به‌رپرسێن پارتیا دەمۆكراتا كوردستانێ (پەدەكە)یێ ب توندی به‌رسڤا سه‌رکرده‌یێ پارتیا كاركەرێن كوردستانێ (پەكەكە)یێ موراد قه‌ره‌ییلان دان کو ئێرشی سەر پەدەكێ کربوو.
ئه‌ندامێ ڕێڤه‌به‌ریا سەرۆكاتیا پەكەكێ، موراد قه‌ره‌ییلان، د داخویانیا خوه یا هه‌ری داوی دا ئێرشی سەر پەدەكێ دكە و ب وێ یه‌کێ گونەھبار دكە كو پەدكە ناخوازە كورد ببن یەك دەنگ و پەدەكە پێشیا یه‌کرێزیا نه‌ته‌وی یا كوردان ئاسته‌نگ دكە!
ئه‌ندامێ سه‌رۆكاتیا پەدەكێ و به‌رپرسێ لقا 16 یا پەدەكێ، بلند ئیسماعیل، ل سه‌ر ڤێ مژارێ بەرسڤا بەرپرسێ پەكەكێ ددە و دبێەژ: “هه‌ر که‌س دزانه کو پەكەكە ژ ڕۆژا کو هاتیه ئاڤاکرن ڤه هه‌تا نها ئاژانده‌یا وه‌لاتێن هه‌رێمی بجیھ تینه، به‌هانه‌یان دده ده‌ستێ ترکیێ دا کو ئێرشی کوردستانێ بکه. پەكەكە بوویه سه‌به‌ب دا کو زێده‌تری 500 گوندێن باشوورێ کوردستانێ وێران ببن و نه‌ھێن ئاڤه‌دانکرن.
بلند ئیسماعیل د داخویانیا خوە دا پەكەكێ ب بازرگانیا ماده‌یێن هشبه‌ر و رەڤاندنا زارۆكان گوەھبار دكە و دبێژە كو پەكەكە ژ باکورێ کوردستانێ و ترکیێ ڕه‌ڤیایه و هاتیه باشوور و ئەو بوونه به‌لا ل سه‌ر سه‌رێ خه‌لکێ کوردستانێ. ئه‌گه‌ر ب ڕاستی ئه‌و د خه‌ما کوردستانێ دا بن دێ ته‌نێ ساله‌کی چه‌کدارێن خوه ببن مه‌یدانا شه‌رێ خوە یێ راستەقینە ل باكورێ كوردستانێ، لێ ئه‌و ته‌نێ ژ بۆ به‌رژه‌وه‌ندیێن داگیرکه‌ران کار دکە.
ل گۆر بەرپرسێ لقا 16 یا پەدەكێ، سیاسه‌ت و ڕه‌فتارێن پەكەكێ نیشان ددن کو پەكەكە بنڤە-بنڤە ب ده‌وله‌تێن داگیرکه‌رێن کوردستانێ ڕا ڕێکه‌فتن کریه داكو لەچكەرێ واندەولەتان بكێشە بۆ ناڤ خاکا هه‌رێما کوردستانێ. چو ڕێژیمه‌کا ده‌ردۆر ب قاسی پەكەكێ دژبه‌ریا هه‌رێما کوردستانێ و دۆزا کوردستانێ نه‌کریه. پەكەك ژ بۆ دژبه‌ری و نه‌یارتیا هه‌رێما کوردستانێ هاتیه ئه‌رکدارکرن. ئه‌و ته‌نێ ل هه‌رێما کوردستانێ ڤێ یه‌کێ ناکە، ل ڕۆژاڤا و ڕۆژهلات ژی هه‌مان کاری دکە.
بلند ئیسمائیل خویا ژی کر كو پەدەكە ل سه‌ر خاک و مه‌یدانا ڕاست یا خه‌باتا خوه یه کو هه‌رێما کوردستانێ یه، لێ پەكەكێ هه‌موو ئورف و قانوونێن ناڤده‌وله‌تی بنپێ کریه و دخوازه کوردستانێ ته‌سلیمی وێ بکن.
شیره‌تکارێ مەكتەب سیاسییا پەدەكێ، عارف ڕوشدی ژی ل سەر ڤێ مژارێ دبێژە: “دڤێ پەكەكە ده‌رسێ ژ هلبژارتنێن گشتی یێن ئیراقێ بگره کو چاوا دیتن، زێده‌باری چاڤترساندنا خه‌لکێ شنگالێ، خه‌لکێ ده‌نگ دا پەدەكێ. ئه‌ڤ باشترین به‌رسڤه ژ بۆ قه‌ره‌ییلان. خه‌لکێ کوردستانێ دزانن پەدەكە پارتیه‌کا چاوا یه و پەكەكە ژی پارتیەك کرێگرتی یه.
ل گۆر عارف ڕوشدی، ته‌ڤاهیا خه‌لکێ ژ سیاسه‌تا پەكەكێ بێزارن و دزانن سه‌رکرده‌یێن پەكەكێ هه‌ر تشت خستنه خزمه‌تا ئاژانده‌یا ئیستخباراتا ده‌وله‌تێن هه‌رێمی و وه‌لاتێن داگیرکه‌رێن کوردستانێ.
ب گۆتنا ڕوشدی، ژ به‌ر کو پەدەكە ستاتوو و هه‌بوونا هه‌رێما کوردستانێ دپارێزه، ڕاستی خه‌زه‌با پەكەكێ تێ و دژبه‌ریا وێ دکه لێ دڤێ پەكەكە بزانه دێ د ڤی کاری دا زه‌ره‌رمه‌ند ببه.
شیره‌تکارێ مەكتەب سیاسییا پەدەكێ بانگ ل موراد قه‌ره‌ییلان و سه‌رکرده‌یێن دن یێن پەكەكێ دكە كو ده‌ست ژ فتنەیی و هه‌ولا ده‌رخستنا ناکۆکیان د ناڤبه‌را ئالیێن کوردستانی دا به‌ردن، ژ به‌ر کو چو که‌س باوه‌ری ب ساخته‌کاریێن وان ناکه. به‌لگه‌یا وێ ژی هه‌ژمارا کورسیێن پەدەكێ د هلبژارتنان دا‌یه کو ل سه‌ر ئاستا ئیراق و کوردستانێ یه‌که‌مه.
عارف ڕوشدی ئه‌ڤ ژی گۆت كو سه‌رکرده‌یێن پەكەكێ زەلامێن دژمن و نه‌یارێن کوردستانێ نه و ھەر ڕۆژێ ده‌ڤه‌ره‌ک و ناڤچه‌یه‌کا هه‌رێما کوردستانێ ته‌سلیمی ترکیێ و یێن دن دکە.
