سیاسی

دەستکەفتی و ناکوکیێن سیاسى

 رمضان نصرالدین کێڤلى

 بەرى هەلبژارتنێن پەرلەمانێ کوردستانێ، سەروکێ حکومەتێ بابەتەک دگەل هژمارەکا دەزگایێن راگەهاندنێ شروڤەکر و گوتنەکا (بەرێز/ نێچیرڤان بارزانی) سەرنجا من راکێشا دەمێ دبێژیت: هەردەما ئاریشەک یان پرسگرێیەک ل کوردستانێ دروست ببیت هەمى لایەنێن سیاسى پارتى ب بەرپرسیار دبینن و ئەو لایەن بەرپرسایەتى ب ستویێ خوڤە نا گرن و بەروڤاژی ژی دەمێ ب هەر رێکەکێ دەستکەفتەک بو کوردستانێ دهێت هەمى هەڤپشکێن ئەوى دەستکەفتى نە.

 ل ڤێرە گومان تێدا نینە هەر حزبەکا سیاسى ژ بەرپرسایەتیێ ب رەڤیت بەرامبەر هەر بویەرەکێ یان رەوشەکا دهێتە پێش ئەوى لایەنى چ خاندن و پێشبینى ژلایێ سیاسى ڤە بو داهاتویێ پروسێسا سیاسى و پێشهاتێن سیاسى نەبویە لەورا سیاسەتا ئەوان لایەنان سیاسەتەکا کاتى یە بتنێ بو وێ قوناغێ یە یا تێدا دەرباز دبن و بەرنامە و ستراتیژیەت بو داهاتوى نینن نەخاسمە ل دوور پرسێن نەتەوەیی. لڤێرە زێدەتر بومە ئاشکەرا دبیت کا چەمکێ بەرپرسایەتى چیە و بوچى ئەو لایەن نەشێن ئەڤى بارى هەلبگرن.

 د سیاسەتێ دا ناکوکى هەنە دیسان هەڤکارى و رێککەفتن ژى دهێنە کرن، شەر هەیە دیسان ئاشتى ژى دهێتە دروست کرن، قەیران هەنە دیسان ستراتیژیەت ژى بو چارەسەریا ئەوان قەیرانان هەنە، بەلێ مخابن ل کوردستانێ گەلەک ژ لایەنێن سیاسى تەنها هەڤپشکێن حازریێ و دەستکەفتا نە.

 مەزنترین ناکوکێین هەرێمێ دگەل بەغدا دروست بون زوربەیی لایەنێن سیاسى ب رێکا کەنالێن خو یێن فەرمى هەرێم سوجبار دکرن بەلێ گەلەک شروڤەیێن کەسوکى لسەر ئاریشێن هەلاویستى دناڤبەرا بەغدا و هەرێمێ دا دهاتنە کرن نەخاسمە د بابەتێ ا(نەفتێ و مادێ 140 و هێزێن پێشمەرگەی) دا.

 ل دەمێ پێدڤی هەرێمێ بەرەڤانى ژ ئەزمون و پێگەهێ خو یێ دەستورى کریە بەلێ دەمێ دەلیڤە ژى بو دان و ستاندنا هاتیە رەخساندن کورد بەشەک بوینە ژ چارەسەریا سیاسى و دوماهیک ئەزمون ژى پشتى بویەرێن (16 ئوکتوبەرێ) بوینە و بابەتێ بەشداریا کوردان د کابینا (عادل عبدالمهدى) دا و پرسا بودجەیا عێراقێ، ب دیتنا من پەسەند کرنا بودجەیا عێراقێ ب ئەڤى شێوەیێ نوکە چەند هوکار هەبوینە ژوانا:

 ئەو بەرگریا ل سحێلا و پردێ هاتیە کرن باوەرى بو زوربەی لایەنێن عەرەبى دروست کریە و زانیە هێزا چەکى دگەل کوردان چارەسەریا چ بابەتان ناکەت بەلێ کورد د ئامادەنە هەمى دەمەکى بەرڤانیێ ژ ئاخ و کێشەیا خو بکەن و ئەزمونێن رژێمێن بورى سەلماندیە کو کورد ب چ هێزا ژناڤ ناچن بتنێ خیانەتا نافخو نەبیت.

سەرەدانا رێبەرێ گەلێ کورد (مسعود بارزانى) بو بەغدا و ئەنجام دانا چەندین کومبون و رێککەفتان کاریگەریا خو ل سەر پروسێسا سیاسى ب گشتى هەبویە نەخاسمە ل ئێک نێزیکرنا هەرێمێ و بەغدا ل سەر ئاریشێن هەلاویستی

 رەوشا نافخو یا عێراقێ و ناکوکیێن ناف مالا شیعى و سنى و باردوخێ وێ ب گشتى کاریگەرى لسەر ئەڤى بابەتى هەبویە.

گورانکاریێن هەرێمایەتى ب تایبەت ئابلوقەیێن ل سەر ئیرانێ و رەوشا سوریا کاریگەریەکا مەزن ل سەر رێکخستنا عێراقێ هەیە ب تایبەت بو هێزێن هاوپەیمان و ئەمریکا گرنگە کو ل قوناغا بهێت عێراقەکا بهێز و کوردستانەکا بهێز بهێتە دروست کرن هەمبەر وان بویەرێن نەچاڤەرێ کری ئەگەر بهێنە رویدان.

لەورا سەر ئەنجامێ ئەڤێ گوتارێ بومە دیار دبیت کو زوربەی لایەنێن سیاسى خو دگەل رەوشا نوکە د گونجینن و زوربەی وان ئەو پلان و ستراتیژیەتێن ئایندەی نین کو بشێن خاندنەکێ بو رەوشا دەڤەرێ بکەن ژ هەمى لایەکى ڤە بو هندێ د ژینگەها دەرڤە دا مفا ژێ بهێتە وەرگرتن و ئەڤ یاریێن سیاسى یێن ئەڤان لایەنان هەمى ئاشکەرا بوینە بو خەلکێ کوردستانێ لەورا ژى زوربەی وان ئاریشا متمتانە و باوەریێ هەیە دناڤبەرا خو وەکو حزب و جەماوەرێ کوردستانێ دا، دەستکەفت گەلەک جاران بەرهەمێ ناکوکیانە و ناکوکى ژى گەلەک جاران د ئاراستەیا خراب دا دبنە هوکارێ دروست بوونا نەسەقامگیریێ ب تایبەت ل نافخویا کوردستانێ.

25.01.2019

Back to top button