ده‌ما قورئان هات شه‌وتاندن
گه‌لۆ ته‌نێ کورد ل ورێ هه‌بوون؟
چەند ڕۆژ به‌رێ یه‌کی نۆروه‌جی بێرێزیه‌کا مه‌زن ل پێشبه‌ر ئۆلا ئیسلامێ کریه و ل خوه‌پێشاندانه‌کێ قورئانا پیرۆز شه‌وتاندیه.
ل ورێ ب هه‌زاران که‌س هه‌بوونه. ته‌نێ کورده‌کی جوان ژ باشوورێ کوردستانێ خوه ب گوڕکی ئاڤێتیه سه‌رێ و ئه‌و ته‌راکریه، قورئان ژ شوتاندنێ ڕزگار کریه.
پرسا سه‌ره‌که ئه‌ڤه:
. گه‌لۆ ژ ملیاره‌ک و نیڤ بسلمان، ته‌نێ فه‌لاح ئه‌حمه‌د هه‌رکی یێ کورد ل ورێ بوویه؟
. ئه‌و بسلمانێن ترک، عه‌ره‌ب و فارس کو هه‌رتم کوردان ب ”دژبه‌ریا ئیسلامێ” تاوانبار دکن، گه‌لۆ که‌س ژ وان ل ورێ نه‌بوون کو قورئانێ ژ شه‌وتاندنێ ڕزگار بکرانا؟
ئیرۆ ل سه‌رانسه‌رێ ئه‌ورووپایێ ل دورا ۳۰ ملیۆنی بسلمان هه‌نه.
بێگومان بسلمانێن ژ پرانیا ٥۷ وه‌لاتێن بسلمان ل ورێ هه‌بوونه. لێ که‌سی ژ وان ده‌نگ نه‌کریه و هه‌موو زلۆق بوونه و ل شه‌وتاندنا قورئانێ نهه‌رینه. لێ بێڤلا که‌سی ژ وان نه‌شه‌وتیه و بێپێژن مانه. دیسا نه‌ڤیه‌کی سلتانێ کورد سلاحه‌دین ئه‌یووبی، وێ بێخیره‌تیێ نه‌په‌ژراندیه.
ها ئه‌و بسلمانێن ترک، عه‌ره‌ب و فارس کو ل شه‌وتاندنا قورئانێ ته‌ماشه دکرن، ده‌ما ئه‌و بکه‌ڤن ناڤا هێزێن داعشێ و ئه‌گه‌ر فه‌لاح ئه‌حمه‌د هه‌رکی یێ کورد تێکه‌ڤه ده‌ستێن وان، وێ ب گۆتنا ”ئه‌ڵاهوو ئه‌کبه‌ر”ێ سه‌رێ وی ژێبکن.
دڤێ ئه‌ز ڤێ یه‌کێ ژی بێژم: سال ۲۰۱۱، ده‌ما ئه‌و هه‌ردو بالاخانه‌یێن ئه‌مریکی کو ب بالافرێن ڕێویان ئانین خوارێ، بسلمانێن ل وه‌لاتێن ئه‌ورووپایێ قورئانێن د مالێن خوه دا داڤێتن قوتیێن چۆپێ/تەنەکێن گلێشی دا. کورد ژی دچوون ئەو قورئانان ژ ناڤ گلێش ده‌ردخستن و دبرن مالێن خوه دپاراستن. جیرانه‌کێ من ٦ قورئانێن کو ژ چۆپێ ده‌رخستبوون، نشانێن من دانه.
ئێدی دڤێ هه‌موو بسلمانێن ل دنیایێ خاسما یێن ترک، عه‌ره‌ب و فارس ل خوه و ناڤێ خوه بسێورن و ئێدی ده‌ست ژ وه‌حشه‌تا خوه یا کو ل کوردان دکن به‌ردن. یانه‌نا، ئیرۆ ئه‌حمه‌د هه‌رکی هه‌یه، لێ دبه کو سبه‌هێ کەس نەبە.
