دەم پارتی داخوازا دیتنا پەدەکێ دکە و پەدەکە ژی بەرسڤ نادە
د سیاسه‌تێ دا ژی وه‌ک هه‌ر ئاوایێ ژیانێ ئه‌تیکه‌ک هه‌یه، گه‌له‌ک جارا به‌حسا ئه‌خلاقێ سیاسه‌تێ ژی تێ کرن. لێ ده‌ما مرۆڤ به‌رێ خوه دده ده‌م پارتیێ/پەکەکێ مرۆڤ ب چو ئاوایی ڤی ئه‌خلاقی نابینه. شاندەیا ده‌م پارتیێ هاتیه باشوورێ کوردستانێ و هه‌ولدده دگه‌ل پارتیێن سیاسی هه‌ڤدیتنا بکه. هه‌تا نها کارینە ب ته‌نێ دگەل پارتی و ڕێخستنێن تاشه‌رۆن یێن کو، پەکەکێ ل باشوور ئاڤاکرنه هه‌ڤدیتنان بکن. وه‌ک دبێژن. ل گور نووچەیەکا رووداوێ، دەم پارتیێ داخوازا هه‌ڤدیتنێ ژ پەدەکێ، یەنەکێ و ته‌ڤگه‌را گۆران ژی کریه. لێ ئه‌ڤه ٤ ڕۆژن به‌رسڤا وان نه‌دانه.
نها ژ به‌ری هه‌ر تشته‌کی، یەنەک ل باشوور پشتگریا پەکەکێ دکه، لێ هه‌ر گاڤێ دکاره ژ ده‌ڤ ڤێ هه‌لوه‌ستا خوه به‌رده. یەنەک ب ئاقله‌ک سڤک پەکەکێ ل دژێ پەدەکێ ب کار تینه. لێ دێ ڕۆژەک وه‌رە یەنەک هێدی نکاره خوه ژ ڤێ به‌لایێ خلاس بکه و دێ باجەک گران بدە. ژ به‌ری نها ده‌مه‌کی گه‌له‌ک درێژ پەدەکە ژی ڤێ پێڤاژۆیێ ڕه ده‌رباس بوو. لێ پەکەکێ هه‌ر گاڤا کو ئاڤێتن خیانه‌ت ل هەمبه‌ر پەدەکێ کر. یەنەک دکاره هه‌ڤدیتنێ ب ده‌م پارتیێ را بکه، لێ گه‌لۆ دێ ناڤەرۆک چه‌وا به ئه‌ڤ پرسا وانه.
ده‌ما ده‌م پارتی به‌حسا پەدەکێ و هه‌ڤدیتنا بکه، گه‌ره‌ک ژ به‌ری هه‌رتشته‌کی ژ بۆ هه‌موو کریار و داخوویانیێن دژمنانه و بکارانینا گۆتنێن وه‌ک خیانه‌تێ ل دژی پەدەکێ و بارزانیان، دۆزا لێ بۆرینێ ژ پەدەکێ بکه. پەکەکە ڕۆژانه د مه‌دیایا خوه دا پەدەکێ ب خیانه‌تێ و هه‌ڤالبه‌ندیا ترکیێ ئتیهام دکه، پەرله‌مه‌نته‌ر و به‌رپرسێن ده‌م پارتیێ ژی ته‌ڤلی ڤان پرۆپاگانده‌یا پەکەکێ دبن و ڕۆژانە ل باکورێ کوردستانێ و ئه‌ورۆپایێ ل دژێ پەدەکێ خوه‌پێشاندانان دکن. ده‌م پارتی بێ کو شه‌رمێ بکه سه‌رۆک بارزانی ب هه‌ڤالتیا باخچه‌لی ئتیهام دکه و د ڤێ ده‌ربارێ دا وه‌شانا دکه. ده‌م پارتی به‌شه‌ک ژ سیاسه‌تا پەکەکێ یه. ده‌م پارتی داخوویانیێن دژی پەدەکێ دا خیانه‌تێ ل ڕێیا ده‌وله‌تبوونا کوردا دکه.
نه‌ورۆز ئویسال پەرلەمەنتەرا دەم پارتیێ کو، نها دگەل شاندەیەکا دەم پارتیێ ل باشورێ کوردستانێ یە، ب خوه ڤان تشتان باش دزانه، لێ مخابن ئه‌و ب خوه ژی پیۆنه‌کی یا پەکەکێ ب خوه یه. نابه تو دژمناتیا ئالیه‌ک سیاسی بکی و ب هه‌موو ئاوایی وان دژمنێ خوه یێ سه‌ره‌که ئیعلان بکی و ب خیانه‌تێ ئتیهام بکی و ڕۆژا دن، وه‌ک تشته‌ک نه‌بوویه، دۆزا هه‌ڤدیتنان بکی. جهێ ڤێ هه‌لوه‌ستا وه د ئه‌خلاقێ مرۆڤاتیێ دا نینە. وه‌شانا پەکەکێ و ب تایبەتی ڕۆژنامەیا یه‌نی یاشام کو ب زمانێ ترکی وه‌شانێ دکه، وێنه‌یه‌ک سه‌رۆک بارزانی و ده‌وله‌ت باخچه‌لی به‌لاڤ کربوو (وێنه مۆنتاژکریبوو) و نڤیسه‌ک ل سه‌ر هاتبوو نڤیساندن. گه‌لۆ پەرله‌مه‌نته‌را ده‌م پارتیێ، نه‌ورۆز خانم، دکاره واته‌یا ڤێ یه‌کێ بێژه؟
ده‌م پارتی ڤێ جارێ خه‌له‌ت دله‌یزه، تو خزمه‌تا چه‌پێن ترکێن که‌مالیست بکی و ب ده‌ڤێ وان ئێریشێ پەدەکێ و نرخێن کوردستانی بکی نابه. یان هوون دێ کورد بن و وه‌ک کوردستانیان ته‌ڤ بگه‌رن و خوه وه‌ک پارتیه‌ک کورد بدن ناساندن یان ژی هه‌تا هه‌تایێ هوون دێ پییۆنێن چه‌پێن که‌مالیست بن..
