سیاسی

خوەپێشاندان و مەدیا پەكەكێ

ل باشوورێ کوردستانێ، ب تایبه‌تی ل ده‌ڤه‌را گه‌رمییان و هنده‌ک ناڤچه‌یێن دن یێن پارێزگەھا سلێمانیێ خوه‌پێشاندان تێنه‌ کرن، داخوازێن به‌شه‌ک ژ خوه‌پێشه‌نده‌ران ڕه‌وانە و ژ بۆ مافێن خوه‌ یێن هه‌ڤوه‌لاتیێ دۆزا ژیانه‌ک خوه‌شتر دكن. لێ د ڕاستیا خوه‌ دا ڕه‌وش جودا یه‌ و ئارمانجا بەشەك كو ب تێكدەر و تالانچێ تێن بناڤ كركن د ناڤا خوه‌پێشانده‌ران دا جودایه‌. یێن کو پرۆڤاکاسیۆنان دکن هه‌ڤالبه‌ندێن پەکەکێ نه‌ و پەکەکە ب خوه‌ یه‌ كو د بن پەردا داخوزێن ھەڤوەلاتیێن باشوورێ كوردستانێ ھەولا ژناڤبرنا كیانێ ھەرێما كوردستانێ دكە كو ئەڤ ژی ب پشتەڤانیا پاسدارێن ئیرانێ و حەشدا شەعبی ھاتیە پلان كرن.

ده‌ما مه‌دیا پەکەکێ باش بێ شۆپاندن ئه‌ڤ ڕاستی گەلەك ب زەلالی ده‌ردکه‌ڤه‌ هۆلێ كو ئه‌ڤ هه‌لوه‌ستا فەرمیا پەکەکێ یە و به‌شه‌ک ژ ستراته‌ژیا وێ یه‌. د بنگه‌هێ خوه‌ دا، ب رێیا ڤان خوەپێشاندانان پەکەکە شه‌رێ پەدەکێ دکه‌. ئاڤاهیێن پەدەکێ دشه‌وتینە، ئێریشێ ئاڤاهیێن حکومه‌تێ دکن و پێشمه‌رگه‌یا شه‌هد دکن.
ده‌ڤه‌رێن کو خوه‌پێشاندان لێ تێن کرن د بن باندۆرا یەنەکێ دا‌نه‌ و پەکەکە ل ڤان ده‌ڤه‌ران ب هێزه‌. ئه‌ڤ ته‌ڤگه‌را کو پەکەکە دکه‌، تشته‌کی ب ته‌نێ دکه‌ ئارمانج. ئارمانجا پەکەکێ تێکدانا ستاتویا باشوورێ کوردستانێ یه‌. هه‌رکه‌سه‌کێ دزانه‌ نها گه‌له‌ک ئالیێن شیعه‌ ل ئیراقێ دخوازن ستاتویا کوردستانێ یا فه‌ده‌رالی نه‌مینه‌ و هه‌ولێر،سلێمانی و دهۆک جاردن ببن وه‌ک پارێزگه‌هێن دن یێن ئیراقێ و ب ته‌مامی بکه‌ڤن د بن باندۆرا حکومه‌تا ئیراقێ دا‌. ئه‌ڤ ئارمانجه‌ک سه‌ره‌که‌ یا ئیرانێ و چه‌ته‌یێن حه‌شدا شهع‌بینه‌. پەکەکە ژی خزمه‌تا ڤێ سیاسه‌تا قرێژ یا کو دخوازه‌ ستاتویا کوردستانێ تێک ببه‌ دکه‌.
خوه‌پێشانده‌رێن ئالا کوردستانێ بینن خوار و ئالا ئیراقێ بلند دکن کینه‌؟ چنه‌ و ئارمانجا وان چییه‌؟

لێ پەکەکە ڤێ یه‌کێ گه‌له‌ک ب زانه‌بوون دکه‌ و هه‌روه‌ها ڤێ چالاکیا خوه‌ یا د خزمه‌تا دژمنێن کوردستانێ دا، وه‌ک ” گه‌ل پێھنەكێ ل پدکێ دده‌” دده‌ نیشاندان و پرۆپاگانده‌یا ڤێ د مه‌دیا خوه‌ ده‌ دکه‌. ل ڤێ ده‌رێ خاله‌ک گرنگ هه‌یه‌ و به‌رپرسیاریه‌ک مه‌زن دکه‌ڤه‌ ل سه‌ر ملێ مه‌دیا باشوورێ کوردستانێ. تێ زانین کو به‌شه‌ک مه‌دیا باشوور پشته‌ڤانیا پەکەکێ دکه‌، د بنگه‌هێ خوه‌ دا ئه‌و مه‌دیا پشتگریا هه‌ر تشته‌ک ل دژێ پەدەکێ به‌ دکه‌، ‌ کو پرانی ئەو مەدیا وه‌ک نێزیکی پەدەكێ تێ ناسكرن.

گه‌لۆ ما نه‌ ئه‌رکێ ڤێ مه‌دیایێ یه‌ ڕاستیا بوویه‌ران بگەهینه‌ ڕایا گشتی یا کوردستانێ؟ ئه‌ڤ مه‌دیا ژ هه‌رکه‌سه‌کی پتر دزانە کو د ناڤا خوه‌پێشه‌نداران ده‌ سیخرۆ و ئاژانێن پەكەكێ هه‌نه‌ و ئه‌و ب زانه‌بوون پراڤاکاسیۆنا دکن و به‌رێ خوه‌پێشاندەران ددن ده‌زگه‌هێن حکومه‌تا کوردستانێ و هنده‌ک ئالیێن سیاسی.
پێویستە ەڤ دەستێ پەكەكێ ژ ئالیێ مه‌دیایێ ڤه‌ بێته‌ ئاشکه‌ره‌ کرن. دبە هنده‌ک بێژن کو ئه‌ڤ کارێ ئاساییشێ یه‌ نه‌ کارێ مەدیایێ یه‌. نه‌خێر ئه‌ڤ کارێ مه‌دیایێ یه‌، هه‌تا دڤێ د ڤان ده‌ڤه‌ران دا به‌هسا خه‌مساریا ئاساییشێ ژی بکن و ڕاستیا بوویه‌ران ده‌رێخن هۆلێ.

د خاله‌ک دن دا دڤێ بالا مه‌دیا باشوور بێ کشاندن كو هه‌ر نووچه‌یا کو ھوون د ده‌ربارێ هەدەپێ، کەنەکێ، پەیەدێ، کەجەکێ و ده‌زگه‌ه و ڕێخستنێن ب پەکەکێ ڤه‌ گرێدایی ددن،هوون دبن سه‌ده‌ما ھاریكاریكرنا پەكەكێ ل باشوورێ کوردستانێ. زانه‌بوون ، نه‌ زانه‌بوون هون “دوهنی ل نانێ پەکەکێ ددن”. مه‌دیا پەکەکێ گه‌له‌ک زانه‌بوون د ده‌ربارێ ڕه‌وشا باشوورێ کوردستانێ دا‌ زانیاریێن نەراست دده‌، نووچه‌یێن ده‌ره‌و به‌لاڤ دکه‌. گه‌لۆ نه‌ ئه‌رکێ مه‌دیا باشووره‌ کو ڤان ده‌ره‌وان ئا‌شکه‌ره‌ بکه‌؟ لێ مخابن ئه‌ڤ نایێ کرن. وه‌ک دبێژن هندی مه‌ به‌هسا ڤێ مژارێ کر “موو ب زمانێ مه‌ ڤه‌ هاتن”.

2020.12.10
نووچه‌/ئانالیز

Back to top button