دبێژن فلانکه‌سۆ شووژنا د چاڤێن خوه دا نابینه، ده‌رزییا د چاڤێن خه‌لکێ دا دبینه. ب ده‌هێ سالان، ب هه‌زاران کورد ب هێجه‌تا ئاژانتییێ، ب هێجه‌تا میتیتی یێ، ب هێجه‌تا هه‌ڤالبه‌ندییا ئاکەپێ و مەهەپێ کوشتن. ب سه‌دێ جاران مالباتا بارزانی ب هێجه‌تا هه‌ڤالبه‌ندییا ئاکەپێ و مەهەپێ تۆهمه‌تبار کرن، ئه‌و کرن خایین و خوه‌فرۆش. لێ ئه‌و کراسێ کو وان ل دژبه‌رێن خوه دکر، ئیرۆ وان ل خوه کریه و د بن وی کراسی دا گۆڤه‌ند و دیلانێ دگرن. بێیی کو لێبۆرینه‌کێ ژ کوردان بخوازن، بێیی کو شووژنا د چاڤێن خوه دا ببینن.
پشتی شه‌ر و گوهه‌رتنێن ل ڕۆژهلاتا ناڤین، ترسا کوردستانه‌ک سه‌ربخوه و پارچه‌کرنا ترکییێ که‌ت دلێ وان. ب له‌ز و به‌ز پلان و پرۆژه، پارادیگما و داخوازێن خه‌یالی به‌رپێش کرن و ب ناڤێ ترکییه‌یه‌ک بێ ته‌رۆر دیسا خوه‌ستن کوردان ب کۆمارا ڕۆمێ ڤه پینه بکن و دابه‌شکری بهێلن. ته‌سلیمییه‌ته، خیانه‌ته یان براستی ژی پێڤاژۆ و ئاشتییا ناڤبه‌را ترک و کوردانه، نزانم. لێ ناڤێ وێ دیسا کرن براتییا ترک و کوردان و بێ بازار، بێ خوه‌سته‌ک، بێ داخوازه‌ک هه‌ری بچووک، دخوازن ترکایه‌تی و ترکییه‌ییبوونێ ل سەر کوردان فه‌رز بکن. هه‌لبه‌ت دل دخوازه کو ئه‌ڤ پێڤاژۆ براستی ژی پێڤاژۆیه‌ک ئاشتی و وه‌کهه‌ڤییێ به، مافێن مله‌تێ کورد د زاگۆن و ماکزاگۆنێ دا بێن په‌ژراندن، زمانێ کوردی ببه زمانێ په‌روه‌رده‌یێ، ناسنامه و هه‌بوونا کوردان بێ ناسکرن، فلان و بێڤان. لێ نه د پارادیگمایا ده‌وله‌تێ دا، نه ژی د یا ئۆجالان دا، بێهنا دان و پاراستنا مافێن مله‌تێ کورد ژ ڤێ پێڤاژۆیێ نایێ.
وه‌رحاسل، ئه‌وێن کو هه‌تا دۆهی قاشۆ ژ وان را دژمن و نه‌یار بوون، ئیرۆ بوونه دۆست و ده‌سته‌براک و هه‌ر دو ئالی ژی ب سه‌رێ هه‌ڤ سووند دخون. کا قاشۆ ئاکەپ فاشیست بوو، مەهەپە فاشیست بوو، که‌سێن سلاڤ ل وان بکرا ئاژان، خایین و خوه‌فرۆش بوون، کا شه‌رێ ژ بۆ سه‌رخوه‌بوونا کوردستانێ، کا مرنا زێده‌یی سه‌د هه‌زار کورد، کا گه‌ریڵایێن جانگۆری، کا ئارمانج، کا شۆره‌ش؟ هه‌موو بادلهه‌وا چوون، یێن خه‌سرین کورد و یێن قه‌زه‌نج دکن دیسا ڕۆمی نه.
ئه‌ز سه‌رێ وه نه‌ئێشینم، که‌ڤنه‌سه‌رۆکوه‌زیرێ ترکییێ سوله‌یمان ده‌میره‌ل دگۆت: “دۆهی دۆهی یه، ئیرۆ ئیرۆ یه”. یانی، تشتێ چوو نه‌دن دووڤ. ئه‌وقاس به‌ده‌ل ژ بۆ یه‌کرێزییا پاراستنا سینۆرێن کۆمارا ترکییێ هاتن دان. دۆهی ژی کورد کورتانێ که‌رێن ڕۆمێ بوون، ئیرۆ ژی وان دکن کورتانێن که‌رێن خوه. ب هه‌مان دوورشمه و چیرۆکێن به‌رێ. براتییا ترک و کورد، براتییا ئیسلام و ئوممه‌تێ. لێ کورد د وارێ سیاسی دا کورتانێن براتییێ، و د وارێ ئۆلی دا ژی سێوییێن ئوممه‌تێ نه. ب ڤی ئاقلی، ب ڤێ هه‌ست و هشمه‌ندییا به‌رهاڤێتی، ب ڤێ دلکه‌چکی و مرۆڤپه‌روه‌رییێ نه کورد دبن خوه‌دییێ تشته‌کی، نه ژی داگیرکه‌رێن مه تێک دچن.
وه‌رحاسلی که‌لام، ئاژانتی، خوه‌فرۆشی، نانکۆری و بێبه‌ختی ژ هنه‌کان را عاده‌ت لێ ژ گه‌له‌کان را ژی قه‌بحه‌ته. ژ قه‌ولا سه‌رشوونکێ سوله‌یمان ده‌میره‌ل ڤه، دۆهی دۆهی یه ئیرۆ ئیرۆ یه. کی جلکا خوه ژ ئاڤێ ده‌رخه ئه‌و مێره، ئه‌و شێره، ئه‌و مافداره وه‌سسه‌لام..
پیرکه‌مال
لۆتكخانە
