بێ شک د ڤێ کۆناغا نازک دا هه‌وجه‌داری ب سه‌رۆکاتیا که‌ک مەسعود بارزانی هه‌یه. که‌ک مەسعود خوه‌دیێ هه‌لوه‌سته‌ک نه‌ته‌وی و ده‌مۆکراته. مرۆڤه‌کی ماقووله. ئه‌ڤ ژی بالا جیهانێ دکێشنه سه‌ر خوه. ژ به‌ر ولۆ دڤێ ده‌ملده‌ست کوردێن نه‌ته‌وی خوه ل دۆرا که‌ک مەسعود بارزانی کۆم بکن؛ ب فکر، ڕامان و پرۆژه‌یێن خوه ئالکارییا جه‌نابێ که‌ک مەسعود بکن. دڤێ که‌ک مەسعود ل سه‌رانسه‌رێ کوردستانێ وه‌که سه‌رۆکێ نه‌ته‌وی وه‌ره پێشه‌وازی کرن و ژ چارچۆڤا به‌شه‌ک کوردستانێ وه‌ره ڕزگار کرن. کوردێن باکور، ڕۆژهلات و ڕۆژاڤا ژی هه‌وجه‌داریا وانا ب ته‌جرووبه، دیتن، فکر و هه‌لوه‌ستا که‌ک مەسعود هه‌یه. ئه‌ڤ هه‌وجه‌داری ژی دڤێ ژ ئاستا فه‌رمیبوونێ ده‌رکه‌ڤه و بکه‌ڤه ئاستاکا جڤاکی، کولتوری و ڕه‌وشه‌نبیری.
که‌ک مەسعود بارزانی دڤێ ده‌رکه‌ڤه قادا نه‌ته‌وی ژ بۆنا هه‌موو کوردان! ببه سه‌رۆکێ کورد و کوردستانێ. ژ به‌ر کو ئیرۆ وه‌لاتێن دنیایێ، سازیێن ناڤنه‌ته‌وی و ڕایا گشتی ڕێزدار سه‌رۆک مەسعود بارزانی وه‌که سه‌رۆکێ نه‌ته‌وی دپه‌ژرینه، ته‌ڤگه‌را نه‌ته‌وی ل هه‌موو پارچه‌یێن کوردستانێ ژی دیسا سه‌رۆک مەسعود بارزانی وه‌که سه‌رۆکێ خوه دزانه. ل ڕۆژهلاتا ناڤین ژی، د ناڤا هه‌موو ده‌ردۆرێن سیاسی دا، دیسا هه‌مان نێزکبوون هه‌یه. ژ به‌ر ڤان سه‌ده‌مان دڤێ که‌ک مەسعود وه‌که سه‌رۆکێ نه‌ته‌وی هم د دۆزا کوردان دا و هم ژی د پێوه‌ندیێن ناڤنه‌ته‌وی دا ده‌رکه‌ڤه پێشبه‌ر ڕایا جیهانێ…
ژ بۆنا کو ته‌ڤگه‌را نه‌ته‌وی خوه ژ پێشه‌رۆژا کوردستانێ ڕا باش ئاماده بکه، هه‌وجه‌داری ب سه‌رۆکاتیا که‌ک مەسعود بارزانی هه‌یه. ئه‌ڤ تشته‌کی ئه‌شکه‌ره یه و دڤێ گه‌له‌ک جاران وه‌ره دوباره کرن. دڤێ ئه‌ڤ ڕاستی ده‌ملده‌ست وه‌ره په‌ژراندن. ل سه‌رانسه‌رێ کوردستانێ هه‌وجه‌داریا وه‌لاتێ مه یا بنگه‌هین ئیرۆ ئه‌ڤه. ئه‌ڤ هه‌وجه‌داری دڤێ زه‌لال وه‌ره فۆرمووله کرن، د ناڤا کوردان دا کۆکا خوه ڤه‌ده و ڕێهێ خوه به‌ردێ ناڤا ئاخ و ده‌روونیا کوردستانێ. دڤێ ئه‌م ل سه‌رانسه‌رێ کوردستانێ ببن خوه‌دانێ سه‌رۆکه‌کی نه‌ته‌وی. ژ به‌ر کو ئه‌ڤ ژ بۆنا پێشه‌رۆژا کوردستانێ پرسا مان و نه‌مانێ یه. سه‌رۆکه‌کی نه‌ته‌وی ژ مله‌تێ کورد ڕا پێوستییه‌که، ته‌مسیلییه‌ته‌که، له‌زگینییه‌کا ده‌روونی یه. ب هه‌ر ئاوه‌یی پێویستیه‌کا سیاسی یه ژی. لێ وه‌که هه‌موو سه‌رۆک و ڕه‌به‌رێن دنیایێ، د ڤێ فۆرماسیۆنێ دا ژی هه‌وجه‌داریا کوردان ب کۆمه‌ک شێورمه‌ند هه‌یه. ئانگۆ سه‌رۆک و شێورمه‌ند ب هه‌ڤدوو ڕا ببن سازیه‌کا نه‌ته‌وی، ڕه‌وشه‌نبیری و جڤاکی.
ئه‌ڤ سازیا نه‌ته‌وی دڤێ ب به‌شداربوون، هه‌ڤبه‌شبوون و په‌ژراندنا هه‌ر چار پارچه‌یێن کوردستانێ وه‌ره ئاڤا کرن. سازیا شێورمه‌ندان دڤێ دائیمی به، هه‌ر کو ڤالایی چێبوو دڤێ شوونا که‌سان وه‌ره داگرتن. هه‌ر پارچه ل گۆری گرانی و هه‌ژمارا خوه که‌سێن کو خوه‌دیێن تایبه‌تمه‌ندیێن شێورمه‌ندیێ نه پێشکێشی ڕایا کوردی بکن. ئه‌ڤ سازی دڤێ ژ سیاسه‌تمه‌داران، ئه‌نته‌له‌کتوه‌لان، ڕۆژنامه‌ڤان، نڤیسکار، هونه‌رمه‌ند و پسپۆران ئاڤا ببه. ناڤه‌ندا ڤێ سازیێ ژی دڤێ ل کوردستانا باشوور به.
باشه. چما ئه‌ز که‌ک مەسعود د ڤێ مژارێ ده ددم پێش؟ ئه‌ز ب کورتی ببێژم:
ئه‌شکه‌ره‌یه کو مافێ هه‌موو که‌سان هه‌یه کو د ڤێ مژارێ ده هنده‌ک ناڤێن دن ژی پێشنیار بکن. د ده‌ستپێکا نقاشان دا دڤێ مرۆڤ ل هه‌ر که‌سی گوهدار بکه و د داوی دا بگەهژه دیتنه‌کا هه‌ڤبه‌ش. د ڤێ مژارێ دا هه‌ڤبه‌شبوونا نه‌ته‌وی بقاسی پرسا سه‌رۆکاتی و شێورمه‌ندان پرسه‌که گرنگه. هه‌که ئه‌م دێ قالا نه‌ته‌وایه‌تیێ بکن دڤێ ئه‌م وه‌که کورد هه‌رگاڤ قالا هه‌ڤبه‌شبوونێ ژی بکن. ژ به‌ر کو نه‌ته‌وایه‌تی هه‌ڤبه‌شبوونه، خاکه، زمانه، پێشه‌رۆژه…
ھەلبه‌ت ئه‌ز د ڤێ مژارێ دا ته‌نێ دیتنا خوه پێشکێشی ڕایا کوردان دکم. ب ڕایا من مرۆڤێ کو سه‌رۆکاتیا شێورمه‌ندێن نه‌ته‌وی بکه، دڤێ د هه‌لوه‌ستا خوه دا نه‌ته‌وی به، گرێدایی نشتمانێ خوه به، خوه‌دان ته‌جرووبه‌یێن کوردستانی به، د قادا ناڤنه‌ته‌وی دا ژی ولۆ هاتبه په‌ژراندن.
د ڕه‌وشا ئیرۆ دا ژ که‌ک مەسعود و پێڤه ئه‌ز باوه‌ر ناکم کو چ سیاسه‌تمه‌دارێن دن کاربن ب ڤێ ئه‌رکا نه‌ته‌وی ڕابن. ئه‌ڤ باره‌کێ تێرا خوه گرانه و به‌رپرسیارییه‌کی مه‌زن دخوازه.
ژ بۆنا کو ئه‌م کاربین ئاقله‌کی هه‌ڤبه‌ش و نه‌ته‌وی بئافرینن هه‌وجه‌داری ئیرۆ ب سازیا شێورمه‌ندێن نه‌ته‌وی هه‌یه و ئه‌ز دوباره دبێژم؛ بەربژێرێ سه‌رۆکاتیا شێورمه‌ندان ژی دڤێ که‌ک مەسعود بارزانی به. دییارێ کو که‌ک مەسعود ژ نووها و پێ دا چ ئه‌رکا وی یا فه‌رمی نه‌مایه، ئه‌و ژ فه‌رمیتییا خوه ڕزگار بوویه، لێ هینا ژی د پرسێن سیاسی دا مرۆڤه‌کی چالاکه، هه‌لوه‌سته‌کا نه‌ته‌وی برێڤه دبه، ژ به‌ر ولۆ ژی ئه‌و دکاره بهێسانی ڤێ په‌یورا خوه بجیھ وه‌رنه و ب ڕێبازێن ماقوول سه‌رۆکاتیا شێورمه‌ندێن نه‌ته‌وی بکه…
ده ئیجا که‌ره‌مبکن، د ڤێ مژارێ ده گۆتن ئازاده…
شه‌ره‌فخان جزیری
2019.06.14
