هوون باوه‌ر بکن ئه‌ز ژی ب قاسی وه، به‌لکی ژ وه پتر ژی ل دژ دکتاتۆریێ مه. ژ به‌ر وه‌لاتێن ب دیکتاتۆرێ ته‌نێ و هاتنه ئیداره‌کرن ئه‌و ژ خوه نه ته‌مه‌ن درێژن. دیکتاتۆری بێده‌نگیا گه‌ل، دزی و تالانکرنا وه‌لات یا ب ده‌ستێ چه‌ند که‌سانه.
ئه‌م دزانن کو دکتاتۆر ب وی ته‌مه‌نێ خوه ژیانێ ل هه‌می مرۆڤاهیێ دکه دۆزەخ. ماف و حه‌قێ چ که‌سان نینە کو وه‌که خوه بژین. فکر و ڕامانێن خوه ب ئازادی بێژن.
لێ جارنا مرۆڤ دبێژه؛ خوه‌زی نها ده‌ستهلاته‌کا مه یا ل سه‌ر خه‌تا نه‌ته‌وه‌یی و ل گۆر باوه‌ریا ئازادیا گه‌لێ کوردستانێ، مه ده‌سهلاته‌کا دیکتاتۆر هه‌با. ژ به‌ر کو مرۆڤن فێری کۆله‌تیێ و وه‌لاتفرۆشیێ بوونه، نه ب دارێ زۆرێ به، ب ده‌مۆکراسیێ ڕاست نابن.
چما ڤێ دبێژم؟
نها بالا خوه بدنێ، ببینن و بزانبن مله‌تێ زێده‌یێ سه‌د سالان بنده‌ست و کۆلۆنی ژیابه، زه‌حمه‌ته کو مرۆڤ ژیانا وی ب ڕێیا ده‌مۆکراسیێ بگەھینه ئازادیا وی. ژ ڕۆژا وه‌لاتێ مه ھاتیە داگیر كرن، مه‌ژی و هه‌بوونێن مه ژی هاتنه داگیرکرن. ب دارێ زۆرێ هه‌ر تشت ب مه دانه قه‌بوولکرن و ئه‌ڤ بوویه وه‌که کولتوره‌کێ مه.
ژ به‌ر بنده‌ستی و کۆلۆنیا کوردان یا ب سالان ئه‌و کری یه کۆله، خوه‌فرۆش و به‌رژه‌وه‌ندی پەرێس. ژ به‌ر کو تو ئازادیێ ژی بده‌ی وان ئه‌وێن هه‌ر د وێ ژیانا کو تێده ژیانە و هه‌ر دار ل سه‌ر سه‌رێ وان بوویه، بژین.
ژیانه‌کا وه‌ها ژی ئینسانان ژ وان دوور دخه. ئانكۆ ئینسان ئێدی ب کریار، ب ئه‌خلاق و ب ته‌ڤگه‌رێن خوه دبن تشته‌کێ دن. هه‌تا کو تو وان ل باشیێ، قه‌نجیێ و ئازادیێ ڤه‌گه‌رینی ده‌م و ده‌ورانه‌ک لازمە.
د ناڤ ڤێ ده‌م و ده‌ورێ دا ژی دڤێ تو وه‌که داگیرکه‌ران ل سه‌ر سه‌رێ وان دکتاتۆریێ ب کار بینه دا کو هه‌تا د مه‌سه‌لێ بگەھن. لێ دڤێ ئه‌و دکتاتۆری د واره‌کێ نه‌ته‌وه‌یی دا به. نه وه‌که دکتاتۆرێن هه‌بوون و هه‌نه بە. ل گۆر به‌رژه‌وه‌ندیا کورد و کوردستانێ ده‌ستهلات ژ بۆنا مه کوردان لازمه.
میناکا ل به‌ر چاڤان:
ئه‌م هه‌می دزانن چێکرن و ئاڤاکرنا یەكێتیا نشتمانیا كوردستانێ (یەنەکە) ژ بۆنا ژناڤبرنا بارزانیان چێبوویە. ئه‌ڤ پێکهاتنا وان نه‌کو وان، داگیرکه‌ران کرنه دا کو باشوورێ کوردستانێ نه‌گەهژه ئازادی و سه‌رخوه‌بوونا خوه.
چ ده‌ما شۆره‌ش ل باشوورێ کوردستانێ گه‌ش بوویه یەنەکە هه‌ر ئاسته‌نگی ل هه‌مبه‌ر وێ ده‌رخستنه و پێشی ل وێ گرتنه. یەنەکێ جارا ئه‌ول جاش بوونا خوه ب ئاوه‌یه‌کێ فه‌رمی ده‌ما ژ ناڤ ڕه‌فێن پارتیا دەمۆكراتا كوردستانێ (پەدەکە) جودا بوون ن راگەھاند و ل دژی شۆره‌شا ل باشوورێ کوردستانێ یا ب سەرۆكاتی و ب ڕێڤه‌بریا بارزانیان راوەستان.
ژ وێ ڕۆژێ وەرە ل هه‌ر چار پارچەیێن كوردستانێ ب ناڤێ جاشتی دهێن ب ناڤ کرن. لێ پشتی ده‌م و ده‌ورانه‌کێ مرۆڤ دگۆت ئان وه‌ها دهات زانین کو یەنەکێ خوه گوهه‌ریه و ئه‌و ژی ژ بۆنا ئازادیا کوردستانێ ته‌ڤدگه‌رن. ئه‌م هه‌می د ڤردا شاش ده‌رکه‌تن. ”کورمێ شیری هه‌تا پیریێ یه”
ئه‌ز د وێ باوه‌ریێ دا مه کو هه‌گه‌ر نه ژ یەنەکێ با، نها باشوورێ کوردستانێ سه‌رخوه‌بوونا خوه ڕاگهاندبایە. لێ ئه‌و هه‌ر بوونه و دبن ئاسته‌نگ. ژ به‌ر کو نها ب ته‌مامی که‌تنه بن ئه‌مر و کۆنترۆلا مه‌لایێن ئیرانێ و بوونه به‌شه‌ک ژ وان.
هه‌گه‌ر ئه‌م وێ خه‌نجه‌را وان یا ژەهرێ یا 16 ئۆكتۆبەرا 2017ێ ل پشتا کوردان و ب تایبه‌تی ل بارزانیان خستن، ب بیر بینن. دڤێ ئه‌م مه‌سه‌لێ پتر و باشتر فێم بکن. هه‌گه‌ر ل هه‌مبه‌ر وێ خائینتیێ و جاشتیێ بێده‌نگی نه بووبا و که‌سێن ئه‌و خه‌نجه‌ر ب کارانین هاتبانە جه‌زاکرن، ئەو دێ ئیرۆ نکاریبانە که‌سێن وه‌که مسته‌فا سه‌لیمی ته‌سلیمی ئیرانێ بکرانا. هه‌گه‌ر ئیرۆ ئه‌ڤ کرن وێ سبێ تشتێن هێش مه‌زنتر ژی بکن.
ئه‌ز ڤێ ب دو ئالیان دنرخینم؛ یه‌ک ژ بۆنا ته‌ڤلهه‌ڤی و نه ئارامیێ ل باشوورێ کوردستانێ ده‌رخن دا کو تم نه ئارامی ل ور هه‌به کو نکاربن سه‌رخوه‌بوونا خوه ڕاگەهینن.
ژ ئالیەك دن ڤە ئه‌ڤ ئێدی ب زه‌لالی و ئاشکه‌ره‌یی هاته دیتن و زانین کو ئێدی یەنەک بوویه نۆکه‌رێ ئیرانی و بوویه ته‌ڤگه‌را وان و بوونه زلامێن وان.
لۆما دبێژم کو وه‌لاته‌کێ وه‌ک کوردستانێ کۆلۆنی هه‌تا بگەهە ئازادی و سه‌رخوه‌بوونا خوه، ژ وێ ڕا گه‌له‌ک قۆناخ لازمن. ئه‌و قۆناخانا ژی بێ شه‌ر و به‌رخوه‌دانه‌کا توند، مه هه‌میان ب هه‌ڤرا دیت کو نابه.
ئێدی ده‌م هاتیه کو دڤێ حوکومه‌تا هه‌رێما کوردستانێ ب چ به‌ده‌لان دبه بلا ببه، ل هه‌مبه‌ر خوه‌فرۆش و وه‌لاتفرۆشان بێ ده‌نگ و هه‌لوه‌ست نه‌مینه. ب ڕێیا قانوون و یاسایان چ لازم به، دڤێ وێ بکن. به‌سه ئێدی…
یێن خوه فرۆتن، ب ڕه‌حه‌تی دکاره ئینسانێ خوه، مله‌تێ خوه، ئاخ و هه‌می هێژاییێن گه‌لێ خوه ژی پێشکێشی داگیرکه‌ران بکه. نها کارێ یەنەک دکه ته‌نێ ئه‌ڤه.
ها گه‌لۆ ژ ڤێ هه‌می یەنەک سووجدارە؟ ئه‌ز دبێژم ئه‌رێ. که‌سێن پاقژ و دلسۆزێن گه‌لێ خوه هه‌بن، بلا ژێ ڤه‌قه‌تن. هه‌گه‌ر ڤه‌نه‌قه‌تن ئه‌و ژی وه‌که تۆڤێن خائینتیا جه‌لالیان گونه‌هکار و سووجدارن. ڕاستکرن و دووزکرنا ڤانا ته‌نێ ب ڕێ و ڕێبازه‌کا دکتاتۆری دکاره سه‌ڕاست ببه.
ئێدی کێر گەهشته هه‌ستی، داویئانینا جاشان ژ بلی دکتاتۆریه‌کا نه‌ته‌وه‌یی نه‌ما دبه. که‌سێن خائین و وه‌لاتفۆرۆش دڤێ جه‌زایێن خوه ببینن. ڤانا ب سایا په‌رێن ژ داگیرکه‌ران دگرن ڕۆژ ب ڕۆژ خورتر دبن. ب ڤی ئاوایی دێ ڕۆژەك بێ وه‌لات ژی ڕاده‌ستێ داگیرکه‌ران بکن.
ڕاده‌ستکرنا مسته‌فا سه‌لیمی پرۆته‌سۆ ناکم، دڤێ یێن ئه‌و دانه ئیرانێ بێنه جه‌زاکرن کو جاره‌که دن تشتێن وه‌ها نه‌قه‌ومن.
مسته‌فا سه‌لیمی نه‌مره و جانگۆریێ وه‌لاتێ خوه یه…
بووبێ ئه‌سه‌ر
2020.4.12
