نەسرەت حاجی
رۆژا چوارشەمێ، 2021.01.20 جۆ بایدن ل كۆنگرێسا ئەمریكایێ سووندا یاسایی خواند و ئەو بوو 46-مین سەرۆكێ ویلایەتێن یەكگرتیێن ئەمریكایێ.
جۆ بایدن پاشخانەكا گەلەك زەنگین د وارێ سیاسەتێ دا ھەیە. ئەو 15 سالان سەناتۆر بوو ، یەند جارەكا خوە ژ بۆ پۆستا سەرۆكاتیا ئەمریكایێ كاندید كریە و جیگرێ سەرۆك باراك ئۆباما بوو. ھەتا كو ئیسال گەھشتە قەسرا سپی و ل سەر كورسیكا سەرۆكاتیێ روونشت.
جۆ بایدن ب دۆستەكێ ب “وەفا” یێ كوردانە و ب تایبەتی گەلەك دۆستێ سەرۆك مەسعود بارزانی یە . سەرۆك بارزانی گەلەك جاران د ئاخافتنێن خوە دا ئیشارەت پێ دایە كو جۆ بایدن جارەكێ ژێ را گۆتیە”ئەم ھەر دو دێ د ژایانا خوە دا ب چاڤێن خوە سەرخوەبوونا كوردستانێ ببینن” و سەرۆك بارزانی ئەڤ گۆتنا بایدن د كتێبا خوە یا ب ناڤێ ( بۆ مێژو) دا ژی بەحس كریە.
پشتی بایدن سووندا یاسایی خواندی و بوویە سەرۆكێ ئەمریكایێ دلخوەشیەك كەتیە ناڤ گەلێ كورد، ب تایبەتی گەلێ كورد ل باشوورێ كوردستانێ و گەلەك ھیڤی ل سەر سیاست و دۆستانیا بایدن ئاڤا كرنە.
راستە جۆ بایدن دۆستێ كوردانە، لێ؛
بایدن خوەدی ھندەك پرەنسیپانە و گرێدایێ سیاسەتا دەولەتێ یە و دخوازە ھەر بریارەك ب رێیا سازیێن پەیوەندیدار بێ دایین، ئەو وەكە سەرۆكێ بەرێ دونالد ترامپ بریارا ل گۆر مەزاجا خوە ب سەرێ خوە ناكە و ناخوازە ئالۆزیان كوورتر بكە.
لەورا ئەگەر كورد بخوازن مفا ژ دۆستانیا دگەل جۆ بایدن وەرگرن دڤێ چەند گاڤان پاڤێژن داكو دەستێ بایدن ڤەكری بە و بكارە ئیدارەیا قەسرا سپی رازی بكە بریاران د بەرژوەدنیا كوردان دا، ب تایبەتی د بەرژوەندیا باشوورێ كوردستانێ دا بدە.
وەك:
- لەزكرن ل ب جێبەجیكرنا پرۆژەیێ چاكسازیێ د ھەموو واران دا
- ھێزێن پێشمەرگەیێ كوردستانێ ببن یەك ھێز و ھەموو وەك لەشكەرەك یەكگرتی بكەڤە سەر ب وەزارەتا كارووبارێن پێشمەرگە و ھێزێن گرێدایی پارتیان نەمینن.
- یەكێتیا نشتمانیا كوردستانێ (یەنەكە)، وەكە یەك ژ ھێزێن سەرەكی یێن باشوورێ كوردستانێ، خوە ژ ئیرانێ دوور بكە و ڤەگەرە سەر بەرەیێ ئەمریكایێ و رۆژاڤا، چێنابە تو داخوازا ھاریكاریێ ژ جۆ بایدن و ئەمریایێ بكی و تو دگەل بەرەیێ ئیرانێ بی.
- دڤێ ھەڤپەیمانیا ستراتەژیا یەنەكێ دگەل حەشدا سەعبی بێ ھلوەشاندن و یەنەك ڤەگەرە و رێكەفتنەكا ستراتەژی دگەل پارتیا دەمۆكراتا كوردستانێ (پەدەكە) ئیمزا بكە.
- دڤێ ھەموو ئالی، پارتی و رێخستنێن باشوورێ كوردستانێ بێنە با ھەڤ و ناڤمالا كوردێ بێ رێكخستن و ب یەك دەنگ و یەك سیاسەت دانووستاندنان ب ئەمریكایێ وھەموو ئالیان را بكن.
ئەرگەر باشوورێ كوردستانێ ب پراكتیكێ ڤان گاڤان پاڤێژە، ھینگێ دێ رێ ل پێشیا دۆستێ كوردان، جۆ بایدن، ژی خوەش ببە و دێ بكاربە ھندەك گاڤان پاڤێژە و د بەرژەوەندیا كوردان دا بریاران بدە.
ئەگەر ئەم بەحسێ رۆژاڤایێ كوردستانێ بكن، ھێز و ئالیێن وێ پارچەیا كوردستانێ ژی دڤێ ژ ڤێ رەوشا تێدانە خوە رزگار بكن و چەند گاڤێن گرنگ پاڤێژن. وەك:
- پارتیا یەكێتیا كورد (پەیەدە) خوە ژ بن باندۆرا قندیل و كۆنسەیا پەكەكێ رزگار بكە و د بریاردانێن خوە دا سەربخوە ببە و ل گۆر رەوشا رۆژاڤایێ كوردستانێ تەڤبگەرە.
- دیالۆگا كوردی –كوردی سەربكەڤە و بگەھە ئارمانجا خوە، ئەنەكەسە ژی د رێڤەبرنا وەلات دا بەشدار ببە و پێشمەرگەیێ رۆژ ڤەگەرە رۆژاڤا و مل ب ملێ ھەپەگێ وێ پارچەیا كوردستانێ بپارێزن.
ئەگەر مە بڤێ و ئەم بخوازن ھندەك دەستكەفتیان د دەما ئیدارەیا جۆ بایدن دا ب دەست بخن، دڤێ ئەم وان خالێن ل ژۆر جیبجێ بكن و باوەریێ ژ دۆستێن خوە را چێ بكن.
2021.01.22
