ل ترکیێ و باکورێ کوردستانێ ڕاستیه‌ک هه‌یه کو نه که‌سه‌ک دخوازه ببینه و نه ژی به‌حسێ وێ بکه. د ڕۆژه‌ڤا سیاسه‌تا ترکیێ ده پرانی پرسگرێکێن سیاسی و جڤاکی، ڕه‌وشا پارتیێن سیاسی و ڕه‌وشا دارایی، حوکومه‌ت و موخاله‌فه‌ت تێنە گۆتوبێژ کرن. هه‌تا گه‌له‌ک پرسگرێکێن جڤاکی ل پێشیا پرسا کورد دکه‌ڤن ناڤ گۆتوبێژێن ڕۆژانه ده. یانی ب ئاوایه‌ک دن پرسگرێکا کورد و چاره‌سه‌ریا ڤێ پرسێ نه بابه‌تێ ڕۆژانه‌یه ل ترکیێ و باکورێ کوردستانێ.
ڕایەدارێن ترکیێ گه‌له‌ک ب زانه‌بوون پرسا کورد د هه‌یین و ناڤه‌رۆکا پەکەکێ ده تینن ڕۆژه‌ڤێ. ڤێ یه‌کێ ژی وه‌ک پرسا ته‌رۆرێ ل ترکیێ ب ناڤ دکن و دبێژن کو شه‌رێ وان ل هەمبه‌ر ته‌رۆرێ هه‌یه. هه‌موو ئالیێن سیاسی ل ترکیێ د ڤێ ده‌ربارێ ده وه‌ک هه‌ڤ دفکرن و ل گۆرا ڤێ ژی سیاسه‌تا خوه دئافرینن.
هه‌تا هەدەپە ب خوه ژی پرسا کورد وه‌ک پرسا سه‌ره‌که نابینه و ناپارێزه. ل گۆرا هەدەپێ پرسا سه‌ره‌که پرسا “ ده‌مۆکراتیک “ ه. کا گه‌لۆ پرسا ده‌مۆکراتیک چیه؟ د ڕاستیێ ده ئه‌و ب خوه ژی نزانن. لێ شیعاره‌که هه‌ر تم د ده‌ڤێ وان ده یه.
ئالیێن سیاسی و هەدەپە ژی ده‌ما ژ وان ڕه پێوستبه به به‌حسا پرسا کورد دکن. هنده‌ک جارا ڕایەدارێن ترکیێ ددن خوویاکرن کو پرسا پەکەکێ و پرسا کورد ژ هه‌ڤ جودانه، لێ د ڕاستیێ ده ل گۆرا ڤێ دیتنێ ته‌ڤناگه‌رن.
ژ ئالیه‌ک دن ل باکورێ کوردستانێ هەدەپە خوه وه‌ک پارتیه‌ک کورد و کوردستانی نادە ناساندن. ئه‌و گه‌له‌ک جارا هنده‌ک پرسگرێکێن سیاسی ژ پرسگرێکا کوردا جودا دکه .
نها د ڕۆژا مه ده هەدەپە وه‌ک پارتیه‌ک چه‌پ ته‌ڤدگه‌ره ل گۆرا ڤێ ژی ل گه‌ل پارتیێن مارژینالێن چه‌پێن ترک کۆئالسیۆنه‌کی ده یه و پرسا کورد ژی د په‌رسپه‌کتتفا وان ده دشۆپینه.
هه‌تا کو ل باکورێ کوردستانێ و ترکیێ کورد ڕاستیا خوه نه‌دن پێش و دۆزا مافێن خوه یێن نه‌ته‌وی نه‌کن و خوه وه‌ک کورد و وه‌لاتێ خوه وه‌ک کوردستان نه‌بینن چ جارا ڕاستیا پرسگرێکا کورد ل ترکیێ و باکورێ کوردستانێ نایێ دیتن.
مالپه‌را پارله‌مه‌نتۆیا ترکیێ ڤه‌کریه. هه‌رکه‌سه‌ک دکاره د ڤێ مالپه‌رێ ده ژ بلی هنده‌ک جڤینێن نه‌هێنی هه‌موو کار و خه‌باتا پارله‌مه‌نتۆیێ بشۆپینن. گه‌ره‌ک هه‌ر کورده‌ک لێ بنێره، کا گه‌لۆ هەدەپێ هه‌تا وه‌ک ئیرۆ چه‌ند داخواز و چه‌ند پێشنیار ژ بۆ دۆزا کورد کرنه؟ ئه‌ڤ یه‌ک پیڤانا سیاسه‌تا هدپێ یه د پارله‌مه‌نتۆیێ ده.
ده‌ما رەوشا پەکەکە/هەدەپە ئالۆز دبه و ژ تاقه‌تا خوه دکه‌ڤن، هینگێ ده‌ست تاڤێژن پرسا کورد. به‌حسا یه‌کێتیا نه‌ته‌وەیی دکن کو چ پێوه‌ندیا وان ب خوه‌نه‌ته‌وەیه‌تیێ ڤە نینە. ئه‌و نه‌ته‌وەییه‌تیێ ڕه‌د دکن.
سیاسه‌تا پەکەکێ گه‌له‌ک ئه‌شکه‌ره‌یه. ل عیراقێ ل دژی کوردا یه‌کێتیا ئاخا عیراقێ دپارێزن و دگه‌ل حه‌شدا شه‌عبی ل دژی کوردا ته‌ڤدگه‌رن. ل ئیرانێ دگه‌ل ڕه‌ژێما ئیرانێ شه‌رێ کوردا دکن. ل ڕۆژاڤا ناڤێ کوردستانێ وندا دکن و ئالا کوردستانێ قه‌ده‌غه دکن دگه‌ل عه‌ره‌بان کوردا ژ ئاخا وان دوور تێخن.
ئیرۆ ژی پرسگرێکا کوردا و پرانیا ئالیێن سیاسی کوربوونا وان ئا سیاسیه. ڕاستیا پەکەکێ نابینن . که‌سه‌ک دۆزا خوینا ب هه‌زاران زارۆک، گه‌نج و شه‌هیدێن کورد ناکه. که‌سه‌ک نابێژه به‌رهه‌مێن خوینا ب هه‌زاران شه‌هیدان چیه؟ هه‌تا وه‌ک ئیرۆ چ ده‌ستخستن ده‌ستڤه ئانینه. ژ بۆ ڤێ یه‌کێ ژی گه‌ره‌ک یه‌که‌م گازندا کوردا ژ کوردا ب خوه به. دڤێ کورد چاڤێن خوه ڤه‌کن، ڕاستیا خوه ببینن و دۆزا مافێن خوه یێن نه‌تەوەیی بکن.
ئه‌ڤ ڕاستیه‌که ل سه‌ر عه‌ردێ یه. مالخرابیا کوردا ب ناڤێ کوردا تێ کرن .
ئەنالیز/ن.فرات
