به‌رهه‌م سالح سه‌رۆککۆمارێ ئیراقێ و ئه‌ندامێ سه‌رکردایه‌تیا یەکێتیا نشتمانیا کوردستانێ (یه‌نه‌کێ)، ژ بۆنا بفه‌رمیکرنا چه‌کدار و میلیشیایێن په‌که‌کێ د ناڤا ره‌فێن حه‌شدا شه‌عبی دا، که‌تییه د ناڤا هه‌ولێن مه‌زن دا، د چارچۆڤەیا هەولێن خوە دا، جڤینه‌ک دگه‌ل شاندێ په‌که‌کێ ئه‌نجام دایه.
ڕۆژا یه‌کشه‌مێ یا بۆری، ۱۹ هزیرانا ۲۰۲۲، شانده‌ک ب ناڤێ شنگالێ کو پرانی ژێ کادرۆ و رێخستنێن په‌که‌کێ بوون، ل کۆچکا سه‌لام ژ لایێ به‌رهه‌م سالح ڤه هاتن پێشوازی کرن.
شاندەیا په‌که‌کێ یێن کو خوە وەک نوونەرێن خەلکێ شنگالێ ب ناڤ کریە و دگه‌ل به‌رهه‌م سالح دا جڤیانه، ئه‌ڤه‌نه:
عومه‌ر سالح ئیبراهیم، سه‌رۆکێ پارتییا ئازادی و ده‌مۆکراسی یا ئێزدی
ده‌خیل مراد حه‌سه‌ن، پارتییا ئازادی و ده‌مۆکراسی یا ئێزدی
ئینعام ئلیاس حه‌سه‌ن، پارتییا ئازادی و ده‌مۆکراسی یا ئێزدی
فه‌هه‌د حامد عومه‌ر، راسپاردی ژ بۆی بریڤه‌برنا قایمه‌قامییا شه‌نگالێ
خودێدا جۆکی حسێن، ڕاسپاردی ژ بۆ برێڤه‌برنا ناحیا سنوونێ
حسێن حه‌جی نه‌بسۆ، سه‌رۆکێ کۆما ڕێڤه‌به‌رییا خوه‌سه‌ر
به‌رهه‌م سالح ژی د جڤینێ دا، ئه‌ڤ کادرێن په‌که‌کێ وه‌که نوونه‌رێن شه‌نگالێ پێشوازی کرنە، شاندەیا په‌که‌کێ ژ به‌رهه‌م سالح خوا‌ست کو چه‌کدارێن په‌که‌کێ د ناڤا ره‌فێن حه‌شدا شه‌عبی دا بهێن فه‌رمی کرن، به‌رهه‌م سالح ژی سۆز ب وان داییه کە ژ بۆنا ڤێ ئارمانجێ ئالیکاریێ بکه.
به‌رهه‌م سالح ژ بۆ کو چه‌کدارێن په‌که‌کێ ب فه‌رمی ته‌ڤلی ره‌فێن حه‌شدا شه‌عبی ببن، جڤینه‌ک ژ بۆ وان دگه‌ل قه‌یس خه‌زعه‌لی ڕێکخست و ل سه‌ر داخوازییا به‌رهه‌م سالح، قه‌یس خه‌زعه‌لی ڕۆژا سێشه‌می ٢٠٢٢/٦/٢١ دگه‌ل شاندەیا په‌که‌کێ جڤیا.
خه‌زعه‌لی ل ئۆفیسا خوه یا ل به‌غدایێ پێشوازیا شاندەیێ په‌که‌کێ کر، داوود جوندی به‌رپرسێ ناڤه‌ندا رێخستنێن یه‌نه‌کێ ل شنگالێ سه‌رۆکاتییا شاندەیێ کر.
شاندەیێ پەکەکێ ژ خه‌زعه‌لی را گۆت: “ئەم دخوازین هوون هێزه‌کا حه‌شدا شه‌عبی بشینن شنگالێ ژ بۆ کو شنگال پاراستی به”، خه‌زعه‌لی ئه‌ڤ داخوازییا وان وه‌رگرت و سۆز ب وان دا کو ئالیکارێ وان بکه و هه‌ول بده حه‌شدا شه‌عبی ل شنگالێ ب جیهـ بکە.
هه‌ولێن به‌رهه‌م سالح یێن مه‌شرووعکرنا هێزێن په‌که‌کێ د شنگالێ دا و هه‌ولێن چێکرنا شریکاتییه‌کا نوو دناڤبه‌را یه‌نه‌کێ و په‌که‌کێ دا ل وێ ده‌رێ، به‌ریا کو مانۆره‌ک سیاسی به ل دژی گه‌ل و نوونه‌رێن ره‌سه‌ن یێن شنگالێ یە، ب فیتا ئیرانێ و چارچووڤه‌یا هه‌ماهه‌نگیێ یا شیعەیا هاتییه کرن، ژ به‌ر کو به‌رهه‌م باش دزانه، یێن کو شنگالییان وه‌که نوونه‌رێن خوه د هلبژارتنا داوین یا پەرلەمه‌نتۆیا ئیراقێ دا هلبژارتین، نامزه‌دێن کیژان پارتییا کوردستانی بوون، هه‌ر وها باش دزانه گه‌لێ ره‌سه‌نێ شنگالێ ب چو ئاوایی نامه‌زدێن په‌که‌کێ، حه‌شدا شه‌عبی و هه‌روها یێن پارتییا به‌رهه‌م سزا دان، لوما ته‌ڤگه‌را به‌رهه‌م سالح و ئه‌رک و کارێن وی یێن نه‌سالح چ باندۆرا خوه ل شنگالێ ناکه.
دارکامازی
