نڤیسار

دا دەستێن دەرەکی ببرین

سەردار هێتوتی

بەری 15 ساڵان و ژ بۆ جارا ئێکێ ل سلیمانیێ من پشکداری د خوەپیشاندانەکێ دا كر.  ل وی دەمی نزانم ئەز قوتابی بووم یان خوەندەكار، لێ هەر چاوا بە ب مەرەما وەرگرتنا باوەرنامێ د بیاڤێ ڕۆژنامەڤانیێ دا، ئەز ل وی باژێری بووم.

 ئەم ئەوێن هەلگرێن ناڤێن ژوور کەفتین سەر جادەیان و داخازا مە دابینکرنا پێدڤیێن دەستپێکی یێن بەشێن نافخوەیی بوو. هەر ل وی دەمی من یا های ژ دەستێ دەرەکی بووی، لێ ئەز یێ پشت ڕاستم کو ژ بلی دەستێ دزی و تاڵان و گەندەڵیا مافیا وەڵاتی چ دەست ل پشت وێ خوەپیشاندانێ نەبوون.

 ساڵ هاتن و دەرباس بوون ل وارگەهێ ژیانا من ژ بەر بێ ئاڤیێ دووبارە خەلکێ تاخی ل بەر دەرگەهێ رێڤەبەریا دەڤەرێ خرڤەبوون کر، بلەز ئەوێن بەرهەڤ گەهشتن سەر سەرێ مە و گۆت “دێ خەلک دەستێ خۆ خرینیتە د ناڤدا” و پاشی هەر وێ شەڤێ ئاڤا ب حەفتیەکێ نەهاتیە چێکرن ب قودرەتا خۆدایی د وێ شەڤێ دا ئاڤ گەهاندە ماڵان و ل وی دەمی ب تنێ دەستێ خۆشمێریا تاڵانکرنێ ل پشت بوو.

 ل شێلادزێ، ئەو کۆمەڵگەها قوفلکری، ژ بەر نەبوونا کاری، زێدەبوونا هژمارا ڕۆنشتڤانان، باڵادەستیا چەندەکێن ژ یاسایێ بڵندتر و ژ ترسا فڕۆکێن ترکیا و کوشتنا خەلکێ سڤیل، گەل نەچاری خوەپیشاندانێ کر، بەرپرسێن حکومی و حزبی ئەوێن هەلگرێن پەیاما جیهانا دیموکراسیەت و ئاڤەدانی و خۆشگۆزەرانیێ ب تنێ ل سەر لاپەرێ فەیسبۆکێ و کەسێن ڕەش د چاڤین خەلکی دا خەلک پشت گۆهڤە هاڤێت و هندەک ژ دیڤەلانکێن خرابیێ ژی سواری پێلێن داخوازا خەلکی بوون و ڕێک و ڕێبازا خوەپیشاندانێ بەرەڤ ئاقارێن خرابڤە بر کو ئەڤە ژی هەمی ژ سایا حکومەتا گەندەل پەیدابوو.

 دوهی ژی، ل زاخۆ، خوەپیشاندان ب دەستێ دەرەکی هاتە ب ناڤکرن، گەلو جارەکێ ڤان مشەخۆران، ڤان گەندەڵە بەرپرسان گۆتیە خوە کو ب تنێ ئێک دەستێ دەرەکی یێ هەی ئەو ژی تاڵانکاریێن مەنە؟ ئایا جارەکێ ب تنێ ژی پسیار ژ کەسێ کریە کانێ بۆچی ڕێکێ ددەن دەستێ دەرەکی ئاڤا ببە و بکەڤە د ناڤا هناڤێن وان دا؟ نەخێر وان های ژ ڤی کاری نینە و نابە ژی، چونکی ئەو کورێن برسێ بوون ئەڤڕۆ یێن ل سەر شیلانا ڕائێخستی و دانای و ب تنێ جار جارا ب ڕێکا هندەک پۆستێن بێ ڕامان تۆزێ دکەنە چاڤێن سەرکرداتیێ.

 وەرن دا دەستێ دەرەکی ببرین، پەروەردەکا ساخلەم بلا بنگەهـ بە، دادگەهەکا ئازاد بلا سەروەر بە، یاسا ب کارێ خۆ ڕابە و هێزا لەشکری و ئەمنی د دەستێن حکومەتێ دا بن، پێدڤیێن دەستپێکی یێن ژیانا خەلکی دابین بکەین دگەل پەیداکرنا دەڵیڤەیێن کاری، پاشی دێ شێین هژمارا دەستێن دەرەکی ب زەڵاڵی پەیداکەین و د جهـ دا برین.

2020.08.20

Back to top button