دڤێ ئهم ڤێ یهکێ ژ بیر نهکن کو ئامادهبوون و دامهزراندنا ڕهوهندا کوردستانی ل سهر پێشنیارا سهرۆک بارزانی پێک هاتیه. سهرۆک بارزانی ژی ژ بۆنا مه کوردان ڕوومهت و قیمهتهک بێ ههمپا و شانسهک مهزنه. شیرهت و هیڤییێن جهنابێ وی ژ بۆنا مه کوردان ئایهتێن پێشکهتنێ و ب نرخن. لهورا دڤێ ههر کورد ب خورتی و ب گرسهیی پشتهڤانیا سهرۆک بارزانی بکە دا کو ئهم کورد بگەهن مافێن خوه یێن ڕهوا.
پشتی تهکۆشین و بهرخوهدانا زێدهترین یا سهد سالان یا بارزانیان ئهم کورد ل باشوورێ کوردستانێ بوونه خوهدی پارچهیهک ئاخا ئازاد کو گهلێ مه ل ور ب ئازادی دژین.
لێ داخواز و ههلوهستا سهرۆک بارزانی ئهوه کو ههمی کوردێن ل ههر چار پارچەیان بگەهن ئازادیا خوه. ژ بۆنا کورد ژی وهکه ههر ملهتهکی ب ئازادی بژین. لۆما دڤێ ئهم ژی خوهدی ل سهرۆکێ خوه دهرکهڤن. پشتهڤانیا وی بکن دا کو ئهو ژی د قادا ناڤنهتهوهیی دا ب ڕهحهتێ دۆزا گهلێ خوه بدۆمینه.
کار و ئهرکا سهرۆک بارزانی ئهوه کو تهڤگهر و پێکهاتەیێن کوردستانیان ژ بهلا وهلایێ ئازاد بکه. ژ بهر ڤێ داخوازا سهرۆک بارزانی ئهوه کو ههمی کوردێن ل ئهورۆپایێ د ناڤ ڕهوهندا کوردستانی بجڤینه دا کو بکاربن ب هێسانی دۆزا مافێ خوه بکن و ژ باشوورێ کوردستانێ را ژی ببن پالپشت.
ب ڤێ باوهریێ و ئارمانجێ دامهزراندنا ڕهوهندا کوردستانی کارهکی پیرۆز و شانسهک مهزنه کو کوردێن ل دیاسپۆرایێ د بن سیوانهکه وهها دا خوه بدن سهر ههڤ. ژ ڕۆژا دامهزراندنا وێ و ههتا ئیرۆ گهلهک کارێن باش هاتنه کرن و تێنه کرن.
وهکه ئهم دزانن و دیاره کو د دامهزراندنا ههر دهزگهههکێ دا وێ هندەک کێماسی ژی پهیده ببن. لهورا ههر ئهندامێن کو کێماسی ئان شاشی دیتن دڤێ ب ئاوایهکی ماقوول بالا بهرپرسان بکشینن. ب ڤی ڕهنگی د ناڤا خهباتێ دا دێ ئهو دهزگه ببه دهزگهههک نهتهوهیی دا کو بکاربه نهتهوهیا خوه د بن باسکێ خوه دا ژ باران و تهرهزێ بپارێزه.
دامهزراندن و ئارمانجا ڤێ ڕهوهندا ل سهر پێشنیارا سهرۆک بارزانی هاتیه دامهزراندنێ کو ل گۆر من هندەک کێماسی ههنه کو دڤێ ئهو ژی سهڕاست ببن. ژ بۆنا سهڕاستکرنێ ژی دڤێ ههر کهسێن ئهندام نهرین و دیتنێن خوه ژی بێژن یان بنڤیسینن دا کو ئهم ب ههڤرا ڤێ ڕهوهندێ بخن قادا ناڤنهتهوی. دڤێ دنیا ژی بزانبە کو ههر پێشنیار و گۆتنا سهرۆک بارزانی ژ بۆنا مه کوردان فهرمانن.
ب ڤێ سهدهمێ من خوهست وهکه ڕێڤهبرهکی فهدهراسیۆنا نڤیسکارێن کوردستانی ل داسپۆرایێ، چهند تێبنیێن خوه بێژم:
دڤێ ڕهوهند ژ مهجلیسهکێ پێک بێ. ئهندامێن مهجلیسێ ژی دڤێ ب ڕێیا هلبژارتنێ به. لێ دڤێ بهشا نڤیسکار، ژن و جوانان ب کۆتا ئانگۆ ههر یهک ژ وان ڕاسته ڕاست ببه ئهندامێ مهجلیسێ.
ژ ناڤا مهجلیسێ ژی دڤێ کۆمیتا ڕێڤهبر کو ژ پێنج ئان حهفت کهسان بێنه هلبژارتن. ئهو پێنج کهسا تهنها دێ کارێ وان دیپلۆماسیا ناڤنهتهوهیی به. لۆما ژی دڤێ ئهو پێنج کهس پسپۆر و پر زمانی بن. ئانگۆ ههر یهک ژ وان ب چهند زمانان بزانبن. جڤاکا ئهورۆپایێ ناس بکن. دڤێ ڕهوش و خوهندنا وان بێ زانین کو کیژان زانینگە قهداندنه. ب کهسێن نه خوهندا و زمانان نزانن ئهڤ کۆمیته وێ نه چالاک و خوهدێ ئهرکهکی باش به.
ئهندامێن کۆمیتا ڕێڤهبر دڤێ بێترێن وان جوانێن کو ل ئهورۆپایێ هاتنه دنیایێ، بێنه هلبژارتن دێ باشتر به. ژ بهر کو ئهو ژ مه ئانگۆ ژ سالمهزنان بێتر جڤاتا ئهورۆپایی ناس دکن و دکارن ژ مه ڕهحهتر ب وان را تێکلیان دهینن.
ژ ناڤا مهجلیسێ دڤێ کهسهکی نڤیسکار ببه بهرپرسێ فهدهراسیۆنا نڤیسکاران و دڤێ فهدهراسیۆن ژی ب کۆنگرهیهکێ کۆمیتا خوه یا ڕێڤهبر ئانگۆ یا کارکهر هلبژێرن. کهسێن کو د ڤێ کۆمیتهیێ دا جهبگرن ژی دڤێ ههری کێم خوهدی سێ (۳) بهرههمێن چاپکری بن. سهرۆکێ کۆمیتێ ژی دڤێ کهسایهتیهکی د ناڤا کوردان دا ناسکری، زانا و خوهدی گهلهک بهرههم به.
پشترا کۆمیته د ناڤا خوه دا کار ل ههڤ پارڤه دکن و ههر بهرپرسهکی کۆمیتێ ژی دکارن د بن بهرپرسیاریا خوه دا کۆمیتهیهکێ هلبژێرن. ههگهر ئیمکان ههبه دڤێ ل ههر وهلاتهکی کۆمیتا نڤیسکاران بێ دامهزراندن. ههگهر ئهڤ ئیمکان نەبە دڤێ یهک ببه بهرپرسێ وی وهلاتی.
دڤێ ئهڤ ژی نهیێ ژ بیر کرن کو نڤیسکار و ڕهوشهنبیر پێشکێشێ جڤات و سیاسهتمهدارێن خوه نه. ئهو دکارن ب نهرین و دیتنێن خوه، ب نڤیس و گۆتنێن خوه یێن وێرهکی دهستهلاتان ژی بگوههرن. لۆما پێویسته کو ئهڤ ڕهوش د ناڤا ڕهوهندێ ژی بهرچاڤ ببه.
دڤێ فهدهراسیۆنا ژنان، جوانان و یێن پێشهیی ژی ب ڤی ڕهنگی به. دا کو ئهو ژی بکاربن کارێن خوه ب سهرێ خوه ڕهحهت بکن.
کۆمیتا ڕێڤهبر ژ مههێ جارهکێ و یا مهجلیسێ ئانگۆ یا گشتی ژی ژ سێ مههان جارەکێ بجڤن و ڕاپۆرێن خوه پێشکێش بکن کو کێ چ کار کربن ب زهلالی بێ زانین. کێماسی بێنه دیتن دا کو ئهو ژی بێنه تهمام کرن.
پشتی جڤینا گشتی یا مهجلیسێ دڤێ ڕاپۆرا کار ژ بلی یا تێکلیێن ناڤنهتوهیی ژ ڕایا گشتی را بێ زهلالکرن.
دڤێ فهدهراسیۆنا نڤیسکاران سالێ ۲-۳ نڤیسکارێن خوه ژ بهر کارێ وهشاندنا بهرههمێن وان، وان خهلات بکه. ئهڤ ژ بۆنا جوان و ژنان ژی دهرباس دبه.
دڤێ سالێ جارهکێ کۆنفهرانسا ڕهڤهندێ بێ ئاماده کرن کو ل ور گهنگهشه و موناقهشهیێن ل سهر کار بێنه کرن. دڤێ کورد و جیهان ببینن کو بێ ئهڤ ڕهوهند چاوا ژ بۆنا کوردان کار دکه.
ل گۆر من دڤێ ههرکهسێن د کۆمیتا ڕێڤهبر یان د مهجلیسێ دا جهبگره پێویسته نه ژ بۆنا خاتران به. ل گۆر زانین و زیرهکبوونا وان، بێنه هلبژارتن و خوهدی دیپلۆمایێن بلند بن. ئهو کهسێن ژ بۆنا مهجلیسێ ژی بێنه هلبژارتن دڤێ دیرۆکا وان یا وهلات و ئهورۆپا، خوهدی چهند بهرههم و ب چ مژوول بوون و مژوولن، بێ زانین.
دڤێ ئهم ڤێ ژی باش بزانبن کو ههبوونا باشوورێ کوردستانێ ههبوونا مه ههمی کوردانه. گۆتن، تێبنی و پێشنیارێن سهرۆک بارزانی دڤێ ژ بۆنا مه تهڤان ببن گوهار. ب ڤی ڕهنگی و ژ کارێ دۆستانی و ههڤرێیێ بێتر ل گۆر چالاکی، زانه و خهباتێن کهسان ئهو بێنه هلبژارتن.
دخوازم سپاسی ڕێزدار شیفا بارزانی بهرپرسێ ڕهوهندێ بکن کو ژ دامهزراندنا وێ و ههتا نها خوه گهلهکی وهستان و دوهستینه کو ئهم ب ههڤرا ڕهوهندا خوه ب سهر بخن.
ب هێڤیا ڕهوهندهک هێشتا خورتر و چالاکتر.
