مەحەمەد چەلكی
هەرچەندە ئەز باش دزانم کو رۆلێ پاپای د نەخش و ئوینیێن سیاسەتا جیهانێ دا یەکسانە ب سفرێ، لێ رۆلێ وی یێ مۆراڵی د ناڤ جڤاکێن پاشکەفتی دا هەیە وەکو دن تەنێ پاپای پێ چێدبیت نزایان (دوعایان) بکە. ئەم باش دزانین نەکەس ب دوعا بوویە و نەژی پێ مریە ئانکو تنێ خوە وەستاندنە چونکو ئەگەر دوعا بجھ بهاتبانە، رۆژانە ئەڤ جیهانە دا سەروبن بە و ژییێ کەسەکی ژ چەند رۆژ و سالان پێڤە نەدبوو.
هاتنا پاپایێ ڤاتیكانێ بۆ عێراقێ و کوردستانێ گەلەک ئاماژەیان بخوەڤە دگرە و هەر کەسەکی ل گۆڕەی بەرژەوەندیا خوە ئەڤ سەرەدانە شرۆڤەکریە. ئەز ژی وەک کوردەک دێ بەحسێ دو شێوازێن پێشوازیا وی کەم کو هەر ئێک ژ وان پێشوازیان ب شێوەیەکێ گەلەک جودا هاتیە کرن!
پێشوازیا ئێکێ: پێشوازیا سەرۆکێ حوکمەتا عێراقێ مستەفا کازمی بۆ پاپای ل باژێرکێ دێرینێ ئۆر. ئۆر یەکەمین باژێرە پەرەستگەھ (زەقۆڕا) لێ هاتیە ئاڤاکرن، سەرەدانا پاپای بۆ ئۆر ب خوە گەلەک ئاماژەیان دهەلگرە؛ یا ژ هەموویێ دیارتر وی ڤیا بێژیتە حوکمەتا عێراقێ و کۆمکێن تەرۆریستێن ئیسلاما سیاسی (یێن باوەری ب جیهادێ هەی) هوین چەند توندوتیژیێ ل دژی ئایینێن دی بکار بینن، هوین نەشێن دیرۆکێ مەحو بکەن، ئەڤ وەڵاتە ژێدەرێ هەموو ئاینێن جیهانێیە، ژ ڤی وەلاتی (میسوپۆتامیا) رۆژا شارستنیێ هەلاتیە و باپیرێن هەوە رێڕەوا دیرۆکێ ل ڤێ دەڤەرێ خەتماندیە لێ نەکارینە شوینوارێن دیرۆکێ بێ دەوس بکەن! ڕاستە پەیاما پاپای ل ئۆر پتر ل سەر مژارا لێکبوورین، پێکڤەژیان و هەڤپەژراندنێ بوو، وەکو هەموو پەیامێن پاپایێن بەری وی پشتی رەوشەنگەری ب سەر هێزا کەنیسێ سەرکەفتی و د ڕکەها ڤاتیکانێ دا قەفیس کرین.
د بەرامبەری پەیاما پاپای دا مستەفا کازمی نەڕاستەوخۆ ب رێکا شوور هەژاندن و ئێکرێزیا شوورهەلگران بەرسڤا پاپای دا و هەروەکو دڤیا بێژیتێ: پەیاما مە ب شووری کەلێن کۆستەنتینۆپۆلێ (ئستانبۆلێ) ب سەر هەوەدا هەڕفاندن و ل ئالێ دن ژی هەتا سنۆرێ فرەنسا شوورێ مە ل هنداڤ هەوە دتەییسی! پێشوازیا کازمی ب وی رەنگێ تیڤیان پەخشکری دیار بوو کو پەیاما پاپای ل دەف وان ب فلسەکێ سەختە ژی ناکڕن! لەوا هەتا سالەکا دن رێژا مەسیحیان دێ ل عێراقا کازمی و سیستانی کێمتر لێهێت، یێن بمینن ژی ژ ترسا ریهگەڤۆزێن حەشد و ئێتهیمێن داعشێ و قاعیدێ دێ خوە گەهینن هەرێما کوردستانێ!
ب هەموو پیڤەران سەردانا پاپای بۆ عێراقێ (ژبلی کوردستانێ) یا بێ وەج و مفا بوو و رەوشا مەسیحیان دێ بەرەف کمباخترێ چیت.
پێشوازیا دووێ: پێشوازیا سەرۆکێ هەرێما کوردستانێ رێزدار نێچیرڤان بارزانی بوو ب رەنگەک گەل جوودا ژ پێشوازیا مستەفا کازمی و بەری پاپا پەیاما خوە یا سەدبارەکری بڤەگێریت، سەرۆکێ هەرێما کوردستانێ پەیاما مرۆڤدۆستانەیا کورد بێی پەیڤەکێ بێژیت، ب گول و زارۆکێن د عەمرێ گولان دا گەهاندە پاپای هەروەکو دڤیا بێژیتە پاپای و شاندێ پێرا: ڤێرە کوردستانە و جهێ کین و دوژمنداریێ لێ نینە، ل ڤێرە هەر کەس یێ ئازادە و هەلرگێ چ بیر و باوەرا هەبە، ئەڤە وەڵاتێ زرادەشتی و مەم و زینێ یە، فەرهاد و شرینێ یە، خورشید و سورمیخانێ یە، حەنێ و محەمەد عارفێ جزیریە، هۆرمزێ مەلکچکۆی و هۆرمزێ چەلکی یە. بستەھ پێنگاڤا پاڤێ ل ڤێرە کەسەک نینە بکەتە هاوار و الله و اکبر و خوە بپەقینە، بگرنژە ئەی پاپایێ ژ بورجا عاجییا ڤاتیکانێ بخار کەفتی و هاتیە ئاخا میدیا و زرادەشتێ نورانی. بەری بهێی پەیما برایینی و پێکڤەژیانێ ل ڤێرە کولتۆرە و ئەگەر باوەر نەکەی ل کەنیسە و جهێن پیرۆزێن مەسیحیان بنێرە! کانێ چەند دئاڤانە و خۆشترین گوندێن کوردستانێ ب ئارامی لێ دئاکنجینە و هەروەسا پەناگەهە بوو بۆ هەموو مەسیحی و مرۆڤێن تەرۆرۆستێن ئیسلاما سیاسی ژینا وان لێ کریە دۆزەخ!
ژ هەر دو پێشوازیا دیار دبە کو ئەم دو کولتۆرێن ژ هەڤ جودانە، مە باوەری ب گول ڤیان و پێکڤەژیان و لێکبوورینێ هەیە و سینگێ مە بۆ هەر کەسێ لێ بقەومیت یێ ڤەکریە و وەڵاتێ مە ئارامگەهەک گەرمە بۆ وان و د بەرامبەردا ل عێراقێ کولتۆرێ شوور هەژاندنێ سەردارە و هەر رۆژەکێ گەرا فەرهوودکرنا جوینەکێ جودایە!
بەلێ پێشوازیا رێزدار سەرۆکێ هەرێما کوردستانێ ب وی رەنگێ مە دیتی پەیاما پاپای هێلا دگەوریێ دا چونکو بەری پاپا بگەهیتە کوردستانێ زرادەشتێ نورانی پەیما مرۆڤاتیێ ل ڤێرە بەڵاڤکریە و سەرەرای هەموو ئەنفال و جینۆسایدێن ریهگەڤۆزێن ئیسلامی ب سەرێ مە و وەڵاتێ مە ئینای، ئەم هەر ماینە مرۆڤدۆست و ئاشتیخواز و بێ کین و دل تژی ئەڤینا مرۆڤاهیێ
2021.03.08
