داخوازێن ئاک پارتیێ ژ ئیمرالیێ و هەلوەستا هەدەپێ
ل ترکیێ ئاک پارتی، پارتیا دەستهلاتدار، ژ بۆنا کو ده‌نگێن هەدەپێ ژ بۆ جەهەپێ و تفاقا مله‌ت نەچن، ده‌ست ب هه‌ولدانێن خوه دکه.
وه‌ک دهێتە زانین ئه‌ڤه ده‌مه‌ک بوو ب نهێنی هه‌ڤدیتن د ناڤبه‌را هنده‌ک به‌رپرسێن ئاک پارتیێ و ئیمرالیێ دا چێدبوون. نها ژی هێدی هێدی حکومەت ده‌رگەهێ ئیمرالیێ ڤه‌دکە و دێ رێ بدن کو مالباتا ئۆجەلان سەردانا عەبدولا ئۆجەلان ل ئیمرالییێ بکن. هه‌روه‌ها تێ گۆتن کو دەستپێکێ دێ برایێ ئۆجەلان و برازیێ وی کو پارله‌مه‌نته‌رێ هەدەپێ یه، دێ هه‌رن ئیمرالی ئۆجەلان ببینن و ده‌رگەهێ هه‌ڤدیتنا ڤه‌کن.
وه‌ک تێ زانین ئه‌ڤه ده‌مه‌ک درێژه پەکەکە، ب تایبه‌تی ل ئه‌ورۆپایێ ژ بۆ “ئازادی”یا ئۆجەلان چالاکیان دکه. پەکەکە نها ژ هه‌ر ده‌می پتر به‌رێ خوه دایه ئۆجەلان. نها پەکەکە، کەجەکە و هەەدپە و هه‌موو ئالیێن گرێدایی پەکەکێ پرسا ئۆجەلان کرنه پرسا سەرەکی د رۆژه‌ڤێ دا.
سەلاحەدین ده‌مرتاش کو، وه‌ک به‌دیلێ ئۆجەلان ددان نیشاندان، وی ب خوه ژی هه‌وارا خوه گەهاند ئۆجەلان. ده‌مرتاش جاردن دخوازه ببه به‌ربژێرێ سه‌رۆککۆماریێ، ژ بۆ ڤێ یه‌کێ ژی دخوازه ئۆجەلان رێ بدە وی و بەربژێریا وی ئەرێ بکە. لێ گه‌لۆ ئه‌ڤ یه‌ک چه‌وه چێدبه ناهێتە زانین. دلێ ئۆجەلان ژ هەدەپێ و تایبه‌تی ژ ده‌مرتاش مایه. گه‌له‌ک ژ جەماوەرێ هەدەپێ ڤه‌کری ددن خوویاکرن کو، “تشتا ده‌مرتاش بێژه ئه‌وه، رۆلێ ئۆجالان نه‌مایه”. بێ گومان ئه‌ڤ گۆتن هەر هوسا و بێ سەبەب د ناڤا بنگه‌هێ هەدەپێ دا ناهێتە گۆتن. که‌سێن نێزکی ئۆجەلان ژ ڤان گۆتنان عاجزن و دلمایینا خوه ئاشکه‌ره ددن خوویاکرن.
بریارا هەدەپێ یا هلبژارتنێن شه‌ره‌داریا دا وه‌ک میناک نیشانددن و دبێژن ده‌مرتاش و هه‌ڤالێن وی نه‌هشتن گۆتنا ئۆجالان جبجی ببه (د پرسا هلبژاتنێن شارەداریا دا، ئۆجەلان دخوەست هەدەپێ دەن بەربژێرێن ئاک پرتیێ بدە، لێ دەمرتاش و هەڤالێن خوە ب گۆتنا ئۆجەلان نەکر و دەنگ ب بەربژێری جەهرپێ دا). گەلۆ بایێ سیاسه‌تا پەکەکێ ژ کیژان ئالیێ ڤه تێ، ناهێتە زانین، ئه‌و نە خوه‌دی پره‌نسیبێن سیاسی نە، هه‌رده‌می دکارن تشتا ژ وان را باش به بکن.
نها چاڤێن هه‌رکه‌سه‌کی ل سەر هه‌ڤدیتنێن ل ئیمرالیێ نە. ئه‌ردۆگان ڤالا حه‌سابا ل سه‌ر ئۆجەلان ناکه. د پرسا پێوه‌ندیێن دگه‌ل ئۆجەلان دا ئاک پارتی دزانه چ دکه.
پەرسیا گرنگ ل ڤێرە ئەڤەیە: گه‌لۆ ئه‌گه‌ر ئۆجەلان ل گۆرا پرۆژه‌یا ئاک پارتیێ دیتنا خوه دیار کر و جارەکادی خوەست کو دەنگدەرێن هەدەپێ دەن ب ئاک پارتیێ بدن، دێ هەلوەستا هەدەپێ چ بە؟ هەدەپێ هەموو درووشم و سلۆگانێن خوە، هه‌رتشتێ خوە ل سه‌ر بنگەهێ دژاتیا ئه‌ردۆگان و ئاک پارتیێ ئاڤاکرینە و د ڤی واری دا پرۆپاگانده‌یان دکە، دێ چەوا ژێ ڤه‌گه‌رن؟ لێ ژ بۆ وان ڤه‌گه‌را ژ سیاسه‌ته‌کێ نه گه‌له‌ک گرنگه، ئه‌و چ بێژن چو جارا نایێ موحاسه‌به‌کرن، خه‌لکه‌ک وه‌ک په‌زش مێشین ل دووڤ وان دچه.
لێ تشتا کو دیارە، ئەو سیاسه‌تا کو هەدەپێ دێ د هلبژارتنان دا برێڤه ببه و هه‌لوه‌ستا ئۆجەلان ،دێ ببه سه‌ده‌مه‌ک بنگه‌هین یا گۆتوبێژان د ناڤا پەکەکە/هەدەپێ دا.
