سیاسی

دو رێ ل پێشیا پەیەدێ یان شام یان كورد

مه‌دیا پەكەكێ د به‌لاڤکرنا نووچه‌یێن ده‌ره‌و دا‌ گه‌له‌ک ژیر و ژێهاتیه‌، مه‌دیا گرێدایی پەكەكێ وه‌ک ناوه‌نده‌کا ده‌زه‌نفارماسیۆنا به‌لاڤ بکه‌ کار دکه‌ و د ڤێ یه‌کێ دا‌ ژی گه‌له‌ک سه‌رکه‌فتیه‌.

نهاژی د ئاژانسا نووچەیا یا فراتێ  (ئا ئێن ئف)ێ دا نووچه‌یه‌ک به‌لاڤ بوویه‌ و ئیدیعا دکه‌ کو؛ ده‌وله‌تا ترک د گه‌ل ئەنجومەنا نەتەوی یا كورد ل سوریێ (ئه‌نەکەس)ێ دخوازه‌ داگیرکه‌ریێ ل عه‌فرینێ ڕه‌وا بکه‌. د ڤێ ده‌ربارێ دا‌ ده‌ستپێکا نووچه‌یێ ب ڤی ئاواییه‌: “پیلانا ده‌وله‌تا ترک و ئه‌نەکەسێ یا ژ بۆ ڕه‌واکرنا داگیرکه‌ریێ. ل عه‌فرینێ 2 مه‌هێن داوی بوویه‌رێن ڕه‌ڤاندنا سڤیلان و خوه‌ستنا فیدیه‌یێ زێده‌ بوون. به‌شه‌ک ژ که‌سێن کو ژ ئالیێ داگیرکه‌ران ڤه‌ هاتن ڕه‌ڤاندن ئه‌و کورد بوون کو ژ به‌ر داگیرکه‌ریێ کۆچی حه‌له‌ب و شه‌هبایێ کربوون، لێ پشتره‌ ب پرۆپاگاندایا ئه‌نەکەسێ ڤەگەریان عەفرینێ.”

نووچه‌یا ده‌ستچێکری ب ده‌ره‌وان به‌رده‌وام دکه‌ و ئەنەكەسێ ب خرابیێن مه‌زن ئتهام دکه‌. پەكەكە ده‌ما بخوازه‌ تشته‌کی بکه‌ به‌راھیكێ  د مه‌دیا خوه‌ دا ژ بۆ وێ كریارا خوە زەمینەی خوەش دكە. نها ڤان خه‌به‌رێن ده‌ره‌و کو ئیتهامێن مه‌زن د تێدا ھەنە به‌لاڤ دکه‌ و سبەھی‌ دکاره‌ ب ناڤێ “هه‌ڤالبه‌ندیا ترکا” هنده‌ک ئه‌ندامێن ئەنەكەسێ بگره‌ و هه‌تا وان ژ ناڤ ببه‌ ژی، پەیەدێ بەری نها ژی ئه‌ڤ یه‌ک کریه‌ و گه‌له‌ک به‌رپرسێن پارتیا دەمۆكراتا كوردستانێ ل سوریێ (پەدەکەسە)ێ و ئەنەكەسێ گرتنه‌ و گه‌له‌ک ژ وان هه‌تا وه‌ک ئیرۆ ژی بێسه‌رێشوونن. نها ژی ب ده‌هان که‌س د زندانێن چه‌کدارێن پەیەدێ دا‌نه‌.

پەكەكە/پەیەدە  ژ بۆ چ ڤێ یه‌کێ دکه‌؟ تێ زانین کو هه‌تا وه‌ک ڤێ گاڤێ 3 رێكەفتن د ناڤبه‌را ئەنەكەسێ و پەیەدێ دا‌ هاتنه‌ ئیمزا‌ کرن. په‌یمانا هه‌ولێر یه‌ک، هه‌ولێر دو و په‌یمانا دهۆک. ئه‌ڤ هه‌رسێ په‌یمان ژی د بن چاڤده‌ریا سه‌رۆک بارزانی دا‌ هاتنه‌ ئیمزا‌کرن. لێ پەیەدێ چو جارا ناڤەرۆكا ڤان په‌یمانان پێکنه‌ئانیه‌ و لنگێ خوه‌ لێ دایه‌ خراب کریه‌. ئه‌ڤ ژ ئەخلاقێ پەكەكێ یه‌، دکاره‌ هه‌ر تشته‌کی بکه‌ لێ ده‌ما نه‌ ب که‌یفا وان به‌ ب ساناھی دکاره‌ بێژه‌ “ته‌کتکیه‌” و ئالیێن دن پێ تاوانبار بکه‌.

هه‌ری داوی، به‌ری ده‌مه‌کی ب چاڤده‌ریا ئەمرکایێ و ب هه‌ولدانێن سه‌رۆکێ هه‌رێما کوردستانێ نێچیرڤان بارزانی، فه‌رماندارێ ھێزێن سوریا دەمۆكرات (هەسەدە) ێ مەزلوم عه‌بدی داخوویانیێن ئه‌رێنی ژ بۆ یه‌کرێزیه‌کێ د ناڤبه‌را ئەنەكەسێ و پەیەدێ دا‌ دان. د ناڤبه‌را هه‌ردو ئالیان دا‌ د بن چاڤده‌ریا ئەم‌رکایێ دا‌ هه‌ڤدیتن ده‌ستپێکرن و گاڤێن ئه‌رێنی هاتن ئاڤێتن. د ڕاستیا خوه‌ دا‌، هه‌ر چقاس پەكەكە و سیاسه‌تا وێ نه‌ جهێ باوه‌ریێ بە ژی، هێڤیه‌ک په‌یدا بوو کو، دێ یه‌کرێزیه‌ک بێ ئاڤاکرن و ل ڕۆژاڤایێ کوردستانێ کورد ببن خوه‌دی ستاتوویه‌کی. لێ ئه‌ڤ ته‌ڤگه‌ر ژ بۆ پەكەكێ بۆ مه‌ترسیه‌ک و هه‌ولدان باندۆرا خوه‌ ل سه‌ر هەسەدێ زێده‌ بکه‌ و ڤان هه‌ولدانا تێکببه‌. دیار بوو مەزلوم عه‌بدی ژی نه‌ ئه‌و که‌ساتیە‌ کو بکارە ژ ده‌رڤه‌یی پەكەكێ سیاسه‌ته‌ک ژ بۆ به‌رژه‌وه‌ندیێن نه‌ته‌وی یێن کوردێن ڕۆژاڤایێ کوردستانێ ڕێڤه‌ ببه‌. بوویەران ئه‌ڤ یه‌ک دا نیشاندان.

هه‌ڤدیتن هاتن راوەستاندن، چه‌کدارێن پەیەدێ جاردن ئه‌ندامێن ئەنەكەسێ گرتن و کرن د زیندانان دا، هنده‌ک د بن ئیشکه‌نجه‌یێ دا کوشتن و چه‌ته‌یێن ب ناڤێ جوانێن پەكەكێ ته‌ڤدگه‌رن جاردن ده‌ستپێکرن ئۆفیسێن پەدەکەسێ بشه‌وتاندن.

شاندەیا ئەمرکایێ جاردن ڤه‌گه‌ریا ده‌ڤه‌رێ و هه‌ولدا کو هه‌ڤدیتن ژ بۆ یه‌کرێزیێ جاردن ده‌ستپێبکن. پەیەدێ، ژ بۆ ئاسته‌نگا په‌یدا بکه‌ ده‌ست ب گرتنێ کر و د مه‌دیایا خوه‌ دا ئێریشێ ئەنەكەسێ کر.

نها نایێ زانین کا ڕه‌وش دێ چه‌وا‌به‌. لێ هه‌ری داوی داخوویانیا ڕژێما سوریێ‌ د ده‌ربارێ “نه‌ ناوه‌ندیێ/ نەمەركەزیێ” ڕه‌وشا پەیەدێ گوهه‌رت و جاردن ل سه‌ر داخوازیا پەكەكێ، پەیەدێ و رێڤەبەریا خوەسەر  به‌رێ خوه‌ دانه‌ شامێ. د ڤێ ده‌ربارێ دا‌ داخوویانیێن به‌رپرسێن رێڤەبەریا خوه‌سه‌ر گه‌له‌ک بالکێشن.

نها دو ڕێ ل پێشییا پەیەدە، هەسەدە و یەپەگێ مانه؛‌ یان دێ ب ته‌مامی لنگێ خوه‌ ل هه‌ڤدیتنان بدن و ژ ئە‌مرکایێ پتر به‌رێ خوه‌ بدن ڕژێما سوریێ‌ و ببن ملیسێ ڕ‌ژێمێ وه‌ک ده‌ستپێکێ، یان ژی دێ وه‌ک کوردێن ڕۆژاڤایێ کوردستانێ   ده‌ست ژ سیاسه‌تا پەكەكێ به‌ردن و یه‌کرێزیه‌کی ئاڤابکن و دا کو ڕۆژاڤایێ کوردستانێ ببه‌ خوه‌دی ستاتوویه‌کی. وه‌ک دن چو ڕێ ل پێشیا وان نه‌مایه‌.

ئه‌گه‌ر د بن باندۆرا پەكەكێ دا‌ ته‌ڤبگه‌رن دێ به‌رێ وان هه‌رده‌می ل شامێ به‌. ئه‌گه‌ر  ده‌ست ژ ڤێ سیاسه‌تێ به‌ردن و وه‌ک کوردێن ڕۆژاڤایێ کوردستانێ ژ بۆ ده‌ستکه‌فتیێن نه‌ته‌وەیی ته‌ڤبگه‌رن دێ سه‌رکه‌فتن ل پێشیا وان به‌.

2021.08.26

نووچه‌/شرۆڤه‌

Back to top button