داستانا خواکورکی هێڤێن و بنگه‌ها سه‌رهلدان و تێکۆشینا ل دژی زلمێ بوو و سه‌مبۆلا پاراستن و تێکۆشینێ بوو.
به‌ری ۳٤ سالان، د ٥ێ مەها ئیلۆنێ دا، پشتی ٤٦ ڕۆژان ژ شەرێن گران و به‌رخوه‌دانا هێزێن پێشمه‌رگه‌یێن کوردستانێ، داستانا خواکورکی هات تۆمارکرن. داستان خواکورکی یه‌ک ژ شه‌رێن هه‌ری ناڤدار یێن هێزێن پێشمه‌رگه یێن کوردستانێ یه کو ڕاسته‌راست ب سه‌رپه‌ره‌شتیا سه‌رۆک مه‌سعود بارزانی بوو.
د ۱۹ێ تیرمه‌ها ۱۹۸۸ئان دا ئارتێشا رژێما بەعس ل هه‌رێما خواکورکی ل دژی هه‌رێمێن ڕزگارکری یێن شۆره‌شا کوردستانێ ده‌ست ب ئێریشه‌کا مەزن و به‌رفره‌ه کر. ئارتێشا رژێما بەعس ب به‌شداریا زێده‌تر ژ ۱٥ لیوایێن له‌شکه‌ری تۆپ، فرۆکه‌یێن شه‌ر و هه‌تا چه‌کێن کیمیایی ل دژی هێزێن پێشمەرگەیی بکار ئانین.
پێشمه‌رگه یێن کوردستانێ یێن مێرخاس و فه‌داکار ته‌ڤی هێزا خوه یا نه‌وه‌کهه‌ڤ، کارین زیانه‌که مه‌زن بگهینن هێزێن ئێریشکار یێن ڕه‌ژیما بەعس.
شه‌رێ خواکورکی د وارێ سیاسی، له‌شکه‌ری و ستراته‌ژیک دا خوه‌دی واتا و گرینگیه‌کا مه‌زن بوو، ژ به‌ر کو پێشمه‌رگه کارین گه‌له‌ک چه‌ک و جه‌بلخانه ب ده‌ست بخن. ژ ئالیێ سیاسی ڤه ژناڤبرنا خه‌ونا ڕێژیما بەعس بوو، ژ به‌ر کو ڕژێما بەعس د وێ باوه‌ریێ دا بوو کو بداویهاتنا شه‌رێ ئیراق و ئیرانێ دێ شۆره‌شا کوردستانێ ژی ژناڤببن، لێ خوه‌راگریا پێشمه‌رگه ل خواکورکی خه‌ونێن ڕێژیما دکتاتۆر بنگور کرن.
سه‌رۆک مه‌سعود بارزانی د گۆتاره‌کێ دا ژ بۆ پێشمه‌رگه یێن قه‌هره‌مان یێن به‌شداری شه‌رێ خواکورکی بوونه ڕاگەهاند بوو کو، دێ د ده‌مه‌که نێزیک دا ڕه‌وشا ناڤخوه‌یی یا ئیراقێ وه‌ره گوهارتن و دژمن ژی دێ نه‌چار ببه ل هه‌مبه‌ر ڤێ خوه‌راگری و به‌رخوه‌دانا پێشمه‌رگه خوه د به‌ر چاڤان ڕا ده‌رباس بکه.
داستانا خواکورکێ بوو هێڤێن و چاڤکانیا ئیلهاما به‌رخوه‌دان و ڕووبرووبوونا زلما ڕه‌ژیما دکتاتۆرایا بەعس و سه‌رهلدانا بروومه‌ت یا ئادارا سالا ۱۹۹۱ئان ژێ به‌رهه‌م هات.
سلاڤ ل گیانێ پاکێ شه‌هیدێن داستانا خواکورکێ و هه‌موو شه‌هیدێن ڕێیا ڕزگاریا کوردستانێ.
