کاروان کێستەیی
خیانەتا ١٦ێ ئۆکتوبەرێ ژناڤبرنا ئارمانجا ب ملیونان کوردان بوو
هەر مللەتەکێ جیهانێ کو د ئەڤروکەیا خوە دا خوەدان ئالا و سەربەخوەیی یا خوە هەیی بێ گومان دیرۆکەکا دوورودرێژ و پری قوربانیدان ژ شکەستن وسەرکەفتنان هەیە. ئەم ژی وەك مللەتێ کورد مێژوویا مە ڤەدگەریت بەریا گەلەك ژ وان مللەتان یێن د نوکە دا د سەربەخوەنە و رەنگە مە ژ وان پتر قوربانی دابن و نەخوەشی دیتبن، لێ هەتا نوکە نەبووینە خوەدان وەلاتەکێ سەربەخوە.
ژ هەژی یە بێژین کو د بزاڤێن مللەتێ کورد دا یێن کو ئارمانجا وان ئازادی و زگاربوون بوو ژ بندەستیێ، ژ ئالیێ وەلاتێن داگیرکەر ڤە راستی گەلەك شکەستنان، تەنگاڤیان و گەفێت نەمانێ بوون. لێ جارەکا دی ب هەولێن گەنج و لاوێن خوە و خوینا هزراهان شەهیدان دووبارە ل سەر پیێن خوە راوەستیایە ڤە هەتاکو گەهشتیە قوناغەکا گرنگ، هەستیار و دلخوشکەر بو هەر تاکەکێ کورد کو ئەو ژی دەنگدان بوو بۆ سەربەخوەیی یا کوردستانێ. د سەر وان هەمی گڤاشتنێن دەرەکی و وەلاتێن دەوروبەران را، د ئەنجام دا، ب رابەراتیا رێبەر و سەروکێ کوردان مەسعود بارزانی رەفەرەندوم هاتە کرن و پروسەسا دەنگدانێ ل رێکەفتی ٢٠١٧/٩/٢٥ بسەرکەفتیانە هاتە ئەنجامدان. لێ یا هیڤی و ئومێدێن تاکێ کورد و رەوشەنبیر و زانا و رێبەر و سەرکردێن کوردان رەشکری خیانەتا ١٦ێ ئۆکتوبەرێ بوو کو خوینا شەهیدێن مە، بزاڤ و خەباتا گەنجێن مە د قوناغێن جودا جودا دا هەمی ب ئێکجار ژناڤبر و رادەستێ دژمنی کر و ٥١٪ ئاخا کوردستانێ، ب کەرکووکا دلێ کوردستانێ ڤە، هێلا دناڤ دەستێن دژمنان دا، لەورا ئەز دبینم ئەڤە مەزنترین خیانەتا مێژوویی بوو ل ئاخ و پیروزیێن تاکێ کورد هاتیە کرن.
ب دیتنا من ئەگەرێن دوباربوونا خیانەتێ ل مللەت و سەرکردێن مە ئەوە کو خیانەتکار ل گۆر یاسایێ ناهێنە دادگەهکرن. بکەرێن ڤێ خیانەتێ گەلەك د دیار و بەرچاڤ بوون و خودان پلە و پوستێن بلندن و بناڤودەنگن و هەتا نوکە دئازادن. ژ بۆ دووبارەکرنا خیانەتێ وان مێژویەکا رەش یاهەی، ژ بەر هندێ هەر گاڤا مللەتێ کورد نێزیکی ئارمانجەکێ ببت ئەو ئامادەنە ب پیلانێن خوە یێن چەپەل تێك بدەن.
هیڤیا مە ئەوە رۆژەکێ ژ رۆژان ئەم ب چاڤێن خوە وان خیانەتکاران ل دادگەهێ و ل بن سیبەرا یاسایێ ببینن و بشینن بو زبلخانا مێژویێ.
