بەیاننامەیا وەزارەتا پێشمەرگەی دەربارەی هێرشێن مووشەکی یێن ئیرانێ
هەولێر | ٢٤\٣\٢٠٢٦
وەزارەتا پێشمەرگەی د بەیاننامەیەکا فەرمی دا ڕاگەهاند، کو ئەڤڕۆ سپێدێ (٢٤\٣\٢٠٢٦) هێزێن پێشمەرگەی ل سنوورێ دەڤەرا سۆرانێ بوونە ئارمانجا هێرشەکا مووشەکی یا کۆمارا ئیسلامیا ئیرانێ. د ئەنجاما ڤێ هێرشێ دا، ٦ پێشمەرگە شەهید بوون و ٣٠ یێن دی ژی بریندار بوون.
داخویانییا وەزارەتا پێشمەرگە:
ئەڤڕۆ سپێدێ ٢٤\٣\٢٠٢٦، د دو هێرشێن ژ هەڤ جودا دا، بارەگەهێ فیرقەیا ٧ یا پیادە یا هەرێما ١ و هێزەکا فیرقەیا ٥ یا پیادە یا هێزێن پێشمەرگەی ل دەڤەرا سۆرانێ بوونە ئارمانج. ئەڤ هێرشە ب کریارەکا دوژمنکارانە، ب خەدر و خیانەت و دوورى هەمی پیڤانێن مرۆڤایەتى و جیرانیێ هاتنە ئەنجامدان، کو د ئەنجامدا ٦ پێشمەرگەیێن قەهرەمان شەهید بوون و ٣٠ پێشمەرگەیێن دى ژى بریندار بوون.
هەرچەندە ئەم ڤێ هێرشێ و هەمی هێرشێن دى یێن تیرۆریستى یێن ل سەر هەرێما کوردستانێ ب توندى شەرمەزار دکەین، لێ دووبارە دکەینەڤە کو مافێ مە یێ تمام هەیە ل هەمبەر هەر دەستدرێژیەکا ل سەر گەل و ئاخا مە بوەستین.
مە چو جاران چاڤەڕێى بەرسڤەکا هوسا ترسنۆکانە ل هەمبەر هەلویستێ ئاشتیخوازانە یێ هەرێما کوردستانێ نەدکر. لێ تەمەنێ خیانەت و زلمێ یێ کورتە و دێ ئیرادەیا ئاشتیێ هەر سەرکەڤیت.
ئەم سەرساخیێ ل مالباتێن شەهیدێن خوە دکەین و داخوازا چاکبوونا بلەز بۆ برینداران دکن. جارەکا دى، ئەم بانگ ل هەموو لایەنان دکن کو شەڕ و ئالۆزیان ژ هەرێما کوردستانێ دوور بێخن، و داخوازێ ژ حکوومەتا فیدرال، جڤاکا نێڤدەولەتى و هەموو دۆستێن خوە دکن کو ل هەمبەر ڤان پێشێلکاریان بێدەنگ نەمینن و سنوورەکى بۆ ڤان هێرشێن نەڕەوا دانن.
