دو سالێن سەرۆكاتیێ دەرباسبوون/وێنە
نه ب ته‌نێ کوردستان، لێ به‌لێ ئیراق و ده‌ڤه‌ر ژی ب گشتی د ڕه‌وشه‌کا ئالۆز و نه‌خوه‌ش دا بوون. ڕه‌وشا سیاسی خه‌راب بوو. سه‌رۆکێ هه‌رێما کوردستانێ نێچیرڤان بارزانی ب دووربینیا خوه یا سیاسی به‌حسا پرسگرێکان دکر، هه‌تا کو ئه‌و هزر ل جه‌م وه‌لاتان چێبوو کو پێشنیارێن نێچیرڤان بارزانی ژ بۆ چاره‌سه‌رکرنا کێشه و پرسگرێکان، ته‌کانه ڕێ یه. ئه‌ڤ گۆتنا مامۆسته‌یێ زانینگه‌هێ د. خه‌لیل ئه‌ترووشی یه کو ل سه‌ر ده‌رباسبوونا 2 سالان ژ سه‌رۆکاتیا هه‌رێما کوردستانێ ژ ئالیێ نێچیرڤان بارزانی ڤه، کربوو.
“نێچیرڤان بارزانی نێزیک ژ هه‌موو ئالیان”
ب نه‌رینا پسپۆر و مامۆسته‌یێ زانینگه‌هێ، نێچیرڤان بارزانی هه‌رتم نه‌رم و ئارام و ژێهاتی یه و سیاسه‌تمه‌داره‌که ب هزره‌کا دووربین و فره‌ھ د کارە د گه‌ل پێشهاته و بوویه‌ران دا تەعاملێ بكە. ئه‌و ل ناڤخوە و ده‌رڤه‌یی کوردستانێ وه‌کی که‌ساتیه‌کی قه‌بوولکری تێ ناسکرن، کو نه‌رینێن جودا و ڕه‌خنه‌یان ب سینگه‌ک فره‌ھ وەردگرە. هه‌روها ب وێ یه‌کێ تێ ناسکرن، کو دکاره هه‌موو ئالی و پارتیێن سیاسی یێن ناکۆک لهه‌ڤ کۆم بکه.
نێچیرڤان بارزانی ڕۆژا 2019.05.28ێ ب ده‌نگێ پرانیا ئه‌ندامێن پەرلامه‌نتۆیا کوردستانێ وه‌ک سه‌رۆکێ هه‌رێما کوردستانێ هات هلبژارتن. ده‌ربارێ وێ یه‌کێ دا د. خه‌لیل ئه‌ترووشی وها گۆت: “نێچیرڤان بارزانی ب وه‌رگرتنا سه‌رۆکاتیا هه‌رێما کوردستانێ گه‌له‌ک گرێک ڤه‌کرن و گه‌له‌ک پرسگرێک چاره‌سه‌ر کرن. هه‌بوونا وی پێویستیه‌ک گرنگ بوو. ل سه‌ر ئاستا ناڤخوە و ده‌رڤه ژی سه‌رۆکاتیا هه‌رێمێ بوویه لێڤه‌گه‌ره‌ک کوردی و ماله‌کا کوردستانی، کو پرانیا پرسگرێکان ل سه‌رۆکاتیا هه‌رێما کوردستانێ چاره‌سه‌ر دبن.”
ئه‌ندازیارێ کارێ دیپلۆماتیک
“نێچیرڤان بارزانی ب نه‌رینا سیاسه‌تمه‌داران و د ناڤا ناڤه‌ندێن سیاسی دا ب وێ یه‌کێ تێ ناسکرن کو ژ بۆ چاره‌سه‌رکرنا پرسگرێکان نه‌رینه‌ک باش هه‌به، له‌وما ژی بوویه جهێ باوه‌ریێ ل جه‌م ده‌زگه‌هێن جیهانی ژی وه‌ک ئه‌نجوومه‌نا ئاسایشا ناڤده‌وله‌تی. ژ به‌ر نه‌رین و پێشنیارێن وی یێن گرنگ، ئه‌نجوومه‌نا ئاسایشا ناڤده‌وله‌تی نامه‌یا سه‌رۆک نێچیرڤان بارزانی ژ بۆ چاره‌سه‌رکرنا پرسگرێکێن د ناڤبه‌را حکومه‌تا ئیراقێ و هه‌رێما کوردستانێ دا کر بریار.”
ژ به‌ر تێكەلیێن وی یێن باش و بەرفرەھ د گه‌ل هێزێن ئیراقی و سه‌رکردێن ئیراقێ گه‌له‌ک پرسگرێکێن د ناڤبه‌را هه‌رێما کوردستانێ و ئیراقێ دا چاره‌سه‌ر بوونه. نها سه‌رۆکێ هه‌رێما کوردستانێ کاریه، ل سه‌ر ئاستا هه‌رێما کوردستانێ و جیهانێ، پەیوه‌ندیێن دیپلۆماتیک ئێن هه‌رێما کوردستانێ بگەهینه قۆناغه‌کا مه‌زن. نێچیرڤان بارزانی ل سه‌ر ئاستا ناڤده‌وله‌تی که‌سه‌که کو تێ قه‌بوولکرن و ژ بۆ هه‌ر پرسگرێکه‌کێ ل ناڤچه‌یێ دڤێ نه‌رینا وی بێ زانین.
سه‌رۆکاتیا هه‌رێما كوردستانێ پارێزه‌رێ مافێ پێکهاته‌یانه
نێچیرڤان بارزانی هه‌رتم پشته‌ڤان و پارێزه‌ره‌کی مه‌زنه ژ بۆ پێکهاته‌یێن کوردستانێ و ب ته‌مامی پشته‌ڤانیێ ل مافێن وان ھەموو پێكھاتەیان، بێ جوداھی، دکه، له‌وما ل سه‌ر ڤێ پرسێ پسپۆرێ کارووبارێ پێکهاته‌یان خالد نه‌رمۆ وها دبێژه: “سه‌رۆکێ هه‌رێما کوردستانێ کاریه کو هه‌موو پێکهاته‌یێن کوردستانێ گارانتی و پشتراست بکه کو کوردستان جهێ هه‌موو پێکهاته و ئۆل و نه‌ته‌وه‌یانه.”
نه‌رمۆ وها گۆت: “نه ته‌نێ پشته‌ڤانه، لێ به‌لێ ب ڕاستی و ب کریار پشتا پێکهاته‌یان دگره و مافێن وان دپارێزه. نێچیرڤان بارزانی سه‌رۆکاتیا هه‌رێما کوردستانێ کریه که‌لهه‌ک ژ بۆ پاراستنا پێکهاته‌یێن کوردستانێ و دگه‌ل به‌رپرسێن وه‌لاتان ژی به‌حسا ڕه‌وشا پێکهاته‌یان دکه. له‌وما وه‌لاتێن جیهانێ ژی ب چاڤه‌کێ مه‌زن ل پێگه‌ها هه‌رێما کوردستانێ دنێرن، ژ به‌ر کو ته‌کانه جهه کو کاریه هه‌موو پێکهاته‌یان ل خوه بگره و پەرلامه‌نتۆیا وێ ئتیرافێ ب مافێن پێکهاته‌یان دکه.”
نێچیرڤان بارزانی پشته‌ڤانێ ڕۆژاڤایێ کوردستانێ یه
نه ته‌نێ ل سه‌ر ئاستا ناڤخوەیی، باشوورێ کوردستانێ، لێ به‌لێ سه‌رۆکێ هه‌رێما کوردستانێ ل سه‌ر ئاستا ناڤچه‌یێ ژی د چاره‌سه‌رکرنا پرسگرێکان و د ئالیکاریا کوردێن پارچه‌یێن دن ئێن کوردستانێ دا ڕۆله‌ک به‌رچاڤ دبینه. ده‌ربارێ وێ یه‌کێ مامۆسته‌یێ زانینگه‌هێ و سیاسه‌تمه‌دارێ ڕۆژاڤایێ کوردستانێ د. کاوا ئازیزی وها دبێژه: “سه‌رۆکێ هه‌رێما کوردستانێ هه‌ر ژ ده‌ستپێکا شۆره‌شا سووریێ و هه‌یا نها کاریه ببه پشته‌ڤانه‌ک ژ بۆ خه‌لکێ ڕۆژاڤایێ کوردستانێ و ژ بۆ کو کورد ل وێرێ چاره‌نڤیسا خوه دیار بکن. ده‌ما خه‌لکێ ڕۆژاڤا په‌نابه‌ر بوو و به‌رێ خوه دان هه‌رێما کوردستانێ، گه‌له‌ک ئالیکاریا وان کر.”
ئازیزی وها گۆت: “نێچیرڤان بارزانی هه‌روها هه‌ول دده ژ بۆ کو ئالیێن سیاسی یێن ڕۆژاڤایێ کوردستانێ ببن یه‌ک و ژ بۆ وێ یه‌کێ پشتگیریا دیالۆگا وان دکه. نێچیرڤان بارزانی هه‌یا نها ژی ژ خه‌لکێ ڕۆژاڤایێ کوردستانێ ڕا هه‌رده‌م پشته‌ڤانه . لگه‌ل هاتنا کۆرۆنایێ ته‌نێ وی ئالیکاریا خه‌لکێ ڕۆژاڤایێ کوردستانێ کر و ژ ڕۆژاڤا ڕا پێدڤیێن ته‌ندرووستی و تاقیگه‌ھ ژ وان ڕه شاند.”
