داگیركرنا باشوور و بەرخوەدانا پەكەكێ
ئەگه‌ر مروڤ ل ئه‌وروپا یان ئامەریکایێ بژیت و ل چاپەمەنیا پارتییا كاركه‌رێن كوردستانێ (پەكەكە) بنێریت، دێ مروڤ وەسا هزر کەت كو گه‌ریلا کارینە كونترولا باكورێ كوردستانی بكەن و كونێن مشكا ل لەشکرێن ترکیێ کرینە قه‌یسه‌رى و لێڤا لەشکەرێن ترک ژ ترسا پەکەکێ دلەرزیت و كه‌تینه دەردەکێ گەلەک گران.
لێ ئەگه‌ر مروڤ ل باشورێ كوردستانێ و ب تایبەتی ل ده‌ڤه‌را به‌رواری بالا بژیت، دێ بینیت كو پارتییا كاركه‌رێن كوردستانێ مینا وان كه‌سانه یێن کو دبێژن “گوتنا شه‌ری بێژه و روژا شه‌ری ل وێ دەرێ نەمینە”.
ئه‌ڤ گوتنە بوویه ستراتەژیا پەكەكێ یا ل باشورێ كوردستانێ، د ناڤبه‌را چه‌ند مەهان دا به‌رده‌ڤكێ پەكەكێ یان رایه‌دارەکێ وێ دێ د ناڤا چاپەمەنیا خوە دا دەرکەڤن و گوتنێن گەلەک مەزن بێژن و سوپایێ تركیا تەحریک کەن و جهێن خو یێن له‌شكه‌رى و رێکێن هاتن و چوونا خوە به‌رچاڤكەن و وەسا خوەیا کەن كو وان كونترولا باشورێ كوردستانێ كریه و بنگه‌هێن سه‌ربازى یێن هەری بهێز ئاڤا کرینە و ل ده‌مین نیزیک دا دێ شه‌رێن مه‌زن ل دژى تركیا ئه‌نجام دەن.
لێ ب ڤێ یەکێ ب تەنێ رێک دهێتە خوەشکرن کو سوپایێ تركیا ب هیزه‌كا هەری مەزن ڤە بهێتە ناڤا باشورێ كوردستانێ دا و هندەک جهێن دی ژی بێخیتە بن كونترولا خوە دا و قەرەقۆلان تێدا ئاڤا بکەت.
همبەری ڤێ هێزا له‌شكه‌رى یا تركیا، پەكەكە ل دەمژمێرێن یه‌كێ ژ هاتنا لەشکەرێن ترکیا دێ هندەک گولـلەیا به‌رد‌ن وان و پشترا رەڤن و چنە د کونجیکێن تاری دا خوە ڤەشێرن، ب ڤێ یەکێ دێ ب تەنێ دەنگێ قێرى و گازندێن خەلکێ گوندا گەهنە به‌ر ئاسمانا و ته‌رشوته‌والێ گوندییان به‌ربه‌لاڤبن و به‌شه‌كێ وى ته‌رشوته‌والى بنە خوارنەک خوەش ژ بۆی لەشکرێ تركیا و به‌شه‌‌ك دی ژى دێ بیته گوشتێ نیڤ بژارتى ژ بوی گه‌ریلایێن پەکەکێ.
ل سەر ڤێ یەکێ دبیت میناکا هەری بهێز میناکا داگیرکرنا زنارێ کێستە ل دەڤەرا بەرواری بالا بیت، سوپایێ ترکیا بێ کو هیچ حەسابەکێ ژ بۆی هێزا گه‌ریلایا بكەت، هەر وەکو زنارا کێستە بەشەک ژ ترکیا بیت، هەر وەکو چەوا ب ئازادی ل تاخا تەقسیم یا ستەنبۆلێ ب سەربەستی تێن و دچن هەر ب وی ئاوایی چوونە و زنارا گوندێ کێستە داگیر کریە، لەشکەرێن ترکیا ب لنگا ژ لایێ باکورێ کوردستانێ ڤە هاتنە و جهێن کو پەکەکە ب هەرێمێن پاراستنا میدیا بناڤ دکەت داگیر کرن، لێ د چاپەمەنیا خوە دا وەکو هەردەم ژ بۆی سڤکاتی کرن ب حکوومەتا هەرێما کوردستانێ دبێژن، ترکیا زنارا کێستە ل ناڤچەیا بەرواری بالا داگیر کر و حکوومەتا هەرێمێ هیچ کارڤەدانەک نیشان نەدا!
ل دەما پەکەکە ل ناڤچەیەکێ بیت، وێ ناڤچەیێ ب ناڤچەیێن پاراستی و ئازادکری ژ ئالیێ پەکەکێ ڤە ددەتە ناساندن، ل سەر هەر ناڤچەیەکێ ناڤەک نوو ددانیت، ناڤێ ژ هەموویان بەرچاڤتر “هەرێمێن پاراستنا میدیا” نە کو پەکەکە ب تو ئاوایی رێ نادەت نە سڤیلەکێ باشوور نە ژی پێشمەرگە و نە ژی سازیەکا حکوومی بچیتە وێ دەرێ، هەر کەس ب هەر کار و بەهانەیەکێ بخوازیت بچیتە وان ناڤچەیان پەکەکە یان رێگریێ لێ دکەت یان ژی وان دگریت و وەکو سیخورێن ترکیا ددەتە ناساندن، لێ دەما لەشکەرێن ترکیا تێن دەرگەهـ ژ بۆی وان ڤەکرینە، ب تەنێ هندەک تەقەیێ دکەن، چەند کەچ و کورێن کوردا ژ بۆی پرۆپاگاندایا پارتیا خوە ددەنە کوشتن و پشترا وێ دەرێ ب جهـ دهێلن و زێدەتر تێنە ناڤا باشوورێ کوردستانێ دا، د چاپەمەنیا خوە دا ژی دبێژن “ترکیا هەرێما کوردستانێ داگیر دکەت”! ل ڤێرە ئەڤ پرسیارە سەر هل ددەن، گەلۆ قەهرەمانێن چیا، فەدائیێن کو موراد کارایلان باسی وان دکر کو هەر دەم پێویست بکەت دێ فەرمانێ دەتە وان کو ئێریشی باشوور بکەن ل کو دەرێ نە؟! بۆچی هەرێمێن پاراستنا میدیا ناپارێزن؟! بۆچی هەر جهێ ترکیا خواست داگیر بکەت وەکو ئاڤ ڤەخوارنێ ب هێسانی داگیر دکەت؟! گەلۆ سەدەم چنە کو هەیا نها پەکەکە نکاریە ب تەنێ مەترەک ژ وێ خاکا ب دەست ترکیا ڤە بەردای رزگار بکەت؟!!
ب کورتی پشتی داگیرکرنا زنارا گوندێ کێستە دێ ترکیا قەرەقۆلێن لەشکری لێ ئاڤا کەت، ئەڤ یەک ژی دێ بیتە سەدەمەک سه‌ره‌كی كو ئازادیا هاولاتیان ل ده‌ڤه‌رێ بكه‌ڤیته مەترسیەک مه‌زن دا و دیسان چوون و هاتنا گه‌ریلا ژى دێ کەڤیتە مەترسیێ دا، ئانکو ب كورتى دێ ئه‌ڤ ده‌ڤه‌رە بیتە ده‌ڤه‌ره‌كا له‌شكه‌رى.
ده‌ما ده‌ڤه‌ره‌ك ببیتە ده‌ڤه‌ره‌كا له‌شكه‌رى یانی ژیانا مەدەنی تێدا نامینیت، نه‌مانا ژیانا مەدەنی ل ناڤچەیەکێ دێ بیتە سەدەما كۆچبه‌ربوونا هەموەلاتیێن وێ ناڤچەیێ، ئه‌ڤ كۆچبەر بوونە دێ یەکەمجار باندۆرەکا گەلەک خراب ل پەكەكێ کەت و دێ وان ژ سنورێن باكورێ كوردستانێ دوور کەت و دیسان وه‌كە هەر دەم هاولاتیێن باشوور بنە قوربانیێن شەرەکێ کو چ پەیوەندیا وان پێڤە نینە.
(داركامازی)
