردستانێ ب ده‌وله‌تێن جیران ڕا (هه‌ر چقاس ئه‌م کورد وان وه‌ک ده‌وله‌تێن داگیرکه‌ر ب نا دکن ، ئه‌ڤ پرسه‌ک دنه) تێن دانین پەیوەندیێن زه‌لالن و د بن ئالا کوردستانێ دا هه‌ڤدیتن پێکتێن . گه‌ره‌ک هه‌ر کورده‌ک ب ڤێ یه‌کێ سه‌ربلندبه. ئه‌و ده‌وله‌تێن کو ئالا کوردستانێ وه‌ک پارچه‌یه‌ک قوماش ددان ناساندن و ئیرۆ د بن وێ ئالێ دا مەراسما بکن و جڤینا ب ده‌ستهلاتا هه‌رێما کوردستانێ ڕا بکن، ئه‌ڤ دبه جهێ شانازیا هه‌موو کوردێن نشتمانپه‌روه‌ر.
لێ که‌سه‌ک زێده به‌حسا پەیوەندیێن تاری یێن ڤه‌شارتی ناکه. د بنگه‌هێ خوه دا، سیخووری د ڤان پەیوه‌ندیان دا په‌یدا دبه و ئالیێن سیاسی د ڤان پەیوەندیێن ڤه‌شارتی و تاری دا دبن تاشه‌رۆنێن سیاسی.
گه‌ره‌ک ئالیێن سیاسی، نشتمانپه‌روه‌رێن کورد، ڕه‌وشه‌نبیر ، سیاسه‌تمه‌دار و هونەرمه‌ند، هه‌رکه‌سه‌ک کورد کو خوه کوردستانی دبینه، ده‌ستکه‌فتیێن باشوورێ کوردستانێ و ستاتویا وێ یا فه‌رمی و ناڤده‌وله‌تی ژ بۆ خوه وه‌ک ده‌ستکه‌فتیه‌ک نه‌ته‌وەیی ببینه. د ڤێ قۆناغێ دا جهێ کو ئالا کوردستانێ لێ بلد دبه ئه‌ڤ به‌شێ وه‌لاتێ مه‌یه. ده‌ما ئه‌م دبێژن، دڤێ ئه‌م کوردستانێ و ده‌ستکه‌فتیێن کوردستانێ وه‌ک بیبۆکا چاڤێ خوه بپارێزن دڤێ ئه‌م ژ دلێ خوه و بیروباوه‌ریا خوه یا نشتمانی ڤێ یه‌کێ بێژن. نابه ئه‌م تلیا خوه د بیبۆکا چاڤێ خوه ڕا بکن و خوه کۆر بکن.
ئێریشه‌ک مه‌زن ل سه‌ر ده‌ستکه‌فتیێن باشوورێ کوردستانێ هه‌یه. ئه‌ڤ ئێریش ژ ئالیێ ده‌وله‌تێن هه‌رێمێ ڤه تێنه کرن و هه‌روه‌ها ژ ئالیێ تاشه‌رۆنێن وان یێن کوردستانێ ڤه تێنه کرن. ئه‌رکا مه‌زن یا هه‌ر کورده‌کی ئه‌وه کو خاکا ئازاد یا کوردستانێ ل هەمبه‌ر هه‌موو جوره‌یێن ئێریشان بپارێزه.
گه‌له‌ک جارا هه‌زار تشت تێنه گۆتن لێ گه‌له‌ک ژێ نایێ فام کرن ، یان ژی هنده‌ک ناخوازن تێبگەهن. لێ جارنا ژی گۆتنه‌ک تێ کرن ب به‌رفره‌هی تێ فام کرن.
بێ گومان د ڤێ ده‌ربارێ دا گه‌له‌ک تشت هه‌نه کو مرۆڤ بێژه. لێ ئه‌گه‌ر ژ چار ڕێزا نه‌یێ فام کرن ،ب هه‌زار ڕووپه‌لان ژی نایێ فام کرن.
2021.01.31
