رۆژنامەیا دیلی تلگراف یا بەریتانی رۆژا ئەینی 30.11.2018ێ راپۆرەك وەشاندیە و تێدا دبێەژە كو ئیرانێ چەند گرۆپێن چەكدار ئانیئە عیراقێ پەروەردە كرنە داكو ھەر كەسێ سیاسەتا ئیران ل عیراقێ پەیرەو دكە بكوژە و ژناڤ ببە. لگۆر وێ راپۆرێ ئیران ڤێ یەكێ دكە داكو دەستێوەردانێ د كاروبارێن حكومەتا نوو یا عیراقێ دە بكە.
راپۆرا رۆژنامەیا دیلێ تلگراف ژ ئالیێ بەرپرسێ بەشا كارووبارێن بەرگریێ، كون كوگلن، ڤە ھاتیە نڤیسین و ئاگاداری و زانیاریێن خوە ژ بەرپرسێن ئەمنی و بەرگریێ یێن بەریتانی وەرگرتنە و دێژە كو ئەڤ گرۆپێن كوشتن و ژناڤبرنێ ژ ئالیێ قاسم سلێمانی فەرماندارێ فەیلەقا قدس یا پاسدارێن شۆرەشا ئیسلامیا ئیرانێ ڤە ل عیراقێ ھاتنە بەلاڤ كرن ئو ئارمانج ژێ ترساندن و بێدەنگ كرنا نەیارێن سیاسەتا ئیرانێ یە.
ئەڤ گرۆپێن كوشتنێ پشتی ھلبژارتنا پارلامەنتۆیا عیراقێ، مەھا گۆلانا بۆرێ ، پشتی ئیران نەكاری حكومەتەكا لگۆر خوە ئاڤا بكە و بەربژێرێن وێ نەكارین پۆستا سەرۆكوەزیریێ وەربگرن، دەست ب كریسرێن خوە كرنە.
بەرپرسێن ئەمنی و لەشكەری یین بەریتانیایێ كو ل عیراقێ ھێزێن عیراقی مەشق و راھینان دكن ژ رۆژنامەیێ رە گۆتیە كو ئیرانێ ھژمارەكە گرۆپێن چەكدار ژ فەیلەقا قودس ھنارتنە عیراقێ داكو كەسێن ئیرانێ رەخنە دكن و ژ سیاسەتا وێ رە ئاستەبگیا چێ دكن، ژناڤ ببە.
رۆژناما ناڤبوری د راپۆرا خوەدا چەند میناكان ددە وەكە:
1- كوشتنا عادل شاكر تەمیمی كەساتی و ھەڤلابەندێ نێزیكی حەیدەر عەبادێ، كو ژ ئالیێ گرۆپێن سەر ب فەیلەقا قودس ڤە ھاتیە كوشتن. كەساتیەك شیعی بوو.
2- كوشتنا شوقی حداد كەساتیێ شیعی نێزیكی مقتەدا صەدر
3- ھەولدانا كوشتنا راضی طائی راوێژكارێ عەلی سیستانی، لێ ھەولدانا كوشتنا وێ بسەر نەكەت. راضی ل دژی دەستێوەردانا ئیرانێ یە و دخوازە سنورەك ژ دەستێوەردانێن ئیرانێ رە بێ دانان.
رۆژنامە دبێژە گەلەك میناكێن دن ھەنە ئو ئیران دخەبتە حكومەتا نوو یا عیراقێ بترسینە و وێ نەچار بكە لگۆر ئیرانێ تەڤبگەرە.
وەكە تێ زانین بەری ھەیامەكی چەند ژێدەرێن نووچەیان ل عیراقێ راگەھاند بوو كو قاسم سلیمانی فەرمانا كوشتنا مقتەدا صەدر دابوو ئو ئەو ب (بەرازێ سعودیێ) بناڤ كربوو.
سود ژ سومەریە ھاتیە وەرگرتن
