ئەحمەد تورک د هه‌ڤپه‌یڤینه‌کا خوه دا د گه‌ل ڕۆژناما دوڤار یا ترکی دبێژه: 7 ێ هه‌زیرانێ ده‌ما ده‌نگێن کوردا زێده بوو، ده‌ستهلات ترسیا و ئه‌ڤ یه‌ک بوو ده‌ستپێکا تێکچوونا پێڤاژۆیا ئاشتیێ.
ل جهه‌ک دن تورک دبێژە: ته‌جریتکرنا ئۆجالان ژ بۆ گه‌لێ کورد و گه‌لێن ترکیێ زه‌ره‌ره‌که. ئه‌گه‌ر ئۆجالان نه‌هاتبوویا ته‌جریت کرن نها ڕه‌وشا ده‌مۆکراسیا ترکیێ جودا بوویا.
گه‌له‌ک جارا تێ گۆتن کو، وه‌ک مله‌ت زاکیره‌یا کوردا زه‌عیفه. بوویه‌را زوو ژ بیر دکن. ژ به‌ری هه‌ر تشته‌کی دڤێ تورک و یێن وه‌ک وی دفکرن بلا بکاربن هنده‌ک تابویێن پککێ بشکینن و ڕاستیا هه‌یە ببینن. نابە ئه‌و که‌س ته‌نێ تشتێن ژ وان ره تێن نڤیساندن ژ ڕایا گشتی ره بخوینن. بلا بکاربن یا دلێ خوه دا بێژن. ئەحمەد تورک ژ هه‌ر که‌سه‌کی پێتر دزانە کو ، پرۆڤاکاسیۆنێن هاتین کرن، پێڤاژۆیا کو ئه‌و وه‌ک “پێڤاژۆیا چاره‌سه‌ریێ“ بناڤ دکن تێکبر. تورک بلا بکاربه به‌هسا سیاسه‌تا شەرێ خه‌نده‌کان و وێرانکرنا هنده‌ک باژارێن کوردستانێ بکه.
هه‌ر چقاس خه‌لک ده‌نگێ خوه بدن هدپێ ژی، لێ ئه‌ڤ یەك ڕاستیا هدپ/پککێ ناگوهه‌ره. ئه‌ڤ نایێ واته‌یا کو سیاسه‌ته‌ک ڕاست تێ ڕێڤه‌برن. دڤێ ڤێجا هنده‌ک که‌س یێن ڕاستیا پککێ دزانن و د جڤاتێن ته‌نگ ده ب نه‌هێنی سیاسه‌تا پکک/هدپێ ڕه‌خنه دکن و ل همبه‌ر ڕایا گشتی تشتێن دن دبێژن، ڕاستیێ ژ خه‌لکێ ره بێژن و ل خوه مکور وه‌رن. وه‌ک دن دێ هه‌تا هه‌تایێ که‌سایه‌ته‌ک و سیاسه‌ته‌ک ب زەلیلی ڕێڤه ببن. ده‌ردکه‌ڤن همبه‌ر خه‌لکێ درەوا دکن، نکارن ڕاستیێ ببێژن ژ هه‌موویێ گرنگتر نکارن تشتا کو ژێ باوه‌رن بێژن.
ئه‌ڤه ده‌مه‌که جاردن پکک/هدپ ب هێجه‌تا ته‌جریتا ئۆجالان ده‌ست ب گره‌ڤا برچبوونێ کریه. به‌ری هه‌رتشته‌کی قه‌ندیل ب خوه ئۆجالان ته‌جریت کریە و چ گرانی نه‌دان دیتنێن ئۆجالان و ل دژی داخوازیێن ئۆجالان حه‌ره‌که‌ت کرن.
هه‌رکه‌س دزانه کو جەمییل بایك و رێڤەبەریا نھا یا پككێ نە ب دلێ عەبدولا ئۆجالانە، بەری ھەیامەكی ئوجەلان داخواز ژ وان کر کو کۆنگره‌یه‌کێ چێبکن و ده‌سته‌یا ڕێڤه‌به‌ریێ بگوهه‌رن. ئۆجالان دڤیا کو د کۆنگره‌یێ ده بریارا ژ ده‌سبه‌ردانا شه‌رێ چه‌کداری بدن. لێ نه کۆنگره پێکهات و نه ژی گوه دان دیتنن و داخوازیێن ئۆجالان. ئۆجالان ڤه‌کری گۆت: بلا که‌سه‌ک من بکار نه‌ئینە. ماده‌م گوه نادن من ئه‌ز خوه ددم ئالیه‌کی.
د ناڤا هدپ/پککێ ده گه‌له‌ک که‌س هه‌نه کو باوه‌ریا وان ب خه‌ته‌ک نه‌ته‌وی کوردستانی دھێت. لێ مخابن هه‌تا ڤێ گاڤێ ژی نکارن ده‌نگێ خوه ده‌رێخن و د چ پلاتفۆرما دا سیاسه‌تا شاشا ل هەمبه‌ر کوردا دھێتە ڕێڤه‌برن، ڕه‌خنه بکن.
جه‌مل بایک د داخوویانیه‌کا خوه ده ئه‌شکه‌ره کر کو. پکک ناهلە ئه‌نیه‌ک ل دژی ئیرانێ بێ ئاڤاکرن. لێ مخابن ده‌نگ ژ که‌سه‌کی ده‌رنه‌که‌ت.
گه‌لۆ دێ چه‌وا مرۆڤ بکاربه ڕاستیا خوه ببینه و به‌هسا سیاسه‌ته‌ک دروست و که‌سایه‌تێن خوه‌دی شه‌خسیه‌ت بکه؟
نووچه/ئەنالیز
