سیاسی

دەمرتاش ڤێ جارێ گۆتنەک ژ خوە مەزنتر کر

ل ترکیێ و باکورێ کوردستانێ ژ ساله‌کێ کێمتر ژ بۆ هلبژارتنا مایه‌. گه‌له‌ک پسپۆر ژی ئیدیعا دکن کو دێ هلبژارتنێن پێشوه‌خت بێنه‌ کرن. بریارا ڤێ ژی د ده‌تسێ ئاک پارتیێ دا یه‌. ئاک پارتی ل گۆرا خوه‌ هنده‌ک سه‌ناریۆیا ئاماده‌ دکه‌ و ده‌ما بزانبه‌ کو، دێ د هلبژارتنان دا سه‌ربکه‌ڤه‌ دێ یەکسەر بریارا هلبژارتنێن پێشوه‌خت بدە.

هه‌م ده‌ستهلات هه‌م ژی موخاله‌فه‌ت وەسا هزر دکن کو دێ د ڤان هلبژارتنان دا دەنگێن خوە زێدە بکن و پشتا خوە ب دەستخستنا دەنگێن دەنگدەرێن کورد گەرم دکن. ب گۆتنەک دن، هه‌ردو ئال ژی، دەستهلان و ئۆپۆزسیۆن ژی دخوازن ده‌نگێن ئالیگرێن هەدەپە بخوە ببن. حه‌ساب و کتاب نها هه‌موو ل سه‌ر ڤێ یه‌.

ژ ئالیێ پەکەکێ/هەدەپێ ڤە رۆژانه‌ داخوویانیێن جودا دهێنه‌ دان. پەکەکێ ئاک پارتی کریه‌ ئارمانج و هه‌موو سیاسه‌تا خوه‌ ل سه‌ر بنگه‌هێ دژاتیا ئاک پارتیێ دکه‌ و هه‌ولدده‌ کو ب ئاوایه‌کی دگه‌ل جەهەپێ هەڤپەیمانیەکێ ئاڤا بکە. لێ جەهەپە راسته‌ راست دگه‌ل پەکەکێ ناده‌ و ناستینه‌. ئه‌و ژی دخوازن وه‌ک هلبژارتنێن بەرێ یێن شه‌راداریا، بێی کو ئاشکه‌ره‌ بکن، هەڤپەیمانیەکا نهێینی دگه‌ل هەدەپێ پێکبینن.

ب گۆتنەک دن، جەهەپە دخوازە د سه‌ر پشتا ده‌مرتاش را خوە نێزکی هەدەپێ بکە و ئاک پارتی ژی دخووزە د سه‌ر پشتا ئۆجەلان را خوە نێزکی پەکەکێ بکە. هه‌ردو ئال ژی ژ بۆنا کو ده‌نگێن هەدەپە وه‌ردگره‌ بخوە ببن هه‌موو رێیه‌کی مەشرۆع دبینن، لێ ڤه‌کری نابێژن.

به‌ری چه‌ند رۆژه‌کان، هه‌ڤسه‌رۆکێ به‌رێ یێ هەدەپێ سه‌لاحەدین ده‌مرتاش داخوویانیه‌ک دا و گۆت کو، دڤێ پەکەکە چەکێ خوە دەینە.. بێ گومان ئه‌ڤ گۆتن دکاره‌ د ناڤا پەکەکێ دا سه‌رێ ده‌مرتاش گه‌له‌کی بێشینه‌. ده‌مه‌کی ئۆسمان بایده‌مر ژی به‌حسا تشته‌کی ب ڤی ئاوایی کربوو. لێ ئۆجەلان ئه‌و هه‌تکاند و گه‌له‌ک گۆتنێن توند د ده‌ربارێ وی دا گۆتن. بایده‌مر هێدی ده‌ڤێ خوه‌ ڤه‌نه‌کر و خوه‌ ب ته‌مامی بێ ده‌نگ کر.

نها ده‌مرتاش هه‌مان تشتی دبێژه‌، گۆتنا ده‌مرتاش هه‌ولدانه‌که‌ کو پتر چه‌پێن ترکان و جەهەپێ رازی بکه‌. لێ ده‌مرتاش ژی دزانه‌ کو رۆژا پەکەکە دەست ژ چەکان بەردە، نه‌ پەکەکە دمینه‌ و نه‌ ژی ده‌مرتاش. پەکەکە نانێ خوه‌ ب چه‌کان دخوه‌. نه‌ ژ چه‌کان بوویا ئه‌و هێزێن تاری یێن پەکەکێ خوه‌دی دکن چو قیمه‌ته‌کێ نادن پەکەکێ.

هێشتا ئۆجەلان و قه‌ندیل ئه‌ڤ گۆتنا ده‌مرتاش نه‌ نرخاندنه‌. لێ ئه‌ڤ یه‌ک دکاره‌ تشتا هاتی سه‌رێ بایده‌مر، بینه‌ سه‌رێ ده‌مرتاش ژی.

د ڕاستیا خوه‌ دا د ناڤا پەکەکێ دا ده‌مرتاش نه‌ فیگوره‌ک سه‌ره‌کییه‌. چاره‌نووسا وی ب بریارا ئۆجەلان یان ژی قه‌ندیل ڤه‌ گرێدا یه‌.

گه‌لۆ کا له‌یلا زانا ده‌مه‌کی د سه‌رێ گوڤه‌ندێ دا بوو، نها ل کوویه‌؟ چ دکه‌؟ د ناڤا پەکەکێ دا چ گرانیا وێ هه‌یه‌؟ ژ بۆ چ د جه ده‌ چلمساندن؟ ئه‌گه‌ر به‌رسڤا ڤان پرسان بهێتە دان دێ مرۆڤ باشتر ره‌وشا ده‌مرتاش تێبگەهە.

٢٠٢٢/٧/١٩
نێرین/شرۆڤه‌

Back to top button