جڤینا شاندەیا ئەنەكەسێ ل ئەنقەرەیێ و دەنگڤەدان
شاندەیا ئەجومەتا نشتمانیا كورد ل سوریێ (ئه‌نەکەسە) ل ئه‌نقه‌ره د گه‌ل وه‌زیرێ ده‌رڤه یێ ترکیێ مه‌ولوت چاوشۆگلو جڤیا.
ئه‌ڤه ده‌مه‌که ھێزێن سوریا دەمۆكراتیك (هەسەدە) د ده‌ربارێ ئاڤاكرنا یه‌کێتیه‌کێ د ناڤا ئالی و رێخستنێنا کوردێن ڕۆژاڤایێ کوردستانێ دا داخوویانیێن ئه‌رێنی دده. ئه‌نەکەسە ژی پشتی هنده‌ک هه‌ڤدیتنا د گه‌ل هەسەدێ هنده‌ک ل ده‌ڤه‌رێن ڕۆژاڤایێ کوردستانێ ژ نوو ڤه ئۆفیسێن خوه ڤه‌کرن. تێ زانین کو ئەمریکا د ناڤا هه‌ولدانه‌کێ دا یه کو، د ناڤا پارتیا یەكێتیاس دەمۆكراتیك (پەیەدە) و ئه‌نەکەسێ دا هه‌ڤکاریه‌ک چێ ببە و هه‌روه‌ها ئەمریکا دخوازه پەیەدە ژ سیاسه‌تا پارتیا كاركەرێن كوردستانێ (پەکەکە) دوور بکه‌ڤه.
ژ ئالیه‌ک دن ڤه هنده‌ک به‌رپرسێن هەسەدێ و ب تایبه‌تی فه‌رماندارێ گشتی مەزلوم عه‌بدی دده خوویاکرن کو ب تایبه‌تی نێچیرڤان بارزانی سەرۆكێ ھەرێما كوردستانێ ژ وی را گۆتیە كو ژ بۆنا ئاڤاكرنا یه‌کێتیه‌کێ د ناڤا کوردێن ڕۆژاڤایێ کوردستانێ دا دکاره ڕۆله‌ک به‌ربچاڤ بله‌یزه.
د ڤێ ده‌ما كوپرسا ئێدلبێ د ڕۆژه‌ڤا ترکیێ دا بوویە پرسەك سه‌ره‌که و هه‌روه‌ها گوهه‌رتنێن ل ڕۆژاڤایێ کوردستانێ چێدبن، هه‌ڤدیتنا د ناڤەبرا دەستھەلاتدارێن ترکیێ و ئه‌نەکەسێ دا دبه خوه‌دیێ گرینگیه‌ک تایبه‌ت.
ئالیێن وه‌ک پەکەکێ ڤێ هه‌لوه‌ستا ئه‌نەکەسێ ڕه‌خنه دکن. لێ تێ زانن کو، گه‌له‌ک جارا پەیەدێ و هەسەدێ ژی دانه خوویاکرن کو، ئه‌گه‌ر ترکیا بخوازه، ئه‌و ئاماده‌نه د گه‌ل ترکیێ هه‌ڤدیتنا بکن.
پێدڤیە مرۆڤ دو تشتا ژ هه‌ڤ ڤه‌قه‌تینه و جودا بكە، پەیوه‌ندی د گه‌ل وه‌لاته‌کی تشته‌که، ئه‌گه‌ر کورد سیاسه‌تێ بکن دڤێ د گه‌ل وه‌لاتێن جیران ژی دانوستاندنان بکن. نها ئه‌گه‌ر ئه‌نەکەسە ل گۆر داخوازیا ترکیێ پێ ل هه‌موو به‌رژه‌وه‌ندیێن ڕۆژاڤایێ کوردستانێ بکه و ته‌ڤبگه‌ره، بێ گومان ئه‌ڤ یه‌ک ب توندی تێ ڕه‌خنه‌کرن. لێ ئه‌گه‌ر ئه‌نەکەسە ژ بۆ پاراستنا به‌رژه‌وه‌ندیێن ڕۆژاڤایێ کوردستانێ د پەیوه‌ندیێن خوه دا د ناڤا ته‌ڤگه‌ره‌کێ دا به، نه مافێ که‌سه‌کیه وان رەخنە بکه.
د سیاسه‌تێ دا په‌یوه‌ندی تشته‌که و مرۆڤ ببه زلامێ ئالیه‌کی تشته‌ک دنه. ئه‌نەکەسە د ناڤا موخاله‌فه‌تا سوریێ دا یه و پەیوه‌ندیان ژی د گه‌ل ترکیێ چێ بكە. لێ ئه‌گه‌ر هنده‌ک که‌س د ناڤا ئه‌نەکەسێ دا زلامه‌تیا ترکیێ بکن ژی، ئه‌ڤ یه‌ک باندۆرێ ل سیاسه‌تا ئه‌نەکەسێ ناکه. ئالیگرێن پەکەکێ هه‌ر تشته‌کی ژ بۆ خوه مه‌شروع دبینن ،لێ ژ بۆ که‌سێن دن خراب دبینن.
پشتی هه‌ڤدیتنا شاندەیا ئه‌نەکەسێ، وه‌زیرێ ده‌رڤه یێ ترکیه، چاڤوشۆگلو د مالپەرا تویته‌را خوە دا نڤیسی:“ مه هه‌ڤدیتنه‌ک د گه‌ل نوونه‌رێ کوردا یێ مه‌شروع ل سوریێ ئه‌نەکەسێ پێکانی. مه دا خوویاکرن کو ئه‌م پشتگریا هه‌لوه‌ستا وان د ناڤا ئۆپۆزسیۆنا سوریێ دا و د ڤێ پێڤاژۆیا سیاسی دا ڕۆلێ دله‌یزن دکن. مه داخوویاکرن کو زه‌ره‌را هه‌ری مه‌زن پەکەکە/یەپەگە دده کوردا.
ئاشكەرایەل سەر ڤێ داخوویانیا چاڤوشۆگلو رەخنە ل ئه‌نەکەسێ تێ کرن. لێ ئه‌و که‌سێن ژ بۆ ڤێ یه‌کێ ئه‌نەکەسێ رەخنە دکن، ڕۆژانه د گه‌ل ڕژێما سوریێ و هه‌روه‌ها د گه‌ل ئیران و ڕژێما عیراقێ ژی د ناڤا پێوه‌ندیێن گه‌رم دا نه. ئه‌گه‌ر ترکیا ڕێ بدە وان دێ ب بازدەن و به‌رێ خوه بدن ئه‌نقه‌ره ژی. ئه‌گه‌ر هنده‌ک ئالیێن سیاسی یان ژی سیاسه‌تمه‌دار ڕه‌خنا ل هه‌لوه‌ستا ئه‌نەکەسێ بکن ژی، لێ ئەڤ نه فامێ پەکەکە و ده‌ردۆرا وێ یه کو، ئه‌نەکەسێ ڕه‌خنه بکه.
