داخوازێن ئەنەكەسێ ژ ئەمریكایێ
پشتی سه‌ردانا شاندەیا ئۆفیسا پێوه‌ندیێن ده‌رڤه یا ئه‌نجومه‌نا نشتمانی یا کوردی ل سووریێ (ئه‌نەکەسە) بۆ مۆسکو، بریاره شاندەیا ئه‌نەکەسێ د چه‌ند ڕۆژێن بھێت دا سه‌ردانا ئەمریکایێ و چەند وه‌لاتێن ئه‌ورۆپایێ ژی بکه. به‌رپرسێ ئۆفیسا پێوه‌ندیێن ده‌رڤه یێ ئه‌نەکەسێ، دبێژە کو ئەو دێ چه‌ند مژارێن گرنگ وەكە؛ ناڤچه‌یا ئارام، کۆمیته‌یا ده‌ستووری و هه‌روها پاشه‌رۆژا پێشمه‌رگه‌یێن ڕۆژاڤایێ کوردستانێ، دگەل ئەمریكا و وەلاتێن ئەورۆپایێ گۆتوبێژ بكن:
- ئارمانج ژ ڤێ سه‌ردانێ ئه‌وه کو شاندا ناڤبۆری، هه‌ژماره‌ک ژ مژارێن گرێدایی ڕه‌وشا سووریێ ب گشتی و ڕه‌وشا کوردێن ڕۆژاڤایێ کوردستانێ ب تایبه‌تی، هه‌روها ناڤچه‌یا ئارام و دامه‌زراندنا کۆمیته‌یا ده‌ستوورێ و سه‌پاندنا مافێن کوردان د ده‌ستوورا نوو دا، هه‌روها ڕۆلا له‌شکه‌رێن ڕۆژ گۆتووبێژ بکه.
ده‌ربارێ کارنامه‌یا سه‌ردانا ڤێ شاندەیێ بۆ واشنتۆنێ، سه‌رۆکێ نڤیسینگه‌ها پێوه‌ندیێن ده‌رڤه یێ ئه‌نەکەسێ، کامیران حاجۆ ژ ڕووداوێ ڕا گۆت: “پشتی سه‌ردانا مۆسکویێ، شاندەیا پێوه‌ندیێن ده‌رڤه دێ 22ێ ته‌باخێ سه‌ردانا واشنتۆنێ ژی بكە. د هه‌ڤدیتنێن خوه دا ئه‌م دێ د گه‌ل به‌رپرسێن ئەمریكی هه‌ژماره‌کا مژاران گۆتووبێژ بکن.”
د سه‌رێ کارنامه‌یا هه‌ڤدیتنان دا، مژارا ڕێکه‌فتنا ئه‌مریکا و ترکیێ ھەیە کو، هه‌تا نها ناڤه‌رۆکا وێ ڕێکه‌فتنێ نە ئاشكەرا و نە زه‌لال و نه دیاره، ب تایبه‌تی خالێن گرێدایی ڕووبه‌رێ ناڤچه‌یا ئارام، کووراتی، درێژاهی، برێڤه‌برن و پاراستنا وێ ناڤچه‌یێ.
ژ به‌ر ڤێ یەكێ، شاندەیا پێوه‌ندیێن ده‌رڤه یا ئه‌نەکەسێ، دێ مژارا ڕێکه‌فتنا ئامه‌ریکا و ترکیێ، د گه‌ل به‌رپرسێن ئه‌مریکی گۆتووبێژ بکە، ب مه‌به‌ستا ناسکرن و زه‌لالکرنا وان خالێن گرێدایی ناڤچه‌یا ئارام. ئێدی ژ بۆ کو ل گۆری وێ یه‌کێ ڕۆل و هه‌بوونا کوردان د ڤێ ده‌ربارێ دا، بێ دیارکرن.
کامیران حاجۆ هه‌روها گۆت: “ئه‌م دخوازن کو برێڤه‌برنا ناڤچه‌یا ئارام، ب ڕێیا ڕێڤه‌به‌ریێن خوه‌جهی، ژ خه‌لک و پێکهاته‌یێن ده‌ڤه‌رێ به، ژ بۆ کو نموونه‌یه‌ک ل سه‌ر ژیانا هه‌ڤبه‌ش ژ جیهانێ ڕا بێ نیشاندان.”
ده‌ربارێ هه‌بوون و ڕۆلا له‌شکه‌رێ ڕۆژ، کامیران حاجۆ دبێژه: “ژ بۆ پاراستنا ئاسایشا وێ ناڤچه‌یێ، کو پتر ناڤچه‌یێن کوردی ل خوه دگره، ئه‌م دخوازن و کار دکن کو ڕۆلا له‌شکه‌رێ ڕۆژ هه‌به، ئێدی ئه‌ڤ ژی وێ یه‌ک ژ مژارێن گۆتوبێژان به. مژارەك دن ژی مژارا پێكانینا كۆمیتەیا دەستوورا نوو یە كو دڤێ مافێن گەلێ كورد د وێ دەستوورا نوو دا بھێن ب جھ كرن.”
د هه‌مان مژارێ دا، هه‌ردو ئه‌ندامێن شاندەیا ناڤبۆری، ئیبراهیم برۆ و ئسمائیل عه‌ساف، ژ ته‌که‌زی ل سه‌ر خالێن ئاژاندایا کارێ خوه کر کو د ڤان ڕۆژان دا، نڤیسینگه‌ها پێوه‌ندیێن ده‌رڤه یا ئه‌نەکەسێ، که‌تیه د ناڤ ته‌ڤگه‌ره‌کا دپلۆماسی دا، ئێدی د به‌رنامه‌یا وێ دا ھەیه سه‌ردانا ئەمریکا و هنده‌ک وه‌لاتێن ئه‌ورۆپایێ ژی بکه، لێ هه‌تا چ ڕاده‌یێ سیاسه‌ت، نه‌خشه‌رێ، ئاژاندا و پلانێن ده‌وله‌تێن مه‌زن ڕێ ل به‌ر وان خوه‌ش دکن، ئه‌ڤ یه‌ک ل گۆری ئاوا و ئه‌نجامێن پێشهاته‌یێن پاشه‌رۆژێ دمینه و دیار دبه.
