سه‌رۆکاتی و رێڤه‌بری نه کارێ هه‌رکه‌سی یه، نه کاره‌کی هێسانه، هه‌رکه‌س نکاره ببه و بکه. بێگومان هه‌رکه‌س دکاره ببه رێڤه‌بر، هه‌رکه‌س دکاره خوه وه‌ک رێڤه‌بر و سه‌رۆک ببینه، لێ نکاره ئه‌رک و تایبه‌تمه‌ندییێن رێڤه‌بری و سه‌رۆکاتییێ ب جهبینه. ژ رێڤه‌بری و سه‌رۆکاتییێ را هنده‌ک تایبه‌تمه‌ندییێن گرنگ دڤێن. چه‌ند خالێن گرنگ ژ وان تایبه‌تمه‌ندییان ئه‌ڤن:
۱- هونه‌را ئه‌مپاتییێ (حس و هه‌ستێن خورت) بلند.
۲-دروستی و دادوه‌ری
۳- نووژه‌نی و هونه‌را خوه‌نووژه‌نکرنێ
٤- دابه‌شکرن و هونه‌را کۆمخه‌باتێ
٥- ئیلهام و رێنیشاندان
٦- هشمه‌ند و هشمه‌ندی
۷- برێڤه‌برن و هونه‌را لهه‌ڤراگرتنێ و گه‌له‌ک تایبه‌تمه‌ندییێن دن.
نه یێ کو ل پێش دمه‌شه و نە یێ کو رێ نیشان دده سه‌رۆکه. نه یێ کو دبێژه، یێ کو دکه سه‌رۆکه. رێڤه‌بر و سه‌رۆک دڤێ ئه‌مپاتییێ بکن، ئانگۆ حس و هه‌ستێن مرۆڤاتی و مه‌رڤانتییێ ل جه‌م وان خورت بن و کاربن ئێش و ئازارێن مله‌تێ خوه بکشینن، ب مله‌تێ خوه را رابن و روونن، ب مله‌تێ خوه را بکه‌نن و بگرین. سه‌رۆک دڤێ دروست و دادوه‌ر بن، نه هه‌ڤالێن خوه و نه ژی تاکەکەسێن مله‌تێ خوه نه‌ئێشینن. سه‌رۆک دڤێ نووژه‌ن بن، ژ نووژه‌نی و نووژه‌نتییێ را ڤه‌کری بن. سه‌رۆک دڤێ هه‌ڤپار و هه‌ڤکارێ دابه‌شکرنا خه‌بات و کۆمخه‌باتێ بن، دڤێ ب تۆله‌رانس بن. سه‌رۆک دڤێ خوه‌دی هه‌ست و ئیلهام بن، رێ نیشانی خه‌لکێ خوه بدن و خه‌لکێ وی ژێ ئیلهام و هێزێ بستینن. سه‌رۆک دڤێ خوه‌دییێ هشمه‌ندییه‌ک به‌رفره و زه‌لال بن، ب هشمه‌ندییا خوه چاره‌سه‌رییێ ژ پرسگرێکێن مله‌تێ خوه ا ببینن یان په‌یدا بکن. سه‌رۆک دڤێ خوه‌دییێ هونه‌را برێڤه‌برنێ بن و کاربن مله‌تێ خوه ل هه‌ڤ راگرن.
ئه‌ڤ تایبه‌تمه‌ندییێن کو من ل ژۆر نڤیساندن به‌شه‌ک ژ تایبه‌تمه‌ندییێن رێبازا بارزانی نه ژی. رێبازا بارزانی نه ته‌نێ شه‌ر و به‌رخوه‌دانه، هه‌روه‌ها هه‌موو تایبه‌تمه‌ندییێن مرۆڤی نه ژی.
ئه‌و کوردێن کو خوه‌دێگراڤی دبێژن ئه‌م ل سه‌ر رێبازا بارزانی نه، ب تایبه‌ت سیاسه‌تمه‌دارێن کوردێن باکور، هه‌تا ئیرۆ ب قاسی سه‌رێ ده‌رزییێ ژی رێبازا بارزانی نه شۆپاندنه. ب گۆتنێ ئه‌رێ، لێ د راستییێ دا مخابن هایا وان قه‌ت ژ رێبازا بارزانی چێنه‌بوویه. مه رێبازا بارزانی ژ خوه را کریه سیوانا به‌رژه‌وه‌ندییێ و مه خوه پێ ستراندیه. مه ژ زیانێ پێڤه نه‌دایه رێبازا بارزانی. رێبازا بارزانی خه‌باتێ دخوازه، فه‌داکارییێ دخوازه، پشتگری و هه‌ڤکارییێ دخوازه، و ژ هه‌ر تشتێ زێده‌تر کوردایه‌تی و کوردستانیبوونێ دخوازه. د سه‌ری دا پەکەکە، پرانییا که‌سایه‌ت، ده‌زگه‌ه و پارتییێن کو ل دژی پەدەکێ و بارزانییانه، یان ژی ئه‌وێن کو خوه د بن سیوانا کوردستانیبوونێ دا ڤه‌شارتنه، هه‌تا ئیرۆ ژ خرابی و نه‌یارتییێ پێڤه ژ رێبازا بارزانی را تشتەک نه‌کرنه. مه‌به‌ستا من کار و خه‌باته، داگرتنا قادا ته‌کۆشینێ یه. یان نا هه‌لبه‌ت چو شک و گومانا من ژ کوردبوون و وه‌لاتپارێزییا که‌سه‌کی ژ وان نینە. ژ به‌ر رێبازا بارزانی کاره، خه‌باته، ته‌کۆشینه، فه‌داکاری و به‌ده‌لدایینه. نه گۆتن و گالگاله، کرنه، لڤ و که‌فته‌له‌فته.
ئه‌ردهه‌ژا کو ل باکورێ کوردستانێ چێبوو برینه‌ک مه‌زن د مه‌ژی و به‌ده‌نا کوردان دا ڤه‌کر. برینه‌ک کو ب ده‌هان سالان ناهێتە ده‌رمانکرن و ناهێتە ژبیرکرن. د ڤان رۆژێن قیامه‌تێ دا ئالیکارییا هه‌ر کورده‌کی، ئالیکارییا هه‌ر ده‌زگه و پارتییه‌کێ، ئالیکاری و پشتگرییا هه‌ر رێڤه‌بر و سه‌رۆکه‌ک کورد جهێ کێفخوه‌شی و شانازییێ یه. ئه‌م کورد د رۆژێن ته‌نگ دا موحتاجی ئالیکارییا هه‌ڤن. هه‌گه‌ر د رۆژێن ته‌نگ و ئێشدار دا ئه‌م نه ل جه‌م هه‌ڤ بن و ئێشا هه‌ڤ نه‌کشینن، د رۆژێن فره‌ه دا ژ خوه هه‌رکه‌س کورێ باڤێ خوه یه. د ڤێ قیامه‌تا کەسەندیتی دا ئالیکاری و پشتگرییا حکومه‌تا هه‌رێما کوردستانێ و ده‌زگه‌ها خێرخوازییا بارزانی سه‌رێ کوردان د ناڤ خه‌لکێ دا بلند کر، دلێ مه‌خدوورێن ئه‌ردهه‌ژێ، پچه‌کی به ژی، خوه‌ش و گه‌رم کر، مرۆڤحه‌زی و خێرخوازییا مه کوردان ب دنیایێ دا قه‌بوولکرن. هه‌ر چقاسی چاپه‌مه‌نییا نیژادپه‌ره‌ست ئا ترک خوه که‌ڕ، کۆر و لال کر ژی، ڕاستی نه‌هات ڤه‌شارتن، هه‌رکه‌سی خێرخوازییا کوردان دیت و ئه‌و باشتر ناس کرن. بێگومان ئالیکارییێن ده‌زگه‌ها خێرخوازییا بارزانی ژی ژ تایبه‌تمه‌ندییێن رێبازا بارزانی نه دوورن، پارچه‌یه‌ک ژ وێ رێبازێ یه.
ژ بۆ مه کوردان شانازی و سه‌ربلندییا مه‌زنتر، سه‌ردانا سه‌رۆکێ کوردستانێ نێچیرڤان بارزانی یه. نێچیرڤان بارزانی ب سه‌ردانا مه‌خدوورێن ئه‌ردهه‌ژێ دلێ نه‌یاران ره‌ش و دلێ کوردان خوه‌ش کر. نێچیرڤان بارزانی ب هاتن و سه‌ردانا خوه دوپات و په‌سه‌ند کر کو خوه‌دییێ تایبه‌تمه‌ندییێن سه‌رۆکاتییێ یه. ئه‌و تایبه‌تمه‌ندییێن کو من ل ژۆر به‌حسا وان کر، ب هاتنا نێچیرڤان بارزانی زه‌لال و زیندی بوون. نێچیرڤان نه وه‌ک سه‌رۆکه‌کی لێ وه‌ک نه‌فه‌ره‌کی ژ مه‌خدوورێن ئه‌ردهه‌ژێ که‌ت بن کۆن و چادرێ کوردێن په‌ریشان و ئێشا وان پارڤه کر. ئه‌ڤێ یه‌کێ جاره‌ک دن نیشان دا کو کورد یه‌ک مله‌ته و ئێشا کورده‌کی کورده‌کی دن دێشینه. یه‌ک ژ تایبه‌تمه‌ندییێن رێبازا بارزانی ژی ئه‌ڤه‌یە.
هاتن و سه‌ردانا نێچیرڤان بارزانی هه‌لبه‌ت دلێ کوردێن باکور خوه‌ش کر، مۆرال و گه‌شبینییه‌ک مه‌زن دا وان. لێ دل دخوازه کو نێچیرڤان بارزانی یان ژی هنده‌ک رایه‌دارێن حکومه‌تا هه‌رێما کوردستانێ سه‌ردانا رۆژاڤایێ کوردستانێ، سه‌ردانا مه‌خدوورێن ئه‌ردهه‌ژا عه‌فرین، جندرێس و ده‌ڤه‌رێن دن ژی بکن و ب چوونا خوه دلێ وان ژی خوه‌ش بکن.
گۆتنا داوین، هێڤیدارم هاتن و سه‌ردانا سه‌رۆکێ هه‌رێما کوردستانێ که‌ک نێچیرڤان بارزانی نه جارا یه‌که‌م و نه ژی جارا داوین به. سالێ جاره‌کێ به ژی، سه‌ردانا باکورێ کوردستانێ، سه‌ردانا گوند و باژارێن کوردستانێ، پرسین و لێپرسینا ره‌وشا کوردێن باکور وێ ژ بۆ کوردێن باکور ببه مۆرال، وێ ببه ئیلهام، وێ ببه هێڤی و پشتگرییه‌ک مه‌زن. ژ بۆ پێشخستنا کار و خه‌باتێن سیاسی و کوردایه‌تییێ ژی وێ ببه پال و پشته‌کا مه‌زن.
دیسا ژ مرییان را ره‌حمێ، ژ زندییان را سه‌برێ دخوازم.
به‌لا سه‌رێ مله‌تێ کورد ساخ به.
Nûrî Çelîk
