دوو كورد د نڤیساندنا دەستوورا نوو یا سوریێ دە بەشدارن
بریاره ده‌ستووره‌که نوو ژ سووریا بێ ڕه بێ ئاماده‌کرن و هه‌موو پێکهاته‌یێن سه‌ره‌که یێن وی وه‌لاتی تێ ده به‌شدار بن. ۲ نوونه‌رێن کوردان د ناڤا کۆمیته‌یا نڤیساندنا ده‌ستوورا نوو ده هه‌نه و ئه‌و ڕازی نابن کو سووریا نوو نه فه‌ده‌رال به و هه‌رێمه‌که کوردی چێ نە به.
وه‌لاتێن مه‌زن و یێن ھەرێمی گهیشتنه وێ باوه‌ریێ کو به‌رده‌وامیا شه‌رێ سووریێ ته‌نێ زیانێ دگهینه وه‌لاتیان و نها هه‌موو هه‌ولدان به‌ر ب چاره‌سه‌رکرنا کریزێ ڤه دچن، نه ب ئالیێ ژناڤبرنا ڕێژیما به‌شار ئه‌سه‌د، له‌وما ژی نها بریاره کو دانووستاندنێن جدی و براست ل سه‌ر پاشەرۆژا سووریێ ده‌ستپێ بکن، کو کورد ژی لگه‌ل ئۆپۆزسیۆنێ ئاماده‌کاریێ ژ بۆ قۆناغا بێ دکن.
یه‌که‌م پێنگاڤ ژ بۆ چاره‌سه‌رکرنا کریزا سووریێ دانینا ده‌ستووره‌کی نوو یه کو مافێ هه‌موو هێز و پێکهاته‌یێن جودا د وێ دەستوورێ ده پاراستی به.
ده‌ربارێ وێ پێنگاڤێ ئیبراهیم برۆ نوونه‌رێ ئه‌نکسێ د ناڤا شاندا ئۆپۆزسیۆنا سووریێ ده، دبێژە: “کۆمیته‌یه‌ک بۆ نڤیساندنا ده‌ستوورێ نوو یێ سووریێ پێک هاتیه و کورد ژی تێ ده جھ دگرن، لێ هێژ وێ کۆمیته‌یێ ده‌ست ب کارێ خوه نه‌کریه. ژ ئالیێ ئۆپۆزسیۆنێ و ژ ئالیێ ڕێژیمێ و ژ ئالیێ نه‌ته‌وه‌یێن یه‌کبوویی ڤە دێ د نڤیساندنا ده‌ستوور ده به‌شدار ببن.”
به‌ریا چه‌ند ڕۆژان کۆمیته‌یا نڤیساندنا ده‌ستوورێ سووریێ سه‌ردانا عه‌ره‌بستانا سعودیێ کر ژ بۆ کو هه‌ول بده ده‌ست ب کارێ خوه بکه، لێ ئیبراهیم برۆ دبێژه، ڕژێما سووریێ ئالیێ نه‌ته‌وه‌یێن یه‌کبوویی د نڤیساندنا ده‌ستوور ده قه‌بوول ناکه.
برۆ وەها گۆت: “کورد د نڤیساندنا ده‌ستوور ده به‌شدارن و کامیران حاجۆ و هه‌واس عه‌گید، دوو ئه‌ندامێن کوردن د کۆمیته‌یا نڤیساندنا ده‌ستوور ده به‌شدارن. لێ ئه‌م وه‌ک کورد کو پێکهاته‌یه‌که سه‌ره‌که نه د سووریێ ده، ڕێکه‌فتنا مه لگه‌ل ئۆپۆزسیۆنا سووریێ هه‌یه کو مافێ گه‌لێ کورد د سووریێ ده پاراستی به.”
ئیبراهیم برۆ داخوازێن کورد د ناڤا ده‌ستوورێ سووریێ ده ئه‌شکه‌ره دکه و دبێژه: “ئه‌م ڕژد ن کو د سووریا نوو ده ناڤێ وه‌لات نه کۆمارا سووریا عه‌ره‌بی به، و نه ژی وه‌لاته‌کی کۆماری و ناڤه‌ندی به. ئیعتیرافکرن ب مافێن ڕه‌وا یێن گه‌لێ کورد. زلم و زۆرا کو ل سه‌ر گه‌لێ کورد هه‌یه بێ ڕاهشتن و سووریا ببه ده‌وله‌ته‌که فه‌ده‌رال و
هه‌رێمه‌که کوردی تێ ده هه‌به. ئه‌گه‌ر ئه‌و داخوازێن کوردان د ده‌ستوور ده نه‌یێن جیبجیکرن، ئه‌م قه‌ت قه‌بوول ناکن، ھەتا نھا ئۆپۆزسیۆن ب وان داخوازێن مه ڕازیه.”
kdp.info
