سه‌رۆکێ هه‌رێما کوردستانێ دەربارێ کامپانیایا هلبژارتنان دا داخواز ژ هه‌می ئالیان کر کو، ڕێنمایێن حکومه‌تا هه‌رێما کوردستانێ پێکبینن و کامپانیایه‌کا شارستانی بکن. ته‌که‌ز ژی کر کو، کامپانیایا هلبژارتنان نه‌به ببە سه‌ده‌ما ئالۆزی، پارڤه‌بوون، بێزارکرنا جڤاکێ و تێکدانا ته‌ناهیا وه‌لاتیان.
سه‌رۆکێ هه‌رێما کوردستانێ نێچیرڤان بارزانی، په‌یامه‌ک ل سه‌ر ده‌ستپێکرنا کامپانیایا هلبژارتنان وه‌شاند.
نێچیرڤان بارزانی د پەیاما خوە دا دبێژە: “ کامپانیایا گه‌را شه‌شێ یا هلبژارتنێن پەرلامه‌نتۆیا ئیراقێ ده‌ست پێ دکه، ئه‌ز داخوازێ ژ هه‌موو ئالیان دکم کو ڕێنمایێن کۆمیسیۆنێ بجهبینن و کامپانیایه‌کا شارستانی بکن، کو ڕه‌نگڤه‌دانا پێکڤه‌ژیان، هه‌ڤپه‌ژراندن و پڕه‌نگییا پێکهاتەیێن کوردستانێ به و بانگەشەیا هلبژارتنان نه‌به سه‌ده‌ما ئالۆزی، پارڤه‌بوون و بێزارکرنا جڤاکێ و تێکدانا ته‌ناهیا وه‌لاتیان.”
سه‌رۆکێ هه‌رێما کوردستانێ ته‌که‌ز ژی کر: “بلا هه‌ر که‌س د بانگه‌شه‌کرنێ دا ژ بۆ سیاسه‌ت، ئاراسته و کارنامه‌یا خوه ئازاد به، لێ نابه چ که‌سه‌ک که‌رب و کینێ به‌لاڤ بکه. دڤێ خه‌لکێ کوردستانێ وه‌کی جڤاکه‌ک شارستانی د ڤێ پێڤاژۆیێ دا هه‌ڤرکییه‌کا شارستانی بکن.”
نێچیرڤان بارزانی د پەیاما خوە دا بەحسا بەربژێرن ژن ژی دکە: “بەربژێربوونا ژنان پر گرینگ و ببها یه. دڤێ ناڤ، مه‌قام و ڕوومه‌تا وان پاراستی بن.”
ناڤبری هه‌روه‌سا ڕاگهاند، “دڤێ ڕێز ل سه‌مبۆل و پیرۆزیێن هه‌می پێکهاتەیان بێ گرتن، و دڤێ هێزێن ئه‌وله‌هیێ ژی ئه‌رکێ خوه یێ پاراستنا هه‌ر که‌سی ب ئاوایه‌کی پرۆفه‌سیۆنه‌ل و بێ جوداهی بجهبینن.”
سه‌رۆکێ هه‌رێما کوردستانێ د په‌یاما خوه ده ئه‌شکه‌ره ژی کرغ “ل داویێ، هه‌موو که‌سێن کو ژ هه‌رێما کوردستانێ دچن ئه‌نجوومه‌نا نوونه‌رێن ئیراقێ، ئارمانجا وان خزمه‌تکرنا خه‌لکێ کوردستانێ و ئیراقێ یه. دڤێ ئه‌و بزانبن کو ب یه‌کرێزی، ته‌بایی و هه‌ڤگرتنێ دکارن باشتر خزمه‌تا نها و پاشه‌رۆژا هه‌رێما کوردستانێ و ئیراقێ بکن و ماف، ده‌ستکه‌فتی و به‌رژه‌وه‌ندیێن وان بپارێزن.”
نێچیرڤان بارزانی د په‌یاما خوه دا، هه‌روه‌سا ته‌که‌ز ل سه‌ر وێ یه‌کێ ژی کر کو، دڤێ نامزه‌ت د کامپانیایێ دا تشته‌کی وسا ل دژی هه‌ڤ نه‌کن کو سبه نه‌کارن ب هه‌ڤ را بخه‌بتن.
سه‌رۆکێ هه‌رێما کوردستانێ ل داویا په‌یاما خوه دا ژ هه‌موو ئالیان را کامپانیایه‌ک ئارام و سه‌رکه‌فتی ژ بۆ هه‌موو ئالیان و ته‌ناهی و سه‌رفرازی و پێشکه‌فتنێن به‌رده‌وام ژ بۆ هه‌رێما کوردستانێ و ئیراقێ خواستن.
وەکە تێ زانین ل رۆژا ٣\١٠\٢٠٢٥ێ بانگەشەیا هلبژارتنێن پەرلەمەنتۆیا ئیراقێ دەست پێ کرن و بریاره هلبژارتنێن گشتی یێن ئه‌نجوومه‌نا نوونه‌رێن ئیراقێ دێ ل ڕۆژا ١١\١١\٢٠٢٥ێ بێن لدارخستن.
