پێڤاژۆیا کو، ب بریارا ده‌وله‌تێ و ڕاگەهاندنا سه‌رۆکێ مەهەپێ ده‌ڤله‌ت باخچه‌لی ب بانگا ژ ئەبدولا ئۆجەلان را ده‌ستپێکری به‌رده‌وامه. وه‌ک تێ زانین د ده‌ستپێکا پێڤاژۆیێ دا هه‌یئه‌ته‌ک ئا ده‌م پارتییێ سه‌ردانا ئۆجەلان کر و به‌رسڤا ئۆجەلان یا ژ بانگا باخچه‌لی را هاته ڕاگەهاندن. دو خال هه‌نه کو گه‌له‌ک زه‌لالن و مناقه‌شه ل سه‌ر نایێ کرن. ده‌وله‌تێ ب ڕێیا باخچه‌لی داخواز کر کو، بلا ئۆجەلان بێ پارله‌مه‌نتۆیێ د جڤینا گوروبا ده‌م پارتتێ دا باخڤه و بێژە: ئه‌م داوییێ ل ته‌رۆرێ تینن و دەست ژ چه‌کان به‌رددن و بلا پەکەکە خوه هلوەشینە. ب ڕێیا هه‌یێه‌تا ده‌م پارتییێ ئۆجەلان ژی بانگا خوه ژ ڕایا گشتی را ڕاگەهاند. هه‌یئه‌تا ده‌م پارتییێ ده‌ما بانگا ئۆجەلان ڕاگەهاند گۆت ئۆجەلان دبێژه: بلا پەکەکە چه‌کان دانە، بلا کۆنگره‌یا خوه ل دار بخە و خوه هلوەشینه، نابە ئێدی دۆزا ده‌وله‌تبوونێ، ئۆتۆنۆمیێ، فه‌ده‌رالیێ و خوه‌سه‌ریێ ژی بێ کرن. ته‌نی سیاسه‌تا ده‌مۆکراتیک پێوسته.
بوویه‌ر و ڕوودان ب کورتی ئه‌ڤه. پشتی داخوویانیا ئۆجەلان، د ناڤا پەکەکێ/ده‌مێ و ڕێخستن و ده‌زگه‌هێن ب پەکەکێ ڤه گرێدایی دا گۆتوبێژه‌ک تایبه‌ت ده‌ستپێکر و هه‌ر ئالیه‌کی پەکەکێ ڕۆژانه داخوویانیێن ناکۆک دان. ئانکو دخوه‌یێ به‌شه‌ک ژ پەکەکێ د ناڤا هه‌موو دام و ده‌زگه‌هێن خوه دا و پارتیێن خوه یێن له‌گال دا ژ بانگا ئۆجالان نه ڕازینه. لێ د مه‌رجێن کو ته‌ڤگه‌ر ته‌ره ده‌رباس دبه نکارن دژتیا خوه ل هەمبه‌ر بانگا ئۆجالان ب زمانه‌ک ڤه‌کری و زه‌لال بدن دیارکرن. دێ ڕۆژانه د مه‌دیایا پەکەکێ دا هێشتا به‌حسا ڕاکرنا ته‌جریتا ئۆجەلان دکن. ژ بۆ ڤێ خوه‌پێشاندانا ل داردخن. گه‌لۆ ئه‌ڤ چ ته‌جریته کو، ئۆجەلان ل گه‌ل مالباتا خوه هه‌ڤدیتنا دکه، ل گه‌ل هه‌یئه‌تا ده‌م پارتییێ یا ئیمرالی دجڤه، ل گه‌ل ڕایادارێن ده‌وله‌تێ جڤینێن به‌رفره دکه. ده‌ما پێویست بانگا کو دخوازه دکه. ژ ئالیه‌ک دن به‌حسا ئازادیا ئۆجەلان دکن. لێ ئاشکهره ناکن دێ چه‌وا ئۆجەلان ئازاد ببه. گه‌لۆ ئۆجەلان ل ئیمرالیێ چه‌وا دژی؟ یان ژی دێ ئۆجالان بخوازه ژ ئیمرالی ده‌رکه‌ڤه. ئیمرالی هه‌ر ده‌می نایێ واته‌یا گرتیگه‌هێ و زیندانیا ئۆجەلان. گه‌له‌ک واته‌یێن جوودا یا ئیمرالی هه‌نه.
ژ ئالیه‌ک دن هنده‌ک ڕایادارێن پەکەکێ داخوویانیا ددن و دبێژن، ده‌ما ئۆپه‌راسیۆن هه‌بن، ئەم دێ چه‌وا کۆنگره‌یێ خوه بجڤینن؟ باخچه‌لی به‌رسڤ دا و گۆت : وه‌رن ل مالازگرتێ کۆنگره‌یا خوه بجڤینن.
نها پرسه‌ک ل ڤێ ده‌رێ هه‌یه کو، که‌سایه‌تێن چه‌پێن ترک و کورد د ناڤا پەکەکێ و ده‌م پارتییێ و ده‌زگه‌هێن دن ئێن پەکەکێ ڤه گرێدایی دا ناخوازن ئه‌ڤ پێڤاژۆ سه‌ربکه‌ڤه و پەکەکە خوه هلوەشینە و دەست ژ چه‌کان به‌ردە. ژ بۆ ڤێ ژی د ناڤا هه‌ولدانان دا نه . ژ به‌ر کو ئه‌و نانێ خوه یێ سیاسی ب شه‌رێ کو پەکەکە دکه دخون. پرس گەلەک زه‌لاله. ژ ئالیه‌ک دن ڤه به‌شه‌ک مه‌زن ژ بنگه‌ها پەکەکێ و که‌سێن کورد و کوردستانی د ناڤا پەکەکێ و ده‌زگه‌هێن وێ دا دخوازن ئه‌ڤ پێڤاژۆ سه‌ربکه‌ڤه و ل گۆرا خوه به‌رژه‌وه‌ندیا ته‌ڤگه‌را کورد د ڤێ یه‌کێ دا دبنن.
ئه‌ڤ پێڤاژۆ سه‌ربکه‌ڤه، ل باکورێ کوردستانێ ڕێ ل پێشییا ته‌ڤگه‌را ئازادخوازا کورد ڤه‌دبه، ئاسته‌نگا پەکەکێ ل پێشیا ئالیێن کورد ب ئاوایه‌کی ئاڤاکری ژ هۆلێ ڕادبه. که‌چ و کورێن کورد ژ بۆ ئارمانجه‌ک ڤالا و به‌رژه‌وه‌ندیێن داگیرکه‌ران ژیانا خوه ژ ده‌ست نادن. خوینا تێ ڕژاندن دسه‌کنه. ئه‌ڤ پێڤاژۆ ل سه‌ر بکه‌ڤه وێرانییێن د جڤاتا کورد دا په‌یدابووین ب ئاوایه‌کی دێێنە نووژەن کرن، دژبه‌ریێن ده‌ستچێکری د ناڤا جڤاتێ دا کێم دبه و ژ هه‌موویێ گرینگتر جڤات ژ ڕه‌وشه‌ک ئاوارته ده‌ردکه‌ڤه و به‌ر ب نۆرمالیزه‌کرنه‌کی ڤه دچه.
ل ڕۆژاڤایێ کوردستانێ ڕه‌وشا کوردا به‌ر ب یه‌کرێزیه‌کی ڤه دچه و کورد دێ ب یه‌ک ده‌نگی بکاربن دۆزا مافێن خوه یێن ڕه‌وا ب پشتگریا هنده‌ک وه‌لاتێن جیهانی بکن. ب کورتی کورد ده‌وسا شه‌ره‌کی ل گه‌ل ده‌ستهلاتا سووری یا نوو بکن، دێ گۆتوبێژا بکن و ل ڕۆژاڤایێ کوردستانێ کورد ژ کوشتن و تالانکرنێ خلاس ببن. ژ هه‌موو گرینگتر عه‌ره‌بوونا هه‌رێما کوردستانێ کێماسی تێ سه‌کناندن.
ل باشوورێ کوردستانێ کائۆسا کو پەککەێ په‌یدا کری داوی لێ تێ. کێماسی هێدی ئیران و حوکومه‌تا به‌غدایێ نکارن پەکەکێ ل دژێ ده‌ستکه‌فتیێن باشوورێ کوردستانێ ب کاربینه. ئه‌ڤ هه‌موو ژ بۆ کوردا و ته‌ڤگه‌را وان ئا سیاسی ده‌ستکه‌فتنه.
گه‌له‌ک ڤه‌کری ئه‌ندازیاره‌ک یێ ڤێ پێڤاژۆیا گرینگ و چاره‌نووسی سه‌رۆکێ هه‌رێما کوردستانێ نێچیرڤان بارزانی یه. تایبه‌تی هه‌ولدانێن نێچیرڤان بارزانی سه‌ده‌مه‌ک بنگه‌هین بوو کو، ل ڕۆژاڤایێ کوردستانی رژێما نوو ل دژی کوردا شه‌ره‌ک چه‌کداری نه‌که و هه‌لوه‌ستا خوه به‌ر دیالۆگێ ڤه ڤه‌گوهێزه. ژ ئالیه‌ک دن ژ بۆ ئه‌ڤ پێڤاژۆ سه‌ربکه‌ڤه هه‌ولێن بارزانی ل گه‌ل ترکیێ و سوریەیێ گه‌له‌ک ڤه‌کرینه و هه‌ولادانێن وی هشت کو، ترکیه‌نکاربە ئێریشی سەر ڕۆژاڤایێ کوردستانێ بکە و هه‌تا ئۆپه‌راسیۆنێن پلانکری بینه سه‌کناندن.
د ڤێ پێڤاژۆیێ دا دو ئالی ده‌ردکه‌ڤن هۆلێ. ئالیێ کو ل دژی پێڤاژۆیێ و هه‌ولددن به‌رپووتکا بدن به‌ر گاڤێن تێن ئاڤێتن و ڤێ پێڤاژۆیێ ئاسته‌نگ بکن. ئالیه‌ک دن ژی ل هەمبه‌ر هه‌ر تشته‌کی ژ بۆ به‌رژه‌وه‌ندیێن کوردا گه‌له‌مپه‌ری د سه‌رکه‌فتنا ڤێ پێڤاژۆیێ دا دبن هه‌ولددن ئه‌ڤ پێڤاژۆ ب ئاوایه‌کی سه‌ربکه‌ڤه.
پێڤاژۆ گه‌له‌کی ئاشکهره و زه‌لاله. لێ یا نه زه‌لال هه‌لوه‌ستا نه خێرخوازێن کوردایه.
٢٠٢٥\٤\١٣
ڕێنین/شرۆڤه
ن.فرات
