هه‌ر ده‌ما کو، مه‌دیایا پارتییا کارکەرێن کوردستانێ (پەکەک) ئێریشێ پارتییا دەمۆکراتا کوردستانێ (پەدەکە) و باشوورێ کوردستانێ بکه بزانن جاردن خرابیه‌ک مه‌زن تێ پلانکرن. پەکەکە ته‌ڤی سه‌رۆکێ خوه د پرسا دژمناتییا خه‌تا نه‌ته‌وی دا گه‌له‌ک ب حه‌ساسی ته‌ڤدگه‌رن. ژبه‌ر کو بنگه‌هێ وان ل سه‌ر دژمناتییا پەدەکێ و خه‌تا نه‌ته‌وی هاتیه ئاڤاکرن. ئه‌و ژ ئالیێ خوه‌دیێن خوه‌ڤه ب ڤی ئاوایی هاتنه په‌روه‌رده‌کرن.
پشتی ترکیێ د چارچۆڤه‌یا پرۆژه‌یا ”ترکیەیا بێ ته‌رۆر” دا ده‌ست ب پلانا خوه کر و ئۆجەلان د ڤێ چارچۆڤەیێ دا به‌رسڤا داخوازیێن باخچه‌لی دا، پێڤاژۆیه‌ک نوو ل ترکیێ و باکورێ کوردستانێ هات ده‌ستپێکرن. د ڤێ چارچۆڤەیێ دا پەکەکێ خوه هلوەشاند و پرۆسه‌سا چەکدانینێ ده‌ستپێکر. شاندەیێن پەکەکێ سه‌ردانا باشوورێ کوردستانێ کرن، هه‌ڤدیتن ل گه‌ل ڕایەدارێن کوردستانێ و پارتییێن سیاسی کرن. پەدەکێ گه‌له‌ک ب گه‌رمی پێشوازیا ڤان شاندەیا کر. باوه‌ریه‌ک په‌یدا بوو کو، پەکەکێ خوه گوهارتیە.
لێ ڕاستیه‌ک هه‌یه ئه‌گه‌ر پەکەکە نه‌یارتیا پەدەکێ و بارزانیان و د که‌سایه‌تیا وان دا دژمناتییا خه‌تا نه‌ته‌وی نه‌که، نکاره سیاسه‌تێ بکه. پێدڤیە پەدەکە و تایبەتی ته‌ڤی کادرۆیێن خوه ڤێ یه‌کێ باش بزانن و تێبگەهن.
نها پەدەکە ژ بۆ باکور و ڕۆژاڤا تێکنه‌چه د ناڤا ته‌ڤگه‌ره‌ک دا یه، ژ بۆ ده‌ستکه‌فتیێن خوه یێن باشوور ژ ده‌ستنه‌دن د ناڤا ته‌ڤگه‌ره‌ک دا یه و پلانێن جودا دنرخینه.
ل ڕۆژاڤایێ کوردستانێ چو ڕێیه‌ک ل پێشیا پەکەکێ نەمایه، ب بانگا ئۆجەلان ئه‌و ژی دێ داویێ دا خوه ڕاده‌ستی ده‌ستهلاتا سووریێ بکن. لێ وه‌ک هه‌ر جارێ دێ ل گۆرا خوه ب ده‌ره‌وا گۆتاره‌کێ ژ ڤێ یه‌کێ را ببینن.
مه‌دیایا پەکەکێ و دووڤێن وێ ل ڕۆژاڤا ئیدیعا کرن کو حکومه‌تا هه‌رێما کوردستانێ ده‌ست ب ئاڤاکرنا دیواره‌کی به‌تۆنی ل سه‌ر سینۆرێ باشوورێ کوردستانێ و ڕۆژاڤایێ کوردستانێ کریه. مه‌دیایا پەکەکێ ڕاگەهاند کو حکومه‌تا هه‌رێما کوردستانێ ده‌ست ب ئاڤاکرنا دیواره‌کی به‌تۆنی یێ ۳ مه‌تر بلند و ۷٥ سانتیمه‌تره ستوور ل سه‌ر سینۆرێ ڕۆژاڤا کریه. ڕاپۆرت و نووچەیێن پەکەکێ ب ئاشکه‌ره‌یی پەدەکێ تاوانبار دکن و دبێژن کو ئه‌و دیوار ژ بۆ “پشتگریا گه‌فێن ئەحمەد شەرع” تێ چێکرن.
لێ به‌لێ، ئه‌ڤ ڕاپۆرت و نووچەیێن مەیایا پەکەکێ زوو ده‌رکه‌تن کو نه‌راست. ژ بەر کو ئەو دیوار ژ سالا ۲۰۲۲ئان ڤرڤه ب ئاگاهداریا پەکەکێ و هێزێن وێ یێن هه‌رێمی هاتیه چێکرن.
ڕاپۆرتا مه‌دیایا پەکەکێ هه‌ر وها دیار کر کو “ده‌ریێ سینۆر یێ سێمالکا ژ ئالیێ پەدەکێ ڤه هاتیه گرتن.” لێ به‌لێ، ده‌ریێ کو وه‌کی ده‌ریێ سێمالکا-پێشخابوور تێ زانین، ژ بۆ سڤیلان و ئالیکاریان ڤه‌کری یه.
فه‌رمانداریا زێره‌ڤانێن سینۆر یێن ئیراقێ ڕاگەهاند کو ئۆپه‌راسیۆن ب ته‌ڤاهی د بن چاڤدێریا حکومه‌تا ئیراقێ دا هاتیه کرن. فه‌رمانداریێ دیار کر کو پلان هه‌موو خه‌تێن سینۆر، ته‌ڤی سێگۆشه‌یا ئیراق-ترکیه-سووریێ ژی، دگره ناڤ خوه.
داخویانیا به‌رده‌ڤکێ فه‌رمانداریا زێره‌ڤانێن سینۆر یێن ئیراقێ ب تەمامی نووچه‌یا مه‌دیایا پککێ ڕه‌د کر. لێ ڕاستیه‌که دن ژی ل پشت دیواران هه‌بوو. پەکەکە و ڕێڤه‌به‌ریا ڕۆژاڤا ل سه‌ر به‌شا شنگالێ یا دیوار ب حکومه‌تا ئیراقێ را ل هه‌ڤ کربوون و بێده‌نگ مابوون. نها، ده‌ما کو ئه‌و ژ سینۆرێ هه‌رێما کوردستانێ ده‌رباس دبه، ئه‌و خوه وه‌کی کو ژ بوویه‌رێ هایدار نینن نیشان ددن.
هه‌تا ل ده‌ڤه‌را ته‌له‌عفه‌رێ ده‌ما دیوار دهاتە ئاڤاکرن، چەکدارێن پەکەکێ زێره‌ڤانێیا کارکه‌رێن کو دیوار ئاڤادکرن دکر.
ئه‌ڤ یەک تێ زانین، لێ مخابن هێشتا هنده‌ک ژ بۆ پەکەکێ و سیاسه‌تا وێ یا قرێژ نه‌بینن ل به‌رخوه ددن. ب پەکەکێ را چ پەیوەندی هه‌بن یان ژی ژ بۆ به‌رژه‌وه‌ندیێن نه‌ته‌وی تێکلییەک پێوستبه بێ کرن ژی، پێدڤیە گه‌له‌ک ب زانه‌بوون به. لێ ئه‌گه‌ر پکک نه‌یێ ناسکرن و سیاسه‌تا وان یا قرێژ نه‌یێ زانین، دێ مرۆڤ د ده‌ستێ پەکەکێ دا ببه له‌یزتک. بلا ب ناسکرن ب پەکەکێ را پەیوەندی هه‌بن. ئه‌گه‌ر مرۆڤ قرێژاهیا وان تێ بگەهه، ڕاستیا وان بزانبه ممکنه ئه‌و نکاربن چو زه‌ره‌رێ بدن، وه‌ک دن خه‌ته‌ره..
٢٠\٩\٢٠٢٥
نێرین/شرۆڤه
