سه‌رۆکوه‌زیر مه‌سروور بارزانی ڕۆژا سێشه‌مێ، ۱۱ێ مژدارا ۲۰۲٥ئان، ب بۆنه‌یا بداویبوونا پێڤاژۆیا ده‌نگدانێ یا شه‌شه‌مین خولا هلبژارتنێن پارلامه‌نتۆیا ئیراقێ په‌یامه‌ک وه‌شاند.
“سپاس ژ بۆ خودێ، پێڤاژۆیا هلبژارتنێ ب سه‌رکه‌فتی ب داوی بوو. ئه‌ز پیرۆزباهیێ ل گه‌لێ ئیراقێ ب گشتی و گه‌لێ کوردستانێ ب تایبه‌تی دکم، هروەسا ژ بۆ به‌شداربوونا د ڤێ پێڤاژۆیێ دا و بجهانینا ماف و ئه‌رکێن خوه یێن نه‌ته‌وه‌یی و هلبژارتنا نوونه‌رێن خوه سپاسیا وان دکم”.
هه‌ر وها سپاسیا کۆمیسیۆنا بلند یا سه‌ربخوه یا هلبژارتنێ و هێزێن ئه‌وله‌هیێ، پۆلیس و پێشمه‌رگه‌یان کر ژ بۆ سه‌رکه‌فتنا پێڤاژۆیا ده‌نگدانێ و ڕۆلا وان یا به‌رپرسیار د پاراستنا ئه‌وله‌هی و سەلامەتییا پێڤاژۆیا هلبژارتنێ دا.
مه‌سرور بارزانی هێڤی کر کو ڕێز ل ده‌نگێن هلبژێران بێ گرتن، و نوونه‌رێن کو باوه‌ریا هلبژێران ب ده‌ست بخن، نوونه‌رێن ڕاستین یێن گه‌ل بن و مافێن ده‌ستووری یێن گه‌لێ کوردستانێ و قەوارەیا هه‌رێما کوردستانێ و به‌رژه‌وه‌ندیێن هه‌می وه‌لاتیێن ئیراقێ بپارێزن.
سه‌رۆکوه‌زیر هێڤی دکه کو سه‌رده‌مه‌ک نوو د ئیراقه‌کا فه‌ده‌رال و ده‌مۆکراتیک دا ده‌ست پێ بکه دا کو هه‌موو مافێن ڕه‌وا یێن گه‌لێ مه ب ده‌ست بکه‌ڤن و ئه‌نجامێن هلبژارتنێ ژیانا وه‌لاتییێن ئیراقێ باشتر بکن و پۆزیسیۆنا هه‌رێما کوردستانێ خورت بکن.
یەک ملیۆن دەنگ
سه‌رۆکێ حکومه‌تا هه‌رێما کوردستانێ و جیگرێ سه‌رۆکێ پارتییا ده‌مۆکراتا کوردستانێ (پدک) د په‌یامه‌کێ دا سپاسیا خودایێ مه‌زن و گه‌لێ کوردستانێ کر، کو ده‌نگێن پەدەکێ گەهشتن زێده‌تر ژ یه‌ک ملیۆن ده‌نگان.
ئه‌ڤ ژی په‌یاما سەرۆکوەزیر مه‌سرور بارزانی یه:
سپاس ژ بۆ خودایێ مه‌زن، ب هه‌لوه‌ست و خوه‌سته‌کا وه‌لاتییێن خه‌باتکار یێن کوردستانێ و ئه‌ندامێن پەدەکێ، ده‌نگێن پارتییا ده‌مۆکراتا کوردستانێ ژ یه‌ک ملیۆن ده‌نگان ده‌رباز بوون و دێ د ئه‌نجامێن داویێ دا زێده‌تر ژی ببن.
ئه‌ز پیرۆزباهیێ ل سه‌رۆک و ڕێبه‌رێ گه‌لێ مه جه‌نابێ سه‌رۆک بارزانی دکم.
ئه‌ز پیرۆزباهیێ ل برایێ خوه یێ ڕێزدار و خوەشتڤی که‌کێ نێچیرڤان دکم کو قه‌بخوازیا یه‌ک ملیۆنێ ڕاگەهاند بوو.
ئه‌ز سپاسی و ده‌ستخوه‌شیان پێشکێشی هه‌می سه‌رکردایەتی، ئه‌ندام و ئالیگرێن پەدەکێ دکم.
ئه‌ز پیرۆزباهیێ ل هه‌می گه‌لێ کوردستانێ دکم.
ئه‌ڤ سه‌رکه‌فتنا مه‌زن ل پێڤاژۆیا ده‌مۆکراسی و هه‌می گه‌لێ ئیراقێ پیرۆز به.
ئه‌م دێ ل سه‌ر خزمه‌تا هه‌می کوردستانیان و وه‌لاتێ خوه ب گه‌رم و گوره‌کا زێده‌تر به‌رده‌وام بن.
به‌ر ب وه‌لاته‌کی ته‌ناتر و ئاڤه‌دانتر.
مه‌سرور بارزان
جیگرێ سه‌رۆکێ پارتیا ده‌مۆکرات ئا کوردستانێ
سه‌رۆکێ حکومه‌تا هه‌رێما کوردستانێ
