یه‌کێتی په‌یڤه‌کا خوه‌شه. یه‌کێتیا مالبه‌ته‌کێ، یه‌کێتیا عه‌شیره‌ته‌کێ، یه‌کێتیا پارتیه‌کێ، یه‌کیێتیا ڕێخستنێن کوردستانێ، یه‌کێتیا نه‌ته‌وه‌یی گه‌له‌ک خوه‌شه. هیچ شک نینە کو یه‌کێتیا نه‌ته‌وه‌یا کورد، خوه‌شتره. یه‌کێتی، ده‌رفه‌تان و ئیمکانان زێده دکه، هێزێ مه‌زن دکه، چاره‌سه‌ریێ هێسانتر دکه. پێشیا ناکۆکی و دژمنتیا دگره. پێشیا براکوژیێ دگره. ژ بۆنا کو نه‌ته‌وه‌یا کورد بگەهه ئارمانجا خوه، پێویسته و ده‌رفه‌ت ژێ ڕا چێ دکه.
ئه‌م کورد و ڕێخستنێن کوردان ژی هه‌ر ده‌م بەحسا یەکێتیێ دکن، لێ چ وه‌خت ژی نکارن یه‌کێتیێ چێکن. هیچ شک نینە کو سه‌ده‌مێن ڤێ یه‌کێ هه‌نه. یه‌کێتی ژ ئالیه‌کی دا چانده‌کا ملی و ده‌مۆکراته، ژ ئالیه‌کی دا ژی دڤێ شه‌رتێن وێ پێک بێن. یه‌کیتی، ئه‌نجاما خه‌باتا که‌سان و ڕێخستنان و ده‌زگه‌هانه. لۆما ژی به‌ریا کو ئه‌ڤ ئه‌نجاما ده‌رکه‌ڤه هۆلێ، سه‌ده‌م بێن ته‌سپیت کرن و ئه‌و سه‌ده‌مێن پۆزیتیف بێن پێش خستن، سه‌ده‌مێن نه‌گاتیف ژی دڤێ ژ هۆلێ ڕابن.
ئه‌م کورد ڤێ یه‌کێ ناکن، ده‌ما کو ئه‌م دکه‌ڤن ته‌نگاسیێ دا، یه‌کێتی تێ بیرا مه. لێ ڤێ
یه‌کێتییێ ژی نکارن پێک بینن.
***
ده‌ما کو ل کوردستانێ بەحسا یەکێتیێ تێ کرن، دو پلاتفۆرم هه‌نه.
پلاتفۆرما یه‌ک ئه‌وه کو ل هه‌ر به‌شه‌کی کوردستانێ یه‌کێتیا کوردان بێ ئاڤاکرن.
پلاتفۆرما دویه‌مین ژی ئه‌وه کو ل ته‌ڤایێ کوردستانێ یه‌کێتیا کودان بێ ئاڤاکرن.
نوها ئه‌ز دخوازم ل سه‌ر یه‌کێتیا نه‌ته‌وه‌یی یا ل ڕۆژاڤایێ کوردستانێ یانی ل سه‌ر به‌شه‌کا یه‌کێتیا نه‌تەوه‌یی یا کوردستانێ ڕاوه‌ستم.
دڤان ڕۆژێن داوی دا، ب تایبه‌تی ژی پشتی کو ده‌وله‌تا ترک ل ڕۆژاڤایێ کوردستانێ دو باژارێن مه داگیر کرن، پەکەکە/پەیەدێ زێده قالا یه‌کێتیێ دکه. هاوار دکه. ئه‌ڤ یه‌ک ئه‌خلاقا پەکەکێ یه. ده‌ما بکه‌ڤه ته‌نگاسیێ بەحسا یەکێتیێ دکه، لێ ده‌ما کو ده‌رکه‌ته ڕه‌حه‌تیێ، وێ ده‌مێ ئێریشی هه‌موو ڕێخستنێن کوردستانێ دکه.
کوردستان و ب تایبه‌تی ژی ڕۆژاڤایێ کوردستانێ ب هه‌ر ئاوایی د قۆناخه‌کا گرینگ و کریتیک ڕا ده‌رباس دبه. ئه‌م د ڤێ قۆناخێ دا جاره‌ک دن ل سه‌ر یه‌کێتیا نه‌ته‌وه‌یی ڕاوه‌ستن کو پەکەکێ چقاس نێزکی یه‌کێتیا نه‌ته‌وه‌یی یه:
۱- رێخستنێن نه‌ته‌وه‌یی و سه‌ربخوه دکارن یه‌کێتیا نه‌ته‌وه‌یی ئاڤا بکن. لێ پەکەکە ڕێخستنه‌کا ئازاد و سه‌ربخوه نینه. ب ده‌وله‌تان ڕا گرێدایی یه. خزمه‌تا به‌رژه‌وه‌ندیا خوه یا گرووبی و به‌رژه‌وه‌ندیا ده‌وله‌تێن کۆلۆنیالیست و ئه‌مپه‌ریال دکه. خزمه‌تی به‌رژه‌وه‌وه‌ندیا نه‌ته‌وه‌یی یا کورد ناکه. لۆما ژی په‌یڤێن وێ یێن د ده‌ربارێ نه‌ته‌وه‌یی دا هه‌تا به‌ر ده‌ری ده‌رباس دبه. پەکەکێ ژ بۆنا د مژارا یه‌کێتیا نه‌ته‌وه‌یی دا گاڤ پاڤێژه، دڤێ ئه‌ڤ ستاتو و که‌ره‌کته‌را خوه بگوهه‌رینه.
۲- پەکەکە/پەیەدێ هه‌ر چقاس دبێژه یه‌کێتیا نه‌ته‌وه‌یی ژی، ئه‌و هه‌ر ده‌مێ ل پێش یه‌کێتیا نه‌ته‌وه‌یی بوویه ئاسته‌نگ. گه‌لۆ پەکەکە/پەیەدێ دێ ژ ڤێ ڕه‌وشێ خه‌لاس ببه، ئان ژ ڕه‌وشێ خه‌لاس نابه؟ دێ ب کوردان و ڕێخستنێن کوردستانێ ڕا یه‌کێتیێ چێ بکه، ئان چێ یه‌کێتیا چێ ناکه؟ ئه‌ڤ یه‌کا پرسگرێکه‌کا مه‌زنه.
۳-پەکەکە/پەیەدێ ده‌ما ژ یەکێتیا نه‌ته‌وه‌یی قال دکه، نابێژه کو دێ ب ڕێخستنێن کوردستانێ ڕا ل سه‌ر بنگه و پیڤانا وه‌کهه‌ڤی یه‌کێتیا نه‌ته‌وه‌یی ئاڤا بکه. ئه‌و ژ ڕێخستنان ڕا دبێژه، وه‌رن د بن سیوانا من دا جی بگرن و بکه‌ڤن بن باندۆر و ده‌ستهلاتداریا من. خزمه‌تی دیکتاتۆری و هه‌گه‌مۆنیایا من بکن. د ڤێ قۆناخێ دا کو هه‌وجه‌داری یه‌کێتیه‌کێ و ئالیکاریه‌کێ هه‌یه، به‌رپرسیارێ پەکەکە/پەیەدێ د داوی دا ژی ئه‌ڤ یه‌کا گه‌له‌ک ئاشکه‌را ئانی رۆژەڤێ. گه‌لۆ ناڤێ ڤێ یه‌کێتیا نه‌ته‌وه‌یی دبه، ئان ژی پاراستنا دیکتاتۆری و هه‌گه‌مۆنیایا پەکەکە/پەیەدێ دبه؟
٤-پەکەکە/پەیەدێ ئیراده‌یا گه‌لێ مه ل ڕۆژاڤایێ کوردستانێ خه‌سپ کریه. میسیۆنا خوه یا داگیرکاری دمه‌شینه. گه‌لۆ ده‌ما ژ ڤی ئاقلی و فکرێ ده‌ڤ به‌رنه‌ده، دێ چه‌وا یه‌کێتیا نه‌ته‌وه‌یی پێک بینه، د ڤێ پلاتفۆرما پیرۆز ئا یه‌کێتیێ دا جی بگره؟
٥-پەکەکە/پیدێ، ل ڕۆژاڤایێ کوردستانێ دیکتاتۆری و په‌رگاله‌کا ئاپۆئیست ستالینیست ئا کۆمونال ئاڤا کریه.
ئه‌ڤ په‌رگالا کو ژ ئالیێ پەکەکە/پەیەدێ ڤه ل ڕۆژاڤایێ کوردستانێ ئاڤابوویی، ل دژی ده‌مۆکراسی، پلورالیزم، پڕێخستنی، یه‌کێتیه‌کا هه‌ڤبه‌ش و وه‌کهه‌ڤی یه. هه‌گه‌مۆنیایێ دپارێزه و دخوازه دیکتاتۆریێ بدۆمینه.
گه‌لۆ پەکەکە/پەیەدە ژ بۆنا کو یه‌کێتیا نه‌ته‌وه‌یی ئاڤا بکه، دێ ژ ڤێ سیسته‌مێ ده‌ڤ به‌رده، ئان ده‌ڤ ژ ڤێ سیسته‌مێ بهرناده؟
٦-ژ بۆنا یەکێتیا نه‌ته‌وه‌یی، ئاوایێ تێکۆشین و خه‌باتا نه‌ته‌وه‌یی، ئاوایه‌کی جڤاکی، ئینسانی، ڕه‌وا یه.
پەکەکە/پەیەدێ د خه‌بات و تێکۆشینا خوه دا مه‌تۆدا ته‌رۆریستی ب کار تینه. دڤێ ژ بۆنا یه‌کێتیا نه‌ته‌وه‌یی ده‌ڤ ژ ڤێ مه‌تۆدێ به‌رده.
پەکەکە/پەیەدە دێ بکاره د لاشێ خوه دا ڤێ گوهه‌رتنێ چێ بکه؟
۷-یەکێتیا نه‌ته‌وه‌یی، ب ئارمانجێن نه‌ته‌وه‌یی تێن ئاڤا کرن. ژ بۆنا کوردان و ڕێخستنێن کوردستانێ ئارمانج: ده‌وله‌تبوونا کوردستانێ، ئازادی و ڕزگاریا نه‌ته‌وه‌یا کورده. کێمترین ژ بۆنا ستاتویا فه‌ده‌رال خه‌بات کرنه.
پەکەکە/پیدە ل دژی ده‌وله‌تا نه‌ته‌وه‌یی یا ملی یه. ل دژی فه‌ده‌رالبوونێ یه.
لۆما ژی ل دژی ڕه‌فه‌راندووما سه‌رخوه‌بوونا کوردستانێ ژی ده‌رکه‌ت (۲۰۱۷). ژ داگیرکرنا که‌رکوکێ را ئالیکاری کر.
گه‌لۆ پەکەکە/پەیەدە دێ ب ڕێخستنێن کوردستانێ را ب چ ئارمانجێ یەکێتیا نه‌ته‌وه‌یی چێ بکه؟
۸-پەکەکە/پیدە، ژ بۆنا کو ل دژی ده‌وله‌تا فه‌ده‌رال و ده‌وله‌تا سه‌ربخوه یا کوردستانێ یێ، ناڤێ ڕۆژاڤایێ کوردستانێ گوهه‌رت، کر “باکوورێ سووریێ”.
گه‌لۆ پەکەکە/پەیەدە دێ ڤێ شاشیا خوه ببینه، ژ ڤێ ته‌عریفا خوه یا کوردستانێ ده‌ڤ به‌ردە، ئان ده‌ڤ بهرناده؟
هه‌گه‌ر پەکەکە/پەیەدە ده‌ڤ ژ ڤێ ته‌عریفێ به‌رنه‌ده، ئه‌ڤ تێ وێ واته‌یێ کو پەکەکە/پیدە ژ بۆنا ڕزگاربوونا به‌شه‌ک عه‌ردێ سوریێ یه‌کێتی داخواز دکه.
ئه‌و ژی نه ڕاسته.
۹-ل سوریێ هه‌تا کو ڕ‌ژێما بەعسێ و دیکتاتۆریا هه‌یی تەسفیه نه‌به و ژ هۆلێ ڕانه‌به، کورد و گه‌لێن سووریێ نکارن بگەهژن مافێن خوه.
ڕێخستنێن ڕۆژاڤایێ کوردستانێ ژ ده‌ستپێکێ دا داخوازکار ه کو رژێما بەعسێ تەسفیه ببه. پەکەکە/پەیەدە ل دژی تەسفیەیا رژێما بەعسێ یه. ب ده‌ستێن رژێما سووریێ ل ڕۆژاڤایێ کوردستانێ پەکەکە/پەیەدە بوو دیکتاتۆر، ل گه‌لێ خوە زلم کر، نەهێلا کو ڕێخستنێن کوردستانێ خه‌باتێن خوه بمه‌شینن. به‌رپرسیارێن پارتیان حه‌پس کر، ئێرشی وان کر و ئه‌و کووشتن.
گه‌لۆ پەکەکە/پەیەدە د ڤێ پرسێ دا ئاماده‌یه کو حه‌ساب بده؟ دێ ژ بۆنا تەسفیا رژێما بەعسێ خه‌بات بکه، ئان خه‌بات ناکه؟
۱۰-پەکەکە/پیدە ژ ده‌رڤه‌یی خوه هه‌بوونا ڕێخستنێن کوردستانێ ڕه‌وا و حقووقی نابینه. لۆما ژی ب هه‌ر ئاوایی دژمنتیا وان دکه. ده‌ما هێزه‌ک بخوازه کو یەکێتیا نه‌ته‌وه‌یی ئاڤا بکه، دڤێ کو ڕێخستنێن کوردستانێ دۆست ببینه، ب وان را د ناڤ ئاشتیه‌کێ دا به.
گه‌لۆ پەکەکە/پەیەدە ئاماده‌یه کو ژ ڕێخستنێن کوردستانێ را دژمنتی نه‌که، ب چاڤه‌کی وه‌کهه‌ڤی ل وان مێزه بکه، ئێرشێن ل هه‌مبه‌ری وان بده ڕاوه‌ستاندن؟
ئه‌و ئاماده‌یه کو حه‌سابێ ئه‌ڤ کارێن خوه یێن خراب ژ ئالیێ حقووقی دا بده؟
۱۱-پەکەکە/پەیەدە ل باشوورێ کوردستانێ ل گه‌له‌ک گوندان و ل شه‌نگالێ داگیرکه‌ره. ئەو د وێ باوه‌ریێ دا‌نه کو شه‌نگال ئاخا عه‌ره‌بانه. دڤێ ب حکومه‌تا ناڤه‌ندی یا عه‌ره‌بان را بێ گرێدان.
گه‌لۆ ده‌ما کو پەکەکە/پەیەدە ده‌ڤ ژ ڤێ داگیرکه‌ریا خوه به‌رنه‌ده، دێ چه‌وا ب ڕێخستنێن کوردستانێ را یه‌کێتیه‌کا نه‌ته‌وه‌یی ئاڤا بکه.
۱۲-پەکەکە/پەیەدە ته‌رۆریستێن ترک و عه‌ره‌ب و نه‌ته‌وه‌یێن دن تژی کوردستانێ کریه. گه‌لۆ ئاماده یه کو وان ژ وه‌لێت ده‌رخه؟
۱۳-پەکەکە/پەیەدێ ل کوردستانێ کو ئه‌و دبێژن کو “باکوورێ سووریێ” ده‌ستهلاتداری ب عه‌ره‌بان را پارڤا کریه، هه‌تا عه‌ره‌ب زێده‌تر خوه‌دیێ ده‌ستهلاتداریێ نه.
گه‌لۆ پەکەکە/پەیەدە دێ ڤێ پرسگرێکێ چەوا چاره‌سه‌ر بکه؟
۱٤-پرتووک و کۆلانێن ل کوردستانێ ب سلۆگان و وێنه‌یێن ئۆجەلان هاتنه قرێژ کرن.
گه‌لۆ پەیەدە ئاماده‌یه کو ڤێ قرێژیێ پاقژ بکه و ده‌ڤ ژ ڤان شاشیێن خوه به‌رده؟
ئامه‌د، ١٤/١١/٢٠١٩
ئ̇یبراهیم گوچلو
