دڤێ ئه‌م کورد ڤێ یه‌کێ باش فێر ببن کو هه‌ر مله‌ته‌ک ل سه‌ر کۆکا خوه، ب چاند و هێژاییێن خوه مه‌زن و ب پێش دکه‌ڤه. هه‌لبه‌ت ئه‌ڤ پیڤان هه‌تا ژ ده‌ستێ داگیرکه‌ران هاتیه و تێ وێ نه‌هێلن کو وه‌لاتێ ئه‌و داگیر دکن، خه‌لکێ وی ب وان مه‌زن ببه. ژ به‌ر کو داگیرکه‌ر ته‌نێ ب داگیرکرنا ئه‌ردێ وه‌لاته‌کی نایێن سه‌ر. له‌ورا دزانن کو ده‌ما ئه‌و وه‌لاته‌کی داگیر دکه، پێویستی دبینه کو مه‌ژی و هه‌می هێژاییێن گه‌لێ وی ژی داگیر بکه دا کو ئه‌و مله‌ت ئێدی نکاربه خوه ئازاد و وه‌لاتێ خوه ژ بن ده‌ستێ داگیرکه‌ریێ رزگار بکه.
لۆما ژی ژ رۆژا کوردستانا شرین هاتیه داگیرکرن و هه‌تا نها ئه‌ڤ داخوازا داگیرکه‌ران ل کوردستانێ پێک نه‌هات بوو. ژ به‌ر کو مله‌تێ کورد مله‌ته‌کی ئەسلسازه، مه‌زن و د ده‌ما خوه دا خوه‌دیێ چه‌ند ده‌وله‌ت و ئیمپاراتۆریان ژی بوو. ل هه‌مبه‌ر هه‌می زلم و زۆرداریا داگیرکه‌ران هه‌تا ژێ هاتیه به‌رخوه دایه.
پشتی دابه‌شکرنا کوردستانێ د ناڤا چار داگیرکه‌رێن ده‌ڤبخوین دا و ل گۆر په‌یمانا لۆزانا ۱۹۲۳ئان، ئارمانج و هه‌ده‌فا داگیرکه‌ران ئه‌و بوو کو د ناڤا سه‌د سالان دا کوردان نەهێلێن. ل گۆر ڤێ ئارمانجێ ژی کارێ خوه کرن و دکن. لێ کورد ژی ب هه‌مان شێوه‌یی، ب قەوه‌ت و هێزا خوه، ته‌کۆشینا ئازادیا خوه دا و خوه راده‌ستی دژمن نه‌کر. دژمن دیت کو ئه‌و ئێن ب ڤێ رێیێ ب سه‌رنه‌کڤن، ده‌ست ئاڤێتن فه‌ن و فووتان، ده‌ره‌و و بۆختانان دا کو مله‌تێ کورد خوه ب خوه قرا هه‌ڤ بینه. د ڤێ دا وه‌که وان دخوه‌ست ب سه‌رنه‌که‌تن. ڤێ جارێ ده‌ست ئاڤێتن وێ یه‌کێ کو ل سه‌ر ناڤێ کوردان ته‌ڤگه‌ر ئان پارتیه‌کی دامه‌زرینن و ل سه‌ر ده‌ستێ وێ، ئارمانجا ژناڤبرنا کوردان پێک بینه. و باوه‌رم هه‌تا ده‌ره‌کێ ب سه‌ر ژی که‌تنه.
ب ڤێ هه‌ول و خه‌باتێ چو نه‌ما بوو کو ل هه‌ر چار په‌رچێن کوردستانێ وێ داخوازا ژناڤبرنا کوردان ب ده‌ستێن هن کوردان ب سه‌ر بکه‌تا. پشتی کو سەدام خوه‌ست کووه‌تێ داگیر دکه، ئاها د ڤردا ئه‌و ل دژ به‌رژه‌وه‌ندیا مه‌زنێن دنیایێ ته‌ڤگه‌ریا و ئه‌ڤ بوو وه‌که تو چرایه‌کی د شه‌ڤره‌شا کوردان دا پێخه. پێکه‌تنا وێ بوو ڕۆناهیا گه‌لێ کورد. پێخستنا وێ بوو ئازادیا باشوورێ کوردستانێ. ئێدی مه و داگیرکه‌رێن مه، مه فێم کرن کو دێ کوردستان هه‌ر بمینه. لۆما پشتی ئازادیا باشوورێ کوردستانێ ئێدی داگیرکه‌ران و ب تایبه‌تی ژی داگیرکه‌رێن ترک بێترین هێز و قەوه‌تا خوه ب کار ئانی دا کو ل سه‌ر ده‌ستێ هن پارتیێن کوردان باکوور و رۆژاڤا تێک ببه.
ل باکورێ کوردستانێ ژی هه‌ما هه‌ما ب سه‌رکه‌تنه. هه‌تا نها چ خوه‌ستنه وه‌که وان بوویه. چو هێز و قوه‌ته‌که نه‌ته‌وه‌یی ل باکور نه‌هشتنه کو ئه‌و به‌رخوه بده. نه‌هشتنه ئان گه‌له‌کی قه‌لس کرنه. له‌ورا وان کارێ خوه کرن کو چو قوه‌ت ئان هێزه‌که نه‌ته‌وه‌یی ل باکورێ کوردستانێ نه‌مینه. لێ مه ژی وه‌که کوردێن باکورێ کوردستانێ نکاریبوون به‌رخوه بدن. خوه ژ به‌لاوه‌لێ ئازاد بکن و ببن خوه‌دی ئه‌نیه‌ک/بەرەیەک نه‌ته‌وه‌یی.
ل گۆر من ئەساسێ دامه‌زراندنا ئه‌نیه‌که نه‌ته‌وه‌یی د هلبژارتنا ترکیێ و باکورێ کوردستانێ یا سالا ۲۰۲۳ئان دا هاتبوو ئاڤێتن.
ب سه‌رپه‌ره‌شتیا هاک-پارێ و ب پشتگریا حه‌ره‌که‌تا ئازادی. کەدەپێ، پاک و ته‌ڤگه‌رێ ئه‌و ئاساس هاته دانین. دل دخوه‌ست کو ئه‌ڤ هه‌ڤکاری و ئالیکاری نه ته‌نێ ژ بۆنا هلبژارتنان با. داخواز ئه‌و
بوو کو پشتی هلبژارتنان ژی ئه‌و تێکلی و ب هه‌ڤره کارکرن به‌رده‌وام بکه هه‌تا کو ئه‌و ببه ئه‌نیه‌که نه‌ته‌وه‌یێ.
ئه‌ز هێ ب هێڤی مه کو وێ ئه‌ڤ دێ ژی پێک بێ. پاک و ته‌ڤگه‌رێ بریار دانه کو ببن یه‌ک. ئه‌ڤ تشته‌کی باشه. ب هێڤیا کو حه‌ره‌که‌تا ئازادی، کەدەپە و هاک-پار ژی ببن یه‌ک و پشتره بێ کو وه‌خت ده‌رباس ببه هاک-پار و پاک ئان ژی ب ناڤه‌کی نوو ئه‌نیا خوه یا نه‌ته‌وه‌یی دامه‌زرینن.
د ئه‌نیه‌ک وه‌ها دا دڤێ هه‌ر کورده‌کی دلێ وی ل سه‌ر وه‌لاتێ وی دێشه بکاربه ببه ئه‌ندامێ ڤێ ئه‌نیی یه. ئه‌نی دڤێ فره‌ه به و بکاربه هه‌می ره‌نگ و ده‌نگێ جڤاتا کورد هه‌مبێز بکه.
ئه‌م گەهشتنه وێ قۆناخێ کو دڤێ ئێدی ئه‌م وه‌که کوردێن باکورێ کوردستانێ ببن خوه‌دی ئه‌نیه‌ک نه‌ته‌وه‌یی و ل گۆر داخواز و پێویستیا گه‌ل ته‌ڤبگه‌رن و حه‌ره‌که‌ت بکن.
هه‌گه‌ر کوردێن باکورێ کوردستانێ زووترین ده‌مێ ڤێ پێک نه‌ینن، ئه‌و ژی تێک هه‌رن و جاره‌که دن زه‌حمه‌ته کو ئه‌م فرسه‌ته‌که وه‌ها بکاربن ب ده‌ست بخن. ئه‌ڤ سه‌د سالن کو مه ژ به‌ر نه‌یه‌کبوونا پارتی و هێزێن خوه هه‌ر رۆژ وه‌ندا کرنه و دکه. قه نه‌به د داویا ڤێ سه‌د سالا لۆزانێ دا یه‌کیتیا کو هێسترێن چاڤێن دایکان بسه‌کنینه، ده‌نگێ ره‌وشه‌بیران ژ بۆنا راستیێ به‌رز بکه، قه‌له‌ما نڤیسکاران ژ بۆنا به‌رژه‌وه‌ندیا گه‌لێ کورد تووژ بکه، پێک بینن.
ب هێڤیا کو پارتیێن کورد و کوردستانێ ئانگۆ هاک-پار و پاک ل به‌ندا هلبژارتنه‌که دن نه‌مینن و تێکلیێن خوه یێن ژ بۆنا بەرەیەک نه‌ته‌وه‌یی بدۆمینن. تاقەتا ڤی مله‌تی هه‌تا سه‌د ساله‌کی دن خوه ل سه‌ر لنگان بهێله نەمایه. هه‌گه‌ر ره‌وش وه‌ها هه‌ره دایاخا ڤی مله‌تی نه هه‌تا سه‌د سالان، نه‌ما دکاره ده‌ه سالان خوه ل به‌ر زلم و زۆرداریا داگیرکه‌ران بگره.
دڤێ ئه‌م ژ بیر نه‌کن کو دۆزا مله‌ته‌کی ب یه‌کیتی و ب هه‌ڤره کارکرنا وی پێک تێ. ده‌ما ئه‌ڤ نه‌به ئه‌و مله‌ت، ئه‌و گه‌ل ژی نامینە…
بووبێ ئه‌سه‌ر
05.08.2023
