ل کوردستانا ڕۆژاڤا ڕه‌وشه‌ک گه‌له‌ک نه‌خوه‌ش هه‌یه و د ئێریشا ترکیێ دا گه‌له‌ک خه‌لکێ سڤیل، ژن و زارۆک ژی د ناڤ دا بوونه قوربانی. هه‌ردو ئالیێن سنۆر کوردن. ل قامیشلۆ ژی کورد تێنه کوشتن ، ل نسێبینێ ژی یێن تێنه کوشتن جاردن کوردن. هه‌ردو ئالیان دا ژی خه‌لکێ سڤیل یێن ژیانا خوه ژ ده‌ست ددن و ژ مال و وارێن خوه کۆچبه‌ر دبن جاردن کوردن. چ تشته‌ک ڤێ ڕاستیێ ناگوهه‌ره. ته‌نێ راوەستانا شه‌ر دکاره ببه چاره‌سه‌ریه‌ک کو برینێن هاتن ڤه‌کرن ب ئاوایه‌کی ده‌رمان ببن.
ئه‌ڤه ده‌مه‌ک درێژبوو ترکیا ئاماده‌بوونا ڤێ ئێریشێ دکر. هه‌رکه‌سه‌کی دزانی کو ، دێ ترکیه ئێریشێ ڕۆژاڤایێ کوردستانێ بکه. د ئه‌نجام دا پشتگریا ڕوسیا و ڕێدانا ئه‌مریکایێ ئه‌ڤ ئێریش هاته کرن. کورد جاردن که‌تن د ناڤا ئاگره‌کی دا و قوربانی دان.
د دیرۆکێ دا ئه‌مریکا و ڕوسیا دو جارا ل ڕۆژهلاتا ناڤین لهه‌ڤ کرنه. هه‌ردو جارا ژی ئه‌ڤ لهه‌ڤهاتن ل سه‌ر هه‌سابێ کوردا هاتیه کرن. سالا ۱۹۷٥ێ ب په‌یمانا خیانه‌تێ یا جه‌زایر و نها ژی ل سه‌ر ئێریشا ترکیێ یا ڕۆژاڤایێ کوردستانێ.
بێ گومان هنده‌ک ڕه‌وش و بوویه‌رێن ل سه‌ر عه‌ردی چێدبن هزر و دیتنان ژی دگوهه‌رن. هه‌تا نها پەیەدێ به‌حسا کوردستانێ نەدکر و هه‌ر د گۆتارێن خوه دا دگۆت ڕۆژاڤا. ژ خوه پێڤه‌تر ڕێ نه‌دان ئالیه‌ک دن کو ببن شریکێ ده‌ستهلاتێ ل کوردستانا ڕۆژاڤا. لێ پشتی ڤێ ئێریشا ترکیا گۆتن و داخوویانیێن پەیەدێ هاتن گوهه‌رتن. بەحسا کوردستانێ دکە و گه‌له‌ک جها ب ئالا کوردستانێ و سه‌مبۆلێن پەیەدێ ئه‌ڤ ئێریش هاتنه پرۆته‌ستۆ کرن. هه‌ر چقاس نه ته‌مامی بە ژی مرۆڤ دخوازه باوه‌ر بکه کو، پەیەدە ل سیاسه‌ته‌ک کوردستانی ڤه‌دگه‌ره. ئه‌گه‌ر ئه‌ڤ یه‌ک چێببه دبه ده‌ستکه‌فتنه‌ک گەلەک مه‌زن.
نها ئه‌و ڕۆژه کو، پەیەدە ته‌ڤی هه‌موو دام و ده‌زگه‌هێن پێڤه گرێدایی، ل سه‌ر پره‌نسپێن په‌یمانا هه‌ولێر بانگ ل هێز و ئالیێن دن بکه. بانگ ل ئه‌نەکەسێ و پێشمه‌رگه‌یێن ڕۆژ بکە. هێزه‌ک هه‌ڤبه‌ش کوردستانی ل ڕۆژاڤایێ کوردستانێ بێ ئاڤا کرن.
سیاسه‌تا ئه‌مریکا نه سیاسه‌ته‌ک ب ئیستیقراره، ل گۆر به‌رژه‌وه‌ندیێن ڕۆژانه دکاره بێ گوهه‌رتن. ئه‌مریکا شه‌رێ ل دژێ داعیشێ سه‌ر هه‌موو تشته‌کیره دگره. لێ ڤێ جارێ ڕێ دا کو جاردن داعیش ل هه‌رێمێ شوونڤه ڤه‌گه‌ره، ۱۲ هه‌زار چه‌کدارێن دائعیشێ گرتیێن هەسەدێ نه. ده‌ما شه‌ر به‌رده‌وام به هەسەدە نکاره ڤان گرتیان بپارێزه. دێ هنگه جاردن داعیش ببه ته‌هدیدا هه‌ری مه‌زن ل سه‌ر مرۆڤاتیێ.
ژ دنیایێ را ئاه‌شکه‌ره بوویه کو، هێزا داعیشێ ژ ئالیێ کوردان ڤه هاته تێکبرن، شه‌رێ د دژێ داعیشێ دا کوردا نه ته‌نێ داعیش تێکبرن، جیهان ژی ژ فه‌لاکه‌ته‌ک مرۆڤاتی خلاس کرن. لێ مخابن ئه‌ڤ یه‌ک نه‌هات دیتن.
دوهی ل باشوورێ کوردستانێ، ئیرۆ ل ڕۆژاڤایێ کوردستانێ ژ بلی فرانسا خیانه‌ت ل کوردا هاته کرن. ئسپات بوو کو کورد دکارن خوه و ئاخا خوه ل همبه‌ر داعیشێ بپارێزن، لێ هێدی نکارن دنیایێ، ئه‌مریکا و ئه‌ورۆپا بپارێزن. ۱۲ هه‌زار داعیشێ د گریتگه‌هان دا دکاره جاردن ببه ته‌هدیدا هه‌ری مه‌زن.
پێدڤیە ئێدی ل ڕۆژاڤا ئیدارا خوه‌سه‌ر خوه وه‌ک ئیداره‌یه‌ک کوردستانی بده ناسکرن و ڤێ پشتگریا هه‌موو کوردا ژ بۆ ڕۆژاڤایێ کوردستانێ ب واته‌یه‌ک نه‌ته‌وی و کوردستانی بنرخینه و ڕێیا کو کورد هه‌موو ل سه‌ر خه‌ته‌ک نه‌ته‌وەیی یه‌کتیه‌ک کوردستانێ پێکبینن ڤه‌کن.
