کەنالا بافل تالەبانی ل گه‌ل فه‌رماندارێ هێزێن ده‌مۆکراتیک یێن سوریێ، مەزلوم عه‌بدی، هه‌ڤپه‌یڤینه‌ک كر. د ڤێ هه‌ڤپه‌یڤینێ دا مەزلوم عه‌بدی دبێژە: ده‌نگێ من ژ بۆ یەنەکێ و سه‌رۆک بافل ه. بێ گومان ئه‌ڤ هێزێن کو، پشته‌ڤانیا بافل تالەبانی و یەنەكێ دكن گه‌له‌ک کفشن؛ ئیرانه، حەشدا شەعبی (ملیسێن ئیرانی ل ئیراقێ) نه، حزبولا و پەکەکە ل گه‌ل هه‌موو دام و ده‌زگه‌هێن خوه‌ڤه. ئه‌ڤ هێز هه‌موو ل سه‌ر مژاره‌كا سه‌ره‌کی ل گه‌ل هه‌ڤن و د ده‌ربارێ کوردستانێ دا ئارمانجه‌ک وان یا هه‌ڤبه‌ش هه‌یه. ئه‌و ناخوا‌زن کوردستانه‌ک ئازاد، سه‌ربخوه، ده‌مۆکراتیک و هه‌ڤده‌م ل هه‌رێمێ چێببه. ئه‌و د ڤان هلبژارتنێن کو ژ بۆ پاشه‌رۆژا ستاتوویا هه‌رێما کوردستانێ چاره‌نووسازن، ته‌نێ دخوازن ڕێ ل هێزبوونا ستاتوویا هه‌رێما کوردستانێ بگرن و ده‌ما ڕه‌وش ل گۆرا وان گونجاو به، هه‌رێمێ برووخینن. ژ خوه ڤێ یه‌کێ د بانگه‌شه‌یا خوه دا ڤه‌کری دبێژن. گۆتنا هه‌ری ماقول یا بافل “ ڕووخاندن“ه.
چه‌وا کو بافل ۲۰۱۷ێ ل که‌رکووک بەرەیەك پێکانی و نیڤا خاکا وه‌لات فرۆت، ئیرۆ هه‌مان پێڤاژۆیێ دخوازه ل گه‌ل هه‌ڤپه‌یمانێن خوه ته‌مام بکه.
پەكەكە ژ بۆ چ پشتگریا ڤان هێزێن کو دژی ده‌ستکه‌فتیێن نه‌ته‌وه‌یی و کوردستانی ل باشوورێ کوردستانێ نە، دکه؟ چو نرخاندن ژ ڤێ نه هه‌وجه‌یه، پەكەكە وه‌ک یەنەكێ ب ناڤێ کورداتیێ ڕێ ل ده‌وله‌تبوونا کوردا دگره. ل ڤێ ده‌رێ وه‌لاتپارێزێن د ناڤا پەكەكێ دا، کوردێن کو ب ناڤێ کورداتیێ هاتین خاپاندن و که‌تنه ناڤ ڕه‌فێن پەكەكێ دا و ڕۆژانه د شه‌ره‌ک بێ واته دا ژیانا خوه ژ ده‌ست ددن، دڤێ ده‌نگێ خوه ل هەبه‌ر خیانه‌تا سه‌رۆکاتیا پەکەکێ دکه ده‌رکه‌ڤن و ل سه‌ر خه‌ته‌ک نه‌ته‌وی کوردستانی ته‌ڤبگه‌رن.
به‌رێ خوه بدەنێ، ئیرۆ که‌سێن به‌رپرسیارێن پەكەكێ کو دژمناتیا خه‌تا نه‌ته‌وی دکن چو پەیوه‌ندیه‌ک وان ب کورداتیێ ڤە نینە.
ده‌ما کو به‌رپرسێن پەكەێ دبێژن، “ مه هزرا کوردستانه‌ک سه‌ربخوه ئاڤێتیه د تەنەكەیا زبلی دا“ .. بلا ئه‌ڤ یه‌ک ل بیرا هه‌ر کورده‌ک کو وژدانا کورداتیێ ل گه‌ل هه‌یه بمینە.
باوه‌ری و هزرا ده‌وله‌تبوونا کوردستانێ ناشکێت و دێ سه‌ربکه‌ڤه. ئه‌ڤ باوه‌ری یا ڕێبازا بارزانی یێ نه‌مره. هه‌تا کو کورد ل سه‌ر ڤێ ڕێبازێ ب بەردەوام بن چو جارا شکه‌ستن نینە و هه‌ر پێشڤه‌چوون دێ هه‌به.
