دەنگدەران رویل پێشكێشی هەمی حزبا و حزبا خوەدانێ “هنگڤینێ عەسلی” کر
هەلبژارتن ل وەلاتێن جیهانا سیێ ب چو رەنگا ب ئاوایەکی دلخواز برێڤە ناچیت، گزی و دزی دێ هەر هێنە کرن ئانکو کی خوەدان پارە و حیلەبازەکێ ب شەرتێ خوە بیت، ئەو دێ سەركەفتیێ ئێکێ بیت، ڤێجا ئەگەر هندەک پیرۆزی و چویڤ ژی دگەلدا بیت، ئەو ئالی دێ بێ زەحمەت سەركەفتیێ مسۆگەر بیت.
د ڤان هەلبژارتنان (2021.10.10) یێن عێراقێ دا ئەڤ دیتنا سەری پشتڕاس کرەڤە، هەرچەندە ب گۆتنا گەلەک چاڤدێرێن جامێرێن “هنگڤینێ عەسلی” ژ هێرڤە و وێڤە ب دیاری وەرنەگرتین، دبێژن: “ئەڤ هەلبژارتنە دبێ حیلە و حەوالە بوون.” ڤێجا حەتا چەندێ ئەڤە ڕاستە هێشتا نەهاتیە پشتڕاست کرن!
ب هەر ئاوایی بیت ژ بلی وان ئالیێن ب دلێ خوە کورسی بدەستڤە ئینایین، یێن دی تەڤ دنەڕازینە و دبێژن: “حیلە و حەوالە وەسا هاتینە کرن کو خوە کورە و کەڕ و ڵال ژی ب ڤێ چەندێ حەسیانە؟” نزا قیما من ژی ناهێت کو ئەڤ ماستە یێ بێ موو بیت، چونکو نە بەرعاقلە هەلبژارتن ل عێراقێ بهێنە کرن و دەنگ بفرنە وەڵاتەکی دن یێ شەهرەزا ب حیلە و حەولا و ئەگەر هوین باوەر نەکەن ل پرسا کۆمپانیا دانە گاز و حوکمەتا هەرێما کوردستانێ مێزە بکەن کانێ وێ کۆمپانیێ چەند کولاڤێن مەکسیکی کرنە سەرێ وێ و هێشتا قیما وێ نەهاتیە ژ دادگەهەکێ بۆ ئێکا دی ڕادپێچیت!
تشتێ سەیر ژ ڤان هەلبژارتنێن ل جیهانا سیێ دهێنە کرن، پڕانیا ئالیێن پشکدار د پرۆسەسێ دا باوەری پێ نینە، لێ بۆ رووسپیکرنا خوە و ژ بنێ گوهی دادکەڤن ڤێ پرۆسەسێ و بانگەشەکا وەسا دکەن کو دبیتە جهێ پێترانەکرنێ، چو ئالی پرۆژە و پرۆگرامێن خوە بۆ دەنگدەران پێشکێش ناکەن، بەلکو دمیننە ب قڕکا هەڤ ڤە و لەکەیێن هەڤ ب “سابوونا قڕێ” دشۆن و گەلەک جارا دەربازی پرسێن سروشتی دبن وەکو وی برادەرێ گۆتی: “ئەز هنگڤینێ عەسلی مە”. مامۆ ئەگەر تو هنگڤینێ عەسلی بی باوەرکە ل بەغدایێ مێش دێ بۆ تە ژ بەسرا و ئەنبارێ، وەکو باڕە کەوێن ژ زۆزانا دهێن، دێ وەسا بەربنە سەر و چاڤێن تە و خوە ل بەر گەرما بەغدایێ ناگری! دڤێت تە پرۆژە هەبن نە ب هنگڤینێ عەسلی بچی بەغدایێ! ئەڤە ب خوە رەنگەکە ژ رەنگێن حیلەکرنێ و ڕەڤینە ژ بەرپرسیارەتیێ.
بێپرۆژەیییا ئالیێن سیاسی یێن نڤیسکی ڤان لایەنان ژ بەرپرسیاریا نەبجهئینا خوەستەکێن خەلکێ دەنگدایێ دپارێزیت، ئەڤە ب خوە ژی مەزنترین حیلەیە ل خەلکی دهێتە کرن. پرس ل ڤێرە نە کی هنگڤینێ عەسلی و نە عەسلییە بەلکو هەردوو ئالی و تەڤایا ئالیێن پشکداری کری د هەلبژارتنان دا دبێ پرۆژەنە و بەری نوکە ژی هەر دبێ پرۆژەبوون ژ وانا ژی خوەدانێ “هنگڤینێ عەسلی”.
بێپرۆژەیییا ئالیێن سیاسی و حزبا خودانێ “هنگڤینێ عەسلی” د گەڕێن پەرلەمانێ بوری دا نەکارینە بچوکترین شایستەیێن دارایی و پرسگرێكێن هەرێمێ ب رێکێن قانوونی ل بەغدایێ چارەسەر بکەن، یان هەر چو نەبیت رۆلەکێ باش بگێرن بۆ هێورکرنا کێشێن نابەینا حوکمەتا هەرێما کوردستانێ د گەل بەغدایێ، نەخێر ئەڤ رۆلە نەدیتینە چونکو دبێ پرۆژەنە و چو رێز بۆ دەنگدەرێن کوردستانێ نەگرتنە و ناگرن ژی. مەدیت کانێ رێژا پشکداریکرنا وەڵاتیان چەندا کێمبوو، ئها ژ بەر ڤێ چەندێیە خەلکی ب رێژەکا گەلەک کێم پشکداری د هەلبژارتنان دا کر و ئەڤە وێ دگەهینیت کو خەلکی رویل بدەڤێ ئالیێن سیاسی دا کر و ژ وانا حزبا خودانێ “هنگڤینێ عەسلی”.
محەمەد چەلكی
2021.10.16
دهۆک
