ل ڕۆژاڤایێ کوردستانێ رێكەفتن و دژاتیا پەکەکێ و ئێریشا جوانێن شۆره‌شگه‌ر
به‌ریا چه‌ند مه‌هان ل گۆر داخویانیەكێ دیار بوو کو ل ڕۆژاڤایێ کوردستانێ رێكەفتنەك پێک هاتیه. پشتی وێ داخوویانیێ گۆتووبێژان ده‌ست پێ کر. پشتی ڤان مناقه‌شه‌یان ده‌رکه‌ت هۆلێ کو ل ڕۆژاڤایێ کوردستانێ رێكەفتن چێنه‌بوویه، لێ ژ بۆنا تفاقێ هه‌ولدان هه‌یه. ئەمریكا و فرانسا ژی ژ بۆنا سەركەفتنا وێ رێكەفتنێ سه‌رپه‌ره‌شتیێ دکن.
پشت ڕا هات دیار کرن کو ب گشتی ل هه‌ڤکرنه‌ک چێبوویه و خه‌باتا ئه‌ساسی یا تفاقێ ده‌ست پێ کریه.
د سه‌ر وێ داخویانیێ ڕا گه‌له‌ک وه‌خت ده‌رباس بوویه. لێ ھێشتا ئه‌نجامه‌ک ژ وێ رێكەفتنێ نەدەركەتیە. ئەنجومەنا نشتمانیا كورد ل سوریێ (ئه‌نەکەسە) و پارتیا یەكێتیا دەمۆكراتیك (پەیەدە) د ده‌ربارێ ڤێ مژارێ دا ھێشتا چ داخویانیێن هه‌ڤبه‌ش نه‌دانە كا گەلۆ ل سەر پرسێن ئه‌ساسی و بنگه‌هی ل هه‌ڤ کرنه، ئان ل هه‌ڤ نه‌کرنه؟ دێ ب هه‌ڤ ڕا خه‌باتێ بکن؟ دێ ب هه‌ڤ ڕا ل کوردستانێ ده‌ستهلاتدار بن؟ دێ پرەنگی و پردەنگێ د رێڤەبرنا رۆژاڤایێ كوردستانێ دا ھەبە؟ دیاره کو ئاسته‌نگیێن مه‌زن هه‌نه.
د ڤێ ناڤبه‌رێ دا كۆمپانیەكا ئه‌مریکی ب پەیەدێ ڕا ژ بۆنا په‌ترۆلێ په‌یمان چێ کر. په‌یمان ژ بۆنا په‌ترۆلا دێرەزۆرێ یه. گه‌لۆ د تفاقێ دا ستاتویا وان په‌ترۆلان و په‌ترۆلا کوردستانێ دێ چه‌وا ببه؟ ئه‌ڤ مژاره‌ک گرنگه. هه‌تا ئه‌ز دبێژم کو ل پێش هه‌ڤکاری و تفاقێ ژی ئاسته‌نگه.
ژ ئالیێ دن دا پارتیا كاركەرێن كوردستانێ (پەکەکە) ب ئاشکه‌رەیی دژاتیا پەیمانا پەترۆلێ یا د ناڤبەرا پەیەدێ و ئەمریكایێ دا دكە. به‌رپرسێن پەکەکێ گه‌له‌ک ب زه‌لالی ددن خویاکرن کو ئه‌و ناخوازن ئه‌ڤ یه‌کرێزی پێکو‌ره. داخویانیا جه‌میل بایک د ڤێ خالێ دا گه‌له‌ک ئاشکه‌ره یه.
ژ ئالیه‌ک دن ڤه ب پرۆڤاکاسیۆنێن پەکەکێ که‌سێن گرێدایی قه‌ندیلێ، ئێریش برن سه‌ر ئۆفیسا پارتیا ده‌مۆکراتا کوردستانێ-سوریێ (پدک-س) و ئالا کوردستانێ داخستن و ئۆفیس شه‌وتاندن، سلۆگانێن پەکەکێ ل سه‌ر دیوارێن ئۆفیسێ نڤیساندن.
حه‌سه‌ن ڕه‌مزی، ئه‌ندامێ کۆمیته‌یا ناڤه‌ندی یا پارتیا ده‌مۆکراتا کوردستانێ-سوریێ ل سه‌ر ئێریشێ دیار کر: “رۆژا شه‌میێ نێزیکی ساعه‌ت 8ێ ئێڤارێ، گرووپه‌ک ب ناڤێ جوانێن شۆره‌شگه‌ر یا سه‌ر ب پەیەدێ ڤە ئێریشی ئۆفیسا پارتیا ده‌مۆکراتا کوردستانێ – سووریێ (پدک-س) ل ڕۆژهلاتێ باژارێ قامشلۆ کرن، ڤێ گرووپێ ل سه‌ر ده‌ریێ ئۆفیسێ ل سه‌ر لۆگۆیا پارتیێ و ئالا کوردستانێ گه‌له‌ک تشتێن خراب ب بۆیاخا ڕه‌ش نڤیسین، سلۆگانێن خوه ئاڤێتن و ئاگر ل پێشیا ئۆفیسا مه ڤێخستن. ب قاسی سەعه‌ته‌ک ھەتا سەعه‌ت و نیڤ ئه‌ڤ به‌رده‌وام بوو.”
ئه‌ندامێ کۆمیته‌یا ناڤه‌ندی یا پارتیا ده‌مۆکراتا کوردستانێ-سوریێ ده‌ستنیشان کر کو د سالێن چوویی د ا ژی گرووپێن ب هه‌مان ناڤی ئێریشی سه‌ر ئۆفیسێن پدک-سێ دکرن و گۆت: “ئۆفیسێن مه دشه‌وتاندن و گه‌له‌ک جاران ئالا کوردستانێ بنپێ دکرن و دشه‌وتاندن. مخابن، ئه‌ڤ کریارێن وها د ڤێ قۆناغێ دا کو ئه‌م تێ ڕه ده‌رباس دبن تێن ئەنجامدان، ئه‌م وه‌که ئه‌نەکەسە ب تایبه‌تی پارتیا ده‌مۆکراتا کوردستانێ-سوریێ، ئه‌م باوه‌ریێ ب دیالۆگ و گۆتووبێژا کوردی-کوردی دکن، ژ به‌ر کو ئه‌م دبینن یه‌ک ژ فاکتۆرێن کو دلخوه‌شی و ئارامیێ و هه‌روها هه‌ڤال و دۆستێن کوردان پتر پێک بینه، ئه‌ڤ یه‌کرێزیا هانێ یه. ژ به‌ر ڤێ یه‌کێ ئه‌م د ڤێ قۆناغێ دا ئه‌ڤ ئێریش ئێریشه‌کا خرابه، خویا یه هنده‌ک که‌س، شه‌پێله‌ک هه‌یه د ناڤ پەیەدێ دا ناخوازن ئه‌ڤ دیالۆگ ب ڕێڤه هه‌ره و مله‌تێ کورد بگەهه ڕه‌هه‌تیه‌کێ کو ژیانه‌کا خوه‌ش و ئارام بژین ل کوردستانا سوریێ.”
ئه‌ڤ گروپ ئاپۆجی و پەکەکەیی نه. ئه‌ڤ ئێرش ژی نیشان دده کو پەکەکە ل دژی رێكەفتنا ئالیێن ڕۆژاڤایێ کوردستانێ یه.
ئیبراھیم گۆجلۆ
دیاربه‌کر
2020.08.20
