سیاسی

دەستێ كێ د بەریكا كێ دایە

گۆتوبێژێن د ناڤخوەیا ھەدەپێ دا‌ گەھشتن ئاستێ مه‌ساژێن دژبه‌رێن هه‌ڤ. د ڕاستیا خوه‌ دا‌ د ناڤا ھەدەپێ دا‌ کی خوه‌دیێ بریارێ یه‌ ناھێتە زانین. گه‌له‌ک جارا د ڤێ ده‌ربارێ دا مناقه‌شه‌ هاتنه‌ کرن، ھەر كەسەك وسا دزانە  کو ڕێڤه‌به‌رێن ھەدپێ یان ژی هه‌ڤسه‌رۆکێن ھەدەپێ خوه‌دیێ بریارێنه، لێ نەوسایە.‌

به‌ری دو ڕۆژان سه‌رۆکێ جەهەپێ، که‌مال کلچدارۆگلو، د هه‌ڤپه‌یڤنه‌کا خوه‌ دا‌ د ده‌ربارێ پرسا کورد دا ئاخڤی و گۆت كو ده‌زگه‌هێن ده‌وله‌تێ ب ڕێخستنه‌ک نە مەشروع را‌ موخاتاب نابه‌، لێ “ئه‌ردۆگان ئه‌ڤ یه‌ک کر. ده‌وله‌تێ  ئیمرالی کر موخاتابێ خوه‌.  ئیمرالی نه‌ ئۆراگانه‌ک مه‌شروعه‌.  کی مه‌شروعه‌؟ ئه‌م دکارن ھەدەپێ وه‌ک ئۆرگانه‌ک مه‌شروع ببینن.”

کلچدارۆگلو دبێژە كو ئه‌گه‌ر ھەولدانێن چارەسەركرنا پرسگرێکان بھێتە كرن “ئه‌م دکارن ل گه‌ل هەدەپێ وه‌ک ئۆراگانه‌ک مه‌شروع پرسگرێكا چارەسەر بکن.”

 لێ یا بالکێش ئەوە  کو هه‌ڤسه‌رۆکێ ھەدەپێ یێ به‌رێ، سه‌زائی ته‌مه‌ڵی، به‌رسڤا داخویانیێن کلچدارۆگلو دا. نە هه‌ڤسه‌رۆکێن ھەدەپێ یێن نھا و نە ژی ھەدەپێ وەكە رێكخستن بەرسڤا سەرۆكێ جەھەپێ نەدا..

ته‌مه‌لی د پەیامەكێ دا د توتته‌را خوە دا‌ دبێژه‌: “موخاته‌بێ چاره‌سه‌ریا پرسا کورد  ب ته‌نێ نه‌ هەدەپە یه‌. لێ ژ بۆ ساناھیكرنا چاره‌سه‌ریا ڤێ پرسێ ئالیێ زه‌مینەیێ ده‌مۆکراتیک ئاماده‌کری هەدەپە یه‌. لێ دڤێ نەھێتە ژ بیرکرن کو، ناڤنیشانا چاره‌سه‌ریا ده‌مۆکراتیک و موخاتابێ بنگه‌هین ئیمرالی یه‌.”

نها ژی هه‌ڤسه‌رۆکێ به‌رێ یێ ھەدەپێ سه‌لا‌حەدین ده‌مرتاش د ڤێ ده‌ربارێ دا‌ داخوویانیه‌ک دا. ده‌مرتاش دبێژه‌ کو، ژ بۆ چاره‌سه‌ریا پرسا کورد و هه‌موو پرسگرێکێن ترکیێ‌ هەدەپە موخاتبه‌. د به‌رده‌وامیا داخوویانیا خوه‌ دا‌ ده‌مرتاش دبێژه‌: “ب قاسی کو ئه‌ز دزانم، هەدەپە داخواز دکه‌ کو هه‌موو پرسگرێکێن ترکیێ، د ناڤ وان دا‌ ژی پرسا کورد، چاره‌سه‌ر ببن، د ڤی واری دا ھەدەپە ئەکتۆره‌ک سیاسی یا خوه‌دی ڤینه‌، و بێ گومان ئه‌و موخاتابه‌. ناڤنیشانا چاره‌سه‌ریێ ژی ب ئاوایێ خوه‌زایی مه‌جلیسا مه‌زن یا نه‌ته‌وه‌یی یا ترکیێ یه‌.

بێ گومان ده‌مرتاش به‌حسا پرسا کورد، وەكە پرسەكە نەتەوەیی ل تركیێ ژ بنی بەحس ناكە،  ئەو پرسا کورد ژی وه‌ک ھەر پرسه‌ک دن یا ترکیێ دبینه‌. لێ ده‌مرتاش ژ ئالیه‌کی ڤه‌ دبێژه‌ ئیرادا مه‌ ئۆجەلانه‌ و ژ ئالیه‌ک دن ڤه‌ قه‌بوول ناکه‌ کو ئۆجەلان جهێ بریارێیه‌.

د ڕاستیا خوه‌ دا‌ ده‌ردێ هەدەپێ،ده‌مرتاش، ته‌ممه‌لی یان ژی ئۆجەلان ب چو ئاوایه‌کی نە چاره‌سه‌ریا پرسا کورد ل باکورێ کوردستانێ. ئه‌و د چارچۆڤه‌یا ترکیه‌بوونێ دا‌ پرسا کورد دنرخینن و به‌حسا ڕاستیا خوه‌ ناکن، هه‌ولددن مله‌تێ کورد بخاپینن. لێ د ڕاستیێ دا ئەو‌ خوه‌ دخاپینن.

Back to top button