سیاسی

د ناڤ یەكێتیێ دا كی دگەل دووئیدارەییێ یە و كی دژە

پشتی شەرەدەڤێ د ناڤبەرا قوباد تالەبانی جیگرێ سەرۆكوەزیرێ ھەرێما كوردستانێ و مەحمود سەنگاوی ئەندامێ مەكتەبا سیاسیا یەكێتیا نشتمانیا كوردستانێ، تەئسیر و باندۆرا سەنگاوی د ناڤ یەكێتیێ دا بەر ب كزیێ ڤە چوویە و دچە. ژبەر ھندێ  مەحمود سەنگاوی ھەیام ھەیام داخویانیێن ئاگرین ددە و گۆما شێلی و گەنی یا یەكێتیێ د شلقینە كو باندۆرا خوە یا نەرێنی ل سەر ھەموو ھەرێما كوردستانێ دكە. ب ڤان داخویانیان دخوازە خوە دیار بكە.

مەحمود سەنگاوی د ئاخافتنەكا خوە دا قوباد تالەبانی ب جانتە ھەلگرێ نێچیرڤان بارزانی وەسف كربوو. لێ پشتی چەند رۆژان ژ گۆتنێن سەنگاوی، قوباد تالەبانی ژی د داخویانیەكە خوە دا ب دژواری كەتە سەر مەحمود سەنگاوی و  بگەلەك تشتان تاوانبار كر.

 قوباد تالەبانی  د ئاخافتنا خوە دا، ھەرچەندە ناڤێ مەحمود سەنگاوی  نەئینا لێ ژ ھەر كەسی رە زەلال و ئاشكرا بۆ كو بەھسا وی دكە، گۆت:  فەرعون ھەنە عەرد داگیر دكن، ڤیلا ئاڤا دكن، قاچاخجیێ دكن، خەلكی دكوژن،  رۆژنامەڤانان دكوژن، ھەزار و یەك كارێن خەراب دكن، كۆمەكا چەكداران ل خوە كۆمكرنە و باجێ ژ خەلكی وەردگرن، پارە ژ دوكانداران وەردگرن …. دەما ل كوردستانێ دقەومە خوە ب پالەوان دزانن، لێ پشت را چەپەرێن شەری چۆل دكن ، چەك و جەبلخانێ ل بەرەیێن شەری دھێلن و درەڤن،  ئەو چك و جەبلخانەیا ب خورە ژی دێنن ل بازار دفرۆشن.  كورێ جەلال تالەبانی ب ڤی ئاوایی وەسفا مەحمود سەنگاوی دكە.

دوھی ژی  مەحمود سنگاوی بەحسا دووئیدارەییێ كر و گۆت ئەو پێشوازیێ ل وێ یەكێ دكە كو ھەرێما كوردستانێ ببە دوو ئیدارە.

یێن وەكو مەحمود سەنگاوی، ئەگەر شەر و ئالۆزی نەبن، دێ رووت و تازی بن، چ باندۆرا وان د ناڤ جڤاكێ دا نامینە، ئەو ھەبوون و كەساتیا خوە د شەر و پەڤچوونان دا دبینن، ژ بەر ھندێ ئەو ھەرتم ئالیگرێ شەر و ئالۆزیانە.

دوو ئەندامێن پایەبلندێن یەكێتیێ ل دژی گۆتنێن مەحمود سەنگاوی دەركەتن و راگەھاند كو تەعبیرێ ژ ھەلوەستا فەرمیا یەكێتیێ ناكە.

   مستەفا چاڤرەش ئەندامێ سەركردایەتیا یەكێتیێ دبێژە كو خەلك ژ گۆتنێن مەحمود سەنگاوی بێزار بوویە. یەكێتی نە دگەل دووئیدارییێ یە و ب تشتەك خەراب دزانە.

شێخ جەعفەر ئەندامێ مەكتەبا سیاسیا یەكێتیێ دبێژە كو ھەر كەسێ بەھسا دووئیدارەییێ بكە ل سەر یەكێتیێ نابە مال و پەیڤدارێ یەكێتیێ ب تەنێ دكارە ھەلوەستا فەرمیا یەكێتیێ راگەھینە.

ئەڤ یەك تێ چ واتەیێ، گەلۆ د ناڤ سەرۆكاتیا یەكێتیێ دا،  كی دگەل دووئیدارەییێ یە و كی دژە، كی دخوازە و كی ناخوازە، ئەڤ رۆل تەوزیع كرنە یان تەڤلیھەڤیا ناڤ یەكێتیێ نیشان ددە؟

NH

Back to top button