ل ترکیێ و باکورێ کوردستانێ هلبژارتن خلاسبوون، ئه‌ردۆگان ما ل سه‌ر ده‌ستهلاتێ و هێشتا موخاله‌فه‌تا هه‌یی ب پرسگرێکێن خوه یێن د ناڤخوه دا مژوولن. ئه‌ڤ چاره‌نووسا هلبژارتنانه، یێن سه‌ردکه‌ڤن پرۆژه‌یێن خوه تێخن رۆژه‌ڤێ و موخاله‌فه‌ت ژی ژ بۆ شکەستن و بنکه‌تنا خوه ل ئەگەران دگه‌ره و د ناڤا خوە دا تەڤلیهه‌ڤ دبه.
به‌ری هلبژارتنان، هه‌موو ئالیێن چه‌پێن ترکێن که‌مالیست، گه‌له‌ک کوردێن کو ل سەر خه‌تا نه‌ته‌وی جهدگرتن ره‌خنه دکران و د که‌سایه‌تا خه‌تا نه‌ته‌وی و کوردستانی دا ژی، دژاتیه‌ک مه‌زن و ئەنتی پرۆپاگانده‌یا بارزانیان و پەدەکێ دکران. پەکەکێ / هەدەپێ ژی وه‌ک به‌رده‌ڤکێ چه‌پێن که‌مالیست دژمناتیا بارزانیان و پەدەکێ دکرا و ب هه‌موو هێزا خوه دژی بارزانیان و پەدەکێ نووچه‌یێن ده‌ره‌و به‌لاڤ دکران.
هلبژارتن خلاسبوون هێشتا چه‌پێن ترکێن که‌مالیست و پەکەکە/هەدەپە/پەچەکە دژاتیا پەدەکێ دکن و ژ شکەستن و بنکه‌تنا خوه را ل سه‌ده‌مان دگه‌رهن و هه‌روه‌ها سیاسه‌تا پەدەکێ دکن سه‌ده‌مێ شکەستنا خوه.
پارتیێن کو، ل باکورێ کوردستانێ، خوه ل سه‌ر خه‌تا نه‌ته‌وی و کوردستانی ددن خوویاکرن، به‌رده‌وام ل هەمبه‌ر شه‌رێ پەکەکێ/هەدەپێ ل دژی پەدەکێ بێ ده‌نگن. دخوه‌یێ ب ئاوایه‌کی ئه‌ڤ یه‌ک ل حه‌سابێ وان ژی تێ. هه‌ر تم د گۆتارێن خوه دا، ده‌سته‌که‌فتیێن باشوورێ کوردستانێ دپارێزن و لێ خوه‌دی ده‌ردکه‌ڤن. لێ ئه‌ڤ چ که‌رامه‌تا ل هەمبه‌ر ئێریشێن پەکەکێ ل دژی ده‌ستکه‌فتیێن باشوورێ کوردستانێ بێ ده‌نگن. ده‌ما مژار دبه پەکەکە که‌ر و لال دن.
به‌ری چه‌ند رۆژان جاردن د رۆژنامه‌یه‌ک یا چه‌پێن ترکان دا، نڤیسه‌ک ل دژی پەدەکێ هاته نڤیساندن. د رۆژنامه‌یا برگوونێ دا، حسێن شمشه‌ک، د ده‌ربارێ تێکەلیێن حکومه‌تا هه‌رێما کوردستانێ و ترکیێ دا و هه‌روه‌ها د ده‌ربارێ سه‌ردانا سه‌رۆکێ حکومه‌تا کوردستانێ مه‌سروور بارزانی یا بۆ ترکیێ دا پرسه‌کی ژ پەرله‌مه‌نته‌رێ پەچەکێ یێ باتمانێ، که‌سکن بایندر دکه. بایندر وه‌ک رۆبۆته‌ک کو هاتی عه‌یارکرن د جهده دبێژه: ئه‌م ل هەمبه‌ر پرۆژه‌یه‌کی نه کو د کووراهیا ده‌وله‌تێ دا تێ ئاماده کرن. و به‌رده‌وام دکه و دبێژه:
”دخوازن ته‌ڤگه‌را سیاسی یا کورد ل هه‌رێمێ تەسفیه بکن و پێکهاته‌یه‌ک ژ بارزانی و پەدەکێ ئاڤا بکن. هشمه‌ندیه‌ک ستراته‌ژیک ل سه‌ر کاره. مه‌سه‌له نه ته‌نێ هلبژارتنن. هلبژارتن گاڤا یه‌که‌م بوو. ئه‌م دزانن کو ژ بۆ هلبژارتنا هه‌رێمی ژی خه‌باته‌کا هه‌ڤپار هه‌یه. دفکرن کو دکارن ل هه‌رێمێ پۆلیتیکایه‌که نوو یا کوردان بئافرینن. یێ کو بکار بینن، ئه‌و ئێ چو جاری بسه‌ر نه‌که‌ڤه. وه‌لاتی هێدی هێدی دبینن کو هوداپار و کەدەپە کو رابردوویا وان یا قرێژ ژ ئالیێ هه‌ر که‌سی ڤه تێ زانین، چاوا بوونه ئاکتۆره‌کی نوو. ل هه‌مبه‌ری ڤان پێکهاته‌یێن کو هه‌موو ده‌رفه‌تێن ده‌وله‌تێ ب کار تینن گه‌لێ مه ل کێله‌کا مه یه. ئه‌م ڤان هه‌ولدانێن پووچ بێواته دبینن. د هلبژارتنێن هه‌رێمی دا ئه‌ڤ ره‌وش نایێ گوهه‌رتن.”
نها تستەک زێدە نینە کو، مرۆڤ ژ بۆ ڤێ زهنیه‌تا ژنگارگرتی بێژه. بایندر گۆتنه‌کی دبێژه کو، ئه‌و ب خوه ژی ژێ نه باوه‌ره. لێ د گۆتارا خوه یا ل دژی پەدەکێ و ئیدایا خوه دا ژ سنۆرێ ئه‌خلاقی ده‌رباس دکه. گه‌لۆ ما د هلبژارتان دا، گه‌له‌ک ڤه‌کری هەدەپێ پشگریا چه‌پێن ترکێن که‌مالیست نه‌کر؟ نها نیڤێ پەرله‌مه‌نته‌رێن کو ژ پەچەکە/هەدەپە هاتن هلبژارتن کینه؟ ما نه که‌مالیستێن ترکێن دژمنێ کوردانه؟ گه‌لۆ هەدەپە نه که‌ت خه‌تا پارتیێن کو ژ ئاک پارتیێ ڤه‌قه‌تاین و ئی پارتیێ دا؟ دژمناتیا هەدەپێ/پەکەکێ یا باشوورێ کوردستانێ د بنگه‌هێ خوه دا، ما نه دژمناتیا ده‌ستکه‌فتیێن ته‌ڤگه‌را ئازدیخوازه؟
ڤێجا ژ بۆ چ ئالیێن کوردستانی ل همبه‌ر ڤان ئێریش و ده‌ره‌وان ده‌رناکه‌ڤن نایێ زانین. لێ ئه‌ڤ سیاسه‌تا ل هەمبه‌ر پەکەکێ بێده‌نگ، بڤێ نه‌ڤێ دکه‌ڤه خزمه‌تا پرۆژه‌یێن قرێژ یێن پەکەکێ دا.
هەدەپە و پییۆنێن وه‌ک بایندر ژی باش دزانن کو، هێدی گه‌لێ کوردستانێ ب سیاسه‌تا وان یا قرێژ حەسیایە و به‌رێ خوه ژ وان دده ئالیه‌کی. لێ مخابن جهه‌ک کو کورد به‌رێ خوه بدنێ ل باکورێ کوردستانێ نینە. بێ به‌دیلی دکاره به‌رێ خه‌لکێ بده جهێن جودا ژی. ژ خوه ئه‌ڤه ده‌هێن سالانە پەکەکە ڤێ یه‌کێ ب کار تینه و خوه بێ به‌دیل دهێله. ئه‌ڤ ژی دبه سه‌ده‌مه‌ک بنگه‌هین خه‌لک مەحکومێ ڤێ سیاسه‌تا قرێژا ل دژی هه‌موو ده‌ستکه‌فتیێن نه‌ته‌وی دبه.
دخوه‌یێ ژ ئه‌نجاما هلبژارتنان که‌زه‌بێ بایندر قه‌تیایه. مه‌ترسیه‌کا مه‌زن یا پەکەکێ هه‌یه کو هه‌مان ره‌وش هلبژارتنێن هه‌رێمی دا ژی دوبارە بکه. ژ نها ڤه ژ ونداکرنا خوه را ل تاوانباران دگه‌رن.
مخابن ئیرۆ ل باشوورێ کوردستانێ د ناڤا دام و ده‌زگه‌هێن پەدەکێ دا، تایبه‌تی یێن مه‌دیایێ دا ئالیگرێن پەکەکێ هه‌نه. ئه‌و ب ئاوایه‌کی، مه‌دیایا گرێدایی پەدەکێ تێ ناسین، دکارن جارێ بکن زه‌مینێ پرۆپاگانده‌یا هەدەپێ. ئه‌ڤ یه‌ک بابه‌ته‌ک گه‌له‌ک تایبه‌ته و دڤێ بێ گۆتوبێژ کرن. ده‌ما دژمنێ مرۆڤ د ناڤا مرۆڤ دا به، زه‌حمه‌تی دوقات دبه. ئه‌ڤ دبه سه‌ده‌مه‌ک کو، ده‌ره‌و و ئەنتی پرۆپاگانده‌یا وان وه‌ک راستیه‌کی تێ دیتن.
۲۳.حه‌زیران.۲۰۲۳
نێرین / شرۆڤه
ن. فرات
