شه‌رێ کو تم مه دگۆت ژ بۆنا ژناڤبرنا کوردان و خورتکرنا ترکیێ یه، ب چه‌کدانینا پەکەکێ یا ڕۆژا ۱۱.۰۷.۲۰۲٥ ئان دا قه‌دیا. ئه‌ڤ دێ د مفایێ کوردان دا به. ب شه‌رتێ کو کورد یه‌کتی و یه‌کرێزیا خوه پێک بینن. ترکان ب ئاسیملاسیۆنێ و شه‌ر کورد نه‌قه‌داندن. لێ…
لێ د سه‌د سالا نوو دا وێ کوردان ڤێ جارێ ب ڕێیا ئه‌نته‌گراسیۆنێ د ناڤا خوه دا بکن ترک. ژ ڕۆژا کۆمارا ترک ئاڤاکرن، بریار گرتن کو کوردان بکن ترک، لێ ب سه‌ر نه‌که‌تن. هه‌ر چه‌ندین کۆمکوژی، کۆچبه‌ری و وێرانی ژی پێک ئانین لێ دیسا کورد نه‌بوون ترک.
ئاسیملاسیۆنه‌ک بێ ئامان دانان سه‌ر کوردان، دیسا کوردان زمانێ خوه ژ بیر نه‌کرن و نه‌بوون ترک. د زیندانا دیاربه‌کرێ دا خوه‌ستن مه گرتیێن سیاسی بکن ترک، لێ ب سه‌ر نه‌که‌تن.
نها ژی ل سه‌ر ده‌ستێ پەکەکێ ب ڕێ و ناڤێ ئه‌نته‌گراسیۆنێ وێ بخوازن کوردان بقه‌دینن. ئه‌ڤ ژی ل گۆر من گرێدایێ دو بنگەهێن گرنگن.
یه‌ک نەبوونا هێزه‌کا کوردستانی ل باکورێ کوردستانێ. دو سه‌ده‌ما شه‌رێ پەکەکێ کو وێرانی و کۆچبه‌ریا کوردان ئانی بوو. ژ به‌ر ڤێ ئێدی مله‌ت ژ کوشتن، تالانکرن و زیندانکرنێ وه‌ستیان. ژ بۆنا ڤانا نه‌به، دێ هه‌ر تشته‌کی قه‌بوول بکن. سه‌ده‌ما وێ ژی ژ وی شه‌رێ قرێژ کو نه د به‌رژه‌وه‌ندیا کوردان دا بوو.
د ده‌ما شه‌رێ پەکەکێ یێ درێژ دا، ئێدی چو هێڤیا مله‌تێ کورد، ژ پارتییێن نها نه‌مایه. ده‌ما هێڤی مر، ئێدی هزرا ئانکۆ باوه‌ریا نه‌ته‌وه‌یی، وه‌لاتپارێزی، جاهدا خه‌بات و به‌رخوه‌دانێ ژی نامینه. نها کوردێن باکورێ کوردستانێ د ڤێ ڕه‌وشێ دانه. ژ به‌ر ڤێ نکارن ئان ناخوازن ل سه‌ر تشتێن دن، بفکرن.
لۆما ناڤارۆکا ئاشتیا نها (!) و داویانینا شه‌ر، ئێدی مله‌تێ کورد ئه‌له‌قه‌ده‌ر ناکه. ژ نها و پێڤه، ناخوازن زارۆکێن وان بمرن، کۆچبه‌ری و وێرانیه‌ک نوو ده‌ستپێ بکه‌ن. ژ به‌ر ڤێ پەکەکێ و ده‌وله‌ت ژ بۆنا وان چ ڕه‌وا ببینن، دێ ئه‌وێن بێ قه‌ید و شه‌رت قه‌بوول بکن.
ئێدی بلا پارتییێن مه یێن ژ خوه ڕه دبێژن ئه‌م کوردستانی نه، سه‌رێن خوه ب پاچان مه‌زن نه‌کن. ل سه‌ر ناڤێ گه‌لێ کورد قوره‌تیان نه‌کن. ژ به‌ر کو د ئه‌نجاما شه‌رێ پەکەکێ یێ قرێژ دا، کورد وێران بوون، ل هه‌مبه‌ر وێ چو ئالتارناتیف ده‌رنه‌که‌ت. لۆما مله‌تێ کورد ل باکورێ کوردستانێ بێ هێڤی بوو. بێ هێڤیتی ژی مرنه. ژ به‌ر ڤێ کوردێن باکورێ کوردستانێ نها د سەکەراتێ دا نه.
ئه‌م ژ دیرۆکێ دزانین کو ترکان گه‌له‌ک کێمنه‌ته‌وە د ناڤا خوه دا حەلاندن و کرن ترک. لۆما ژی د شه‌رێ پەکەکێ دا خوه‌ستن ده‌مۆگرافیا کوردستانێ بگوهه‌رن و د هندەک واران دا ب سه‌رکه‌تن. هه‌ژماره‌کا مه‌زن یا کوردان ژ کوردستانێ ده‌رخستن و ل باژارێن ترکان ب ئاکنجی کرنه. ب ڤێ ژی دخوازن بێژن کو کورد ب هه‌ژماره‌ک مه‌زن ل ترکیێ دژین. لۆما دبێژن: ”کورد و ترک بوونه برا”. ئارمانجا ڤالاکرنا کوردستانێ ژ بۆنا ئیرۆ بوو.
هه‌گه‌ر کورد ڕێخستن ئان ئه‌نیه‌ک نه‌ته‌وه‌یی، ب هێز و خورت، خوه‌دی ئابۆرۆیه‌ک خورت ب هه‌ڤرا ئاڤا نەکن کو نها تشته‌کی وه‌ها نه‌خویا یه. هه‌تا سه‌د ساله‌کێ دن وێ کورد بمینن، نه‌مینن مرۆڤ نزانه. لێ سیگنال به‌ر ب نەبوونێ ڤه یه…
ئه‌م کورد تم تۆپێ داڤێژن هێلا ده‌وله‌تێ و دبێژن بلا ده‌وله‌ت ڤێ و وێ بکه. لێ ئه‌م و دنیا ژی دزانن کو هێز و قوه‌ت دئاخفه. ل باکور ژی ئه‌و هێز و قوه‌ت نینە کو کورد هندەک مافێن خوه یێن ڕه‌وا ب ده‌ست بخن. ئه‌م کورد تم گۆتنێن ڕاست و ل دروست دبێژن. لێ ئێدی ب گۆتنان تشتێن خه‌راب، نایێ چاره‌سه‌رکرن.
پێویسته کو د ڤێ ته‌ڤلهه‌ڤیا نها دا، کارێ پارتییێن ل باکور یێن کوردستانی ته‌نها ژ بۆنا یه‌کتی و یه‌کرێزیا کوردستانی به. هه‌تا کو ل باکورێ کوردستانێ، نوێنەریەک کوردستانی پێک نه‌یێ، ئێدی چو گۆتنێن زێرین، مانه‌یا وان نامینه. دڤێ پارتییێن باکورێ کوردستانێ بزانبن کو ڕۆژ ب ڕۆژ ئه‌و تێک دهەرن. پرۆژه‌یا ده‌وله‌تێ دانی بوو و پەکەکێ ژی ل سه‌ر وی ئاساسی کار و خه‌باتێن خوه هه‌تا نها دۆماند، ئه‌ڤ بوو. ئانگۆ ژ بۆنا ئیرۆ بوو.
هه‌گه‌ر زووترین ده‌مێ یه‌کتی و یه‌کڕێزی ل باکورێ کوردستانێ پێک نه‌یێ، هه‌تا سه‌د ساله‌کێن دن ئه‌م نامینن. ژ به‌ر کو پشتی هه‌ڤکاریا ئاکەپ-مەهەپە و ده‌مێ ئێدی کورد ئه‌نته‌گرایێ ترکیێ دبن. گه‌لۆ کوردان حه‌سابێ ڤێ کرنه؟؟؟
ژ نها و پێده دا، د ناڤبه‌را ترکیه و ڕێخستنا پەکەکێ/ده‌مێ دا تفاقا ژ بۆنا کوردان ئه‌نته‌گره‌یێ ترکیێ بکن، ده‌ستپێکری یه. ئه‌و ده‌ستپێک ژی ژ بۆنا هزرا نه‌ته‌وه‌یی بێ ژ بیر کرنه. ب گۆتنه‌ک دن ئێدی کورد ژی دێ وه‌که کێمنه‌ته‌وه‌یێن کو ئیرۆ خوه ژ ترکه‌کی بێتر ترک دبینه، ببینه. هندەک جانک و جامێر دکارن ڤێ نه‌رینا من وه‌که بێهڤیه‌کێ ب ناڤ بکن. ڕاسته، هه‌گه‌ر هێز، قوه‌ت ئان بەرەیەک نه‌ته‌وه‌یی پێک نه‌یێ.
ژ به‌ر کو ل گۆر گۆتن و شرۆڤه‌یێن هندەک ژ ئاقلمه‌ندێ ترکان کو دبێژن: ”گاڤا ئاشتی پێک هات ترکیه وێ خورتر ببه”. سیگنالا وێ ناڤێ ده‌وله‌ت باخچه‌لی ل باکورێ کوردستانێ، ل باژارێ شەرنەخێ ناڤێ کۆلانا “هەکاری” دانین کۆلانا “ده‌ڤله‌ت باخجه‌لی”. کی دزانه کو وێ سبێ ناڤێن چ ده‌ڤه‌رێن دن بگوهه‌رن؟
سیگنالا دن ئه‌ڤه کو ژ وێ شکه‌فتا کو چەکدارێن پەکەکێ ژێ ده‌رکه‌تن و چه‌کێن خوه دانینه. ئه‌و شکه‌فت د سالا ۱۸۰٦ئان دا ستارگە و جهێ به‌رخوه‌دانا میرێ کۆر بوو. هه‌ر وه‌ها سه‌ریهلدانا شێخ مه‌حموودێ به‌رزنجی کو ل هه‌مبه‌ر ئینگلیزان سه‌ری هلدا بوو. ئیرۆ ژی یێن چه‌کێن خوه بێ قه‌ید و شه‌رت ته‌سلیمی ترکان کرن، ژ ور ده‌رکه‌تن. ئه‌ڤ واتەداره. دڤێ کورد ل سه‌ر ڤێ بفکرن.
