دو بەرپرسێن پەكەكێ ل سلێمانیێ ھاتن كوشتن
دو بەرپرسێن پارتیا كاركەرێن كوردستانێ (پەكەكە) د ئەنجاما پەقینەكێ دا ل چیایێ ئەزمەر ل سلێمانیێ ھاتن كوشتن.
بوویەرا پەقینا ل چیایێ ئەزمەر ل سلێمانیێ یا رۆژا 15ێ ڤێ مەھێ قەومی دو كەسان تێ دا ژیانا خوە ژ دەست دا كو تێ گۆتن بەرپرسێن پارتیا كاركەرێن كوردستانێ نە. ئەو بوویەر ب ئاوایەكێ سەرپێ د مەدیا دەڤەرا سلێمانیێ د ا ھات بەحس كرن، لێ پشتی ھینگێ ھات بێ دەنگ كرن، ژ بەر ھندێ گەلەك شك و گومان ل سەر وێ پەقینێ ل جەم رایا گشتی چێ بوون.
ل گۆر زانیاران ئەو ھەر دو كەسێن د وێ پەقینێ دا ژیانا خوە ژ دەست دایی دو بەرپرسێن پارتیا كاركەرێن كوردستانێ نە؛ سەید خان ئەیاس یێ بەرنیاس ب ھەڤال دەمھات عەگید بەرپرسێ تێكەلیێن پەكەكێ ل پارێزگەھا سلێمانیێ و ھەڤال ئەسەر ئیرماك یێ بەر نیاس ب جەمیل ئامەد ژیانا خوە ژ دەست دا .
بریندارێن ڤێ پەقینا چیایێ ئەزمەر ل نەخوەشخانەیێن سلێمانیێ دوور ژ مەدیایێ و د بن چاڤدێریا سازیێن ئاساییشا سلێمانیێ تێن دەرمان كرن.
ل گۆر زانیاریان لاھور شێخ جەنگی سەرۆكێ دەزگەھا دژەتەرۆرێ رێ نەدا سازیێن مەدیایێ رۆمالا ڤێ بوویەرێ بكن.
ئەو ھەر دو بەرپرسێن پارتیا كاركەرێن كوردستانێ ب بالەفرەكا تركیێ یا بێ فرۆكەڤان ھاتنە كوشتن.
