حكومەتا كوردستانێ بەرسڤەك باش دا حەسەن نەسرولا
پەیڤدارێ حكومەتا كوردستانێ بەرسڤا حەسەن نەسرولا ددە و دبێژە:
گەلەك عەجیب و غەریب بوو ژ بۆ مە دەما مە دیتی تو ب دەنگەك لەرزی و وەكو زارۆكا دقیژینی و ھێرشێ دكەیە سەر ھەرێما كوردستانێ و رێبەرێ نەتەوەیەكێ. ئەڤە چەند سالا تە خوە ل ژێرزەمینان ڤەشارتیە و كونیێن مشكان ل تە بوونە قەیسەری و چەند سالە تە رەنگێ رۆژێ نەدیتیە و تو نوھا دھێی و سڤكاتیێ ب گەلەلەكێ مێرخاس دكەی.
ل شوونا وێ ھێرشا نەحەق و نە د جھێ خوە دا، حەق بو تە مافێن نەتەوەیەكا ژێردەست كو ئەڤ چەند سالە زۆلم و زۆرداری لێ دھێتە كرن پاراستبانا.
ئەو ھێزا پێشمەرگەیێ كوردستانێ بوو باژارێ ھەولێر و ھەموو كوردستان پاراستی نەخەلكەك دن بوو، تەڤی ڤێ ژی مە سپاسیا ھەموو وان ئالیان كر یێن كو ھەڤكاریا مە كری. لێ ئەو كەسێ كو قاشۆ نوونەرێ وە بوویە و د جڤینا دگەل سەرۆك بارازنی دا بەشدار بوویە، دڤێ ھەر ئەو كەس بە یێ كو دگەل ھەڤشێوەیێن خوە ل رۆژێن 16، 20 و 26ێ ئۆكتۆبەرا سالا 2017ێ ئارمانج و خەونا وان داگیركرنا كوردستانێ بوو، لێ ل ھەمبەری خوەراگری، بەرخوەدان و مێرخاسیا پێشمەرگەیێ كوردستانێ ب شەپرزەیی و سەرشۆری سەرێن خوە ل كەڤرا خستن و خەونا وان چو د گۆرێ دا.
تو كو ژ ترسا نەیارێن خوە نەوێری سەرێ خوە بلند بكەی، چما تو شەری ب ملەتەكی دفرۆشی كو چ پەیوەندی ب تەڤە نینە.
سەرۆك بارزانی رەمزا نەتەوەیەكێ یە و تو یێ ترسنوك گەلەك ژ وێ یەكێ بچووكتری وێ زماندرێژیێ بكەی.
